Makutaay

Makutaay (港口部落)

Makutaay(港口部落) hananay, itiniay i pasawali nu Taywan, mililis tu lutuk mikecur tu Taypinyang ku kasa niyaru' nu Makutaay. Katimul nuna niyaru' u cepu' nu Talawadaw. Anu paka'amis ku rakat isu,matafesiwhu ku talawadaw i,ira kuya sacecay sanay a lutuk tumireng i kawali ,mahapinang tu kuna niaru' itatihi.

I ti:yahu i, caayay kaitini ku paluma'an nuna niyaru', na miingidayho i tatihi nu talawadaw ku paluma'an nu tu'asan nangra. Kairaan nu Holam tayni i Taywan,malala'is, caay pakafilu,fulaw saan tayra i Cilangasan(奇拉阿山)hananay a lutuk a maru' ku tamdaw nuna Makutaay ma'emin. Naikuran tu i,ira ku suwal tu caayay tu pisa'ada ku kwaping nu holam saan i ,mafulaw aca ma'epud nai Cilangasan ,ta hicera saan tona paniyaru'an tahanini. Anu u Makutaay hanen a mipangangan kuna niyaru' saw? Pakayniay i ka’amis nuna niyaru’ ira kuya ‘alu., anu ma’uradtu anca macidaltu, manguta:itu ku nanum nuna ‘alu,saka pangangan hantu nu matu’asay ku “mangutaay” , nika masasirumatu ku ngiha’ tahanini, "Makutaay" saan toko pangangang.

Una Makutaay a niyaru', u satapangan kahiceraan nu misapancahay saan. Tiri' han i cuka nu Taywan i, i ka'amis nu patatikuan nu cidal kunis(北回歸線), tatudung i sasifu'an nu Taywan ku Makutaay. Ira ku suwal nu matu'asay atu tilid nu mitiliday, ya miliyas tu [Cilangasan} a lutuk maluklun a mafulaw i, ma^min itini i taliyok nu talawadaw pacarcar a maru'. Nanuyaan i,palitemek satu masangsangasaw a maliwaswas; pasi'amis ku pasi'amisay,pasitimul ku pasitimulay, ira ku talaetipay.Lupisak satu a mafulaw, dengantu ya talaikuray tu cekiw atu pudaw ku ma'usaway a masaniyaru'. Kacanglahan itu, anu matatama tu sa'ayaway a keleng atu cedas i, kaluklunan nu kalang tala riyar. Micadiway ku i niyaru'ay a tamdaw i, salufulufuc sapawtiwti saan ku kalang, malu sapalada' tu tamdaw nu fiyafiyaway a niyaru'. Uruma satu kadufahay ku pudaw i talawadaw, caay ka nikaw tu sasimi.

Limaay ku kasangasaw nuna niyaru'--pacidalan, cilangasan, sadipungan, munali ato cikatupay. Anini, caayaytu pipalafang a malahulul, nikawrira, caay pisawad a mapulung a misangasaw tu mihca^caan, itini a mahapinan ku rayray nu kasalawinawina. Maherek ku kapanayan nu kaciherangan i,u piilisinan itu.Tahanini i,masaslalslal ho ku kasa'upu^ nu niyaru'. U mama nu kapah a selal ku milikakawaay tu demak nu niyru',ya ruma sasafaay a selal i,iraay a masilsil ku malu tayal nangra.Romasatu, misacepu' ku tadamanay a demak nu niyaru'Ayaw no kaciherangan i,mapulun ko fa’inayan no niyaro’ i riyar,tudung pi'aray tu pafeli no kawas to kakaenen.Tahanini i,ilisin atu misacepu' tata'angay a demak nu Makutaay.Anu cilimaw i, katayni i niyaru' nu Makutaay a minengneng tuna fangcalay a serangwan,ta mafana' kiso tu 'urip nu misapancahay.