U lusid nu Pangcah

nani… a masadak Wikipedia

U lusid nu Pangcah (阿美族服飾)

U lusid nu Pangcah, i kabana’an nu nimanima i, sabacal teli’sananay, sulinay dadahal ku niyaru’ nu Pangcah, namaka Tatiboracan tangasa i pusung, midungdung aca tu liyal, caay kanca kamelaw tu kira narakatan nu Pangcah, sisa pakayra i saamisan a malingatu ku silsil, tangasa i siwkulan atu waliay nu dungdung tu liyal a Pangcah, tangasa i satimulan nu Balangaw atu Palidaw, caay kasasulecad ku lusid nu niyaniyaru’.

Pakayra i cengel kita a mimelaw, i amisay u lahengangay, muhetingay, bucalah ku tapang, i tilaay i makatimul i, misengi tu buduy nu Piyuma, simisamis, sicacahebayan i abala, u muhetingay, u kaimuay, u atipulingay, langdaway, lahengangay atu kulawlaway a cengel. Anu semuwal tu buduy i, a maka tusaay a patekenan nu mihecaan kiyari a malingatu a pasuwal, u Pangcah nitiyahen, u tubah nu kilang ku sapsakidudung a misanga tu tuper, tu tawpaw, sabuut, hundusi, talip atu satamec, ira ku nisuri naitiyahen. Mahaen ku nipisatapang tu babahi a misaselal, u buduy nu kapah atu timpi kiyari ku mamelawen atu sakabana tu nikasaselal.

Tadaadihay tu ku buduy nu kapah, pakayra i tuper, tawpaw, sicaledungay, hahidaw, buduy payayaw, sakikamay, hundusi, talip, satelec, sateleng, satelep, sacahebay atu nisangaan tu nu balaku nu kararayan a kucu. U limucedan a kayingi, sinanut tu sapatungal tu buduy ku tapang. Ira emin nu caluk a lusid i, pakayra i tawpaw, payayaw, mapusutay a buduy, sukun, satelec atu talakes a masuramud. U tapang nu satungal, ira ku timpi nu babainay, nu babahi i cu’ung, ulet, sabetbet, cangaw, cael, pay’ayaw, sakipatelaw, satamec karing.

U caay kaw mamasiday ku tuper, u mamelawan atu sapasubana’i niyaru’, adihay ku nisanga tu sapamisamis tu tuper, tu sapamelaw tu tarakaw nu tiren i selal, tu sakacaay yaaca kaw mamatudung nu nimanima a macaluk, sisa u sakahemekan ku lingatu nu tuper. U rumasatu u cakaw, ira ku nipasuwal nu matu’asay, anu tatak ku buhang nu cakaw u sakapahay a sining kira, sisa adihay ku sasangaan tu cakaw, matiya u nu lalacan, nu ukak, nu bekeluh, nu awul, nu kilang, nu manaw, nu kangkang, nu banuh adihay caay kaw mamaasip.