Litapangan a milingayaw

nani… a masadak Wikipedia
跳至導覽 跳至搜尋

Litapangan a milingayaw (馘首起源)

Matiniay ko litapangan no pingayaw, yo mikerid to tatosaay a wawa ci Itongan ato ci damayan a mikasoy ci Calaw, maso’aw to ci Calaw, ocor han nira koya malakakaay a tatosa tayra i sawaeran a miradom, nika o sapalimo’otan toya tatosaay a malekaka koya ci Calaw, palingata sa cingra miki’ayaw mingota toya nanom, minokay koya tatosaay awawa sowal sa, “Mamaaw! mangota koya nanom, saka maosoy kami a minokay.” Paca’of han ni Calaw a somowal, “Cadiwen ko po’ot ato ’idoc namo, samada han a miraod tayra toya sawaeran no nanom, nengnengen cima koya tatiihay a tamdaw mingotaay to nanom, ma’araw namo tepoc han ko fongoh nira.” Oya to malekakaay paliyaw to a tayra.

Tonini, makera to nangra tatosa ira itira mingota to nanom no sawa’eran, orasa samadah sa a miraod mingata toya tati’ihay a tamdaw, kawilikawanan ko cecay kitatosa han nangra a micocok ta mapatay, awaay to ko limalimaw noya tamdaw a paco’ay, tepoc han to nora malekakaay ko fongoh, nengneng han nangra pacekok o mama nangra koya mitepocan!

Tatangic sato cangra a minokay pakafana’ to ina tona litapangan a demak, tangsol to mikaketer cangranan tatosa sowal sa “Pingayaw to fongoh han no mama namo, wata ko olah namo a mingayaw, o fongoh to no mama namo tepocen to, a matira aca oli pi’adop mingayaw to fongoh! ” orasa mingayaw to to fongoh cangra malekaka, lima a romi’ad caka komaen to kakaenen, maherek to talataporo palokelon to fokeloh, mitanam milifet to cikay no fokeloh, nika caka piharakat to foeloh, orasa caho kaedeng a mingayaw to fongoh sa cangra. Caay pitolas cangra a misalifelifet a minanam misaliway to kakaenen, malecad ho ko pilifet nangra to kalekelon no fokeloh, toni pilifet malowid to nangra, sowal sato, “Ira to ko ’icel niyam, haydaen kami misanga’ to safang.” Tafo han nangra malekaka ko fokeloh, mangaay sapipaekel to ’ada a safang, mangaay aca sapirepet to malonem, o remes no malonem paro han tacefoan no malonem.

Masadak cangra tayra i niyaro’ no ’ada, i laawac no niyaro’ mikowan pasoni, mikadoh to ’ada hay masadak a mifolaw, nika paka’araw ko ’ada cangranan tatosa aca a malekaka, salahoday sa misatapang to a milaop. Tangsol to milaliw koya malekakaay, comkay cangra pasiyasi’en nangra koya miparoan i tacefoan a remes, mato cidoka haysa, maherek to tayra to toya maromotay i salo’akong toya mica’itan a safang, emin hanto koya remes miseni’ i safang, minengneng koya ’ada toya pinatera’ a remes, keton hanto koya keliw no safang, o safang ato fokeloh malokelon to maemin mapaekel to ko ’ada a tamdaw, itiya to sa lahoday sa cangra malekaka hacecacecay hanto nangra a mitepoc ko fongoh. O fokeloh ko tadek no kaka a miketon, orasaka kinacecay miketon ceca ko ngici’ no po’ot; no safa han o kilang ko tadek a pitepoc, orasaka caay katalec caay kangici’ harakat ko pitepoc nira.

O sapanokayaw aca tora fongoh no ’ada, ala sa to talopo a kilang malo’onoc nira, nika koengel ko caang, cahocaho mapitek to, nika no safa han na pakatengilay to soni no ’ayam sowal sa, “Taciwlalaw, taciwlalaw ” saan saka ala sa cingra to taciwlalaw a kilang malo’onoc nira, orasaka caayay ka pitek.

Lata’ang sa cangra a minokay pafeli han nangra ko ina toya fongoh no ’ada, nika caay ka lipahak sowal sa, “Sapimaan ko fongoh no tamdaw, ma’osi kako to matiniay a lalosidan.” orasa malekakaay sowal sa, “Naw hatira to ko keter ni ina? liyas sato kita to loma’ mikilim to maloramod sato!”

Tahira cangra toya cecay a pala, mipeco’ cangra to mami’. sowal sa ko kakak, “No makoay a mami’ ko marohemay itiniay ” ala sa to cecay podac han nira ira ko mato’asay to a fafahiyan, marihaw ko ngiha. No safa han kandaway ho, podac han nira, masadak ko limecedan ho a fafahiyan.

Hakelongen to nangra malekaka ko fafahi minokay, makera ira to ko falohay kaolahan no ina nangra ma’osi cangranan, orasa o rarom no faloco’ nangra malekaka sakafong to sapikpik no ’ayam mihawikid to cifo’isay to tilid a po’ot pasowal to ina, “Inaaw, ano matiratira ka la’eto ko faloco’ iso, nengnengen ho iso kami itini i potal! ikor to edeng to kafangcalan ko romi’ad to dadaya, ta mangaay no miso minengneng tamiyanan.” orasa hatosa to wa’ay takod han nangra, “Peng” sa cecay ko soni, miripa’ to sota’ ko wa’ay, masoni ho, micomod to ko pakih talalinik no sota’, sakinatolo masoni, o wa’ay maemin to malafong i sota’, saikoray to pitakod maemin to malafong i lalinik no sota’ awaay to a ma’araw! sakalima to a romi’ad, masadak to ci ina minengneng to kakarayan, deng manengnengay samiyamiyat sanay i kakarayan ci linamay ato ci Itong tosa ko fo’is.