Tsai Ing-wen - Taywan 112 miheca kaacangan no kitakit

Tsai Ing-wen 112 miheca kaacangan no kitakit “polong no pipapelo”. (蔡英文112年國慶「演說全文」)

FTNN calay

2023 miheca 10 folad 10 romi’ad (saka 2) ’ayaw no lahok 10:30

FTNN calay milosoyangay Cen hongce/Taypi sinpon

Tsai Ing-wen congtong papelo i 112 miheca kaacangan no kitakit: “Tanektek ko pipasoelin, tala’ayaw ko kitakit, fangcal ko Taywan a manga’ay ko hekal.” (蔡英文總統112年國慶演說：自信沉穩、國家前進，讓世界因臺灣而更好)

O kakeridan no nia saopo ci You Xikun yinciw, Republic of Nauru ci Quinlos congtong mararamod, Federation of Saint Kitts ato Nevis Leiber citodongay, Saint Vincent and the Grenadines Dogan citodongay, o tayniay mikihatiya a tadamaanay lafang, tadawidang, miki’araway to tilifi ato i calayay minengneng a finawlan no kitakit: Nga’ay ho.

Anini romiad o kaacangan no Taywan (Conghoa minko) kitakit to 112 miheca. Mata’elif ko 3 miheca, mihelong to kita to tamikis, masaopo kita itini, malipahak to kaacangan no kitakit.

Itini kasaopo no mita ’aloman ko nai kasaniyaro no cikiway a finawlan, miliyaw tayni nai kasakitakit a widawidang, itini kako a mitaypiaw to finawlan no Taywan, pai faloco’ay ko piahowid i titaanan mapolong.

Mitiko i ’ayaw no tolo miheca karorayan pisahadimal to kalifongan lalan, matiya o halafinay to koya na romi’ad. ’Arawhani ira ko cecay karorayan a lalan, ira to ko 30 no mihecaan a rakaten.

Caay katala’ayawen ko rakat talalikoray, caay pisa’icel mapasetekay to ko ’orip.

I ’ayaw no cecay folad, “Misanga’ to co’enepay tamina-Ciencien kocaw” sa’ayaway a pinasanga’ mipacefongay to. I kaherek no pisatanatanaman, o nia tamina “Haykon cincien” o ai 2025 miheca misitapang a malahitay.

“Misanga’ to co’enepay tamina-Ciencien kocaw” o nano nitanengan to 30 no mihecaan, i kasasiroma no kasarekad a congtong, o sapilaheciaw to nisafaloco’an. Malaheciay to no mita anini.

Nao awaayay tangasa iraay to, mikawatay to cecay ’awas o sakalalifet. Mineker to mipenecay, milifet to kasemeran, miemet to tatiihay a salikaf, ano ira ho ko katararikoran, o macenonay to.

Nikawrira, malaheciay to ita ko nian. O mikawatay to sa’awas ko nihadimelay to kitaskit, macakatay to ko ’icel no sofitay; mapahapinang ko nian, sapidimokos misipot to Taywan (ROC) a nisafaloco’an. Pakaso’elin kako, mihayda ko polong no kalohekal, Haykon cincien o mamico’a’ang to langod a midipot to sa’etal ato saka rihaday koni.

O nian ko parana’an no conghoa minko i Taywan to 74 a mihecaan, o caayay ka ngiyangi a nisafaloco’an. Misi’ayaw to caayay ka nga’ay i kasakitakit ato talifahalay mafalic a salifet, ano caay katala’ayaw o tatararikor kita toni; caay pisa’icel, caay pakarepet to ikoray ’orip no niyah.

Miahowid to finawlan no Taywan, i karorayan malifet ko sapilaheciaw to sapifalic. (感謝臺灣人民，在艱難挑戰中落實改革)

Mangef, to nia 7 mihecaan, o kasakitakit ato sa’etal a sici kicay a maci’iwiay a demak, patongal sa to ta’akay salifong ato kacera’an a kafafalifalic no romi’ad, milifet to nikapolongan kitakit, o pikomodan no sifo to koda’itay pikowan; milifetay to nikapolongan syakay, i kasasipaso’elin no tamdamdaw ko parana’an.

Caay ka pawan ko sapifalicaw a niketonan ako, mafana’ kako to a ira ko siwtoc ato kaadadaan. Miahowid kako to finawlan no Taywan, i kalacecay a marikecay ko sapilifet to katalawan, o kodaitay ko sapipalasawad to kasasiintel, o nikapolongan ko sapilifet to sakasinanot.

Mahaydaay to 4 miheca ko kalalen no rikec. Miahowid kako to kodaitay no miliyangay, malaheci ma’inal ko i hakalay to Taywan, o masasiolaolahay, miraoy malemed i pisaparodan a kitakit.

Miahowid kako to polong no komoying to pisorar. O sakadotocaw no payso no mihecaan, malaheci to ita ko caayay kalaheci i ’ayaw to “Niencin kayke”, cirafas ko payso no sifo, sapido[pot to wawawawa.

Miahowid kako to polong no matayalay to pisorar. Talacowa, caay ho kalaheci ko Niencin kayke a rarakaten, nikawrira nai 2020 mihecaan miteka, madotoc ko pisilsil to 2,670 walwalan payso a yosang, sapalolol to sakilawpow kiking. Midahekat kako, ikor no pifalic to payso no sakimamatayalay, manga’ay i macekalay ko parana’an no payso, kasasilicay no syakay, malacecay ko hirateng, tanektek ko rakat.

Nanoya, madado’edo to 8 miheca ko pipacakat ita to kinaira, o nikasarad no taneng ko parana’an, pasadak to “Saawaayay kinaira a rikec” tilid, seraen tayra i Lifayin mitomadaw. Caay kapawan ni Tsai Ing-wen ko niketenan sapidipotaw to matayalay.

I’ayaw to pina romi’ad, malitemoh ako ko mararamoday i Taoyin, o “citodongay mifaway” to kanga’ayan kacacaliw cangra, syakay kacacaliw, caay ka dengan “cecay rawang”, o sakaciloma’aw no maro’ay lafang.

Miahowid kako to i kasaco’ed no Taywan, kadihekoan ko picikeroh to syakay loma’ a widang. 7 mihecaan, nai koesitay ko lalowadan tala’ayaw, mapatanektek ko parana’an; anini sato, syakay kamaro’an onto, masongila’ay ko ’otoc, malosakanga’ay ’icel no syakay; patosokan 8 miheca 20 ’ofad ko loma’, itira salepon no 2024 miheca malepon ko nian.

O kakaya’ay rakaten ko “Mo’ecelay kamaro’an”, nikawrira to pinapina mihecaan a nitanengan, pakaso’elin kako, ikor no nian o mo’ecelay lalan ko saka tala’ayaw.

Mahirateng ako, nipiteka malacongtong itiya, o patodong ’icel no dingki no Taywan, sasafaay dengan 1.64% aca. Nikawrira toni 7 mihecaan, macakat to ko ’icel no kinairaira sapalonol, mapolong micikeroh mafalic no kinairaira, i ’yaw no miheca ira ko kasapinangan, kandaway a saparakat to maamaan a kinairaira no pala, mataelif to ko no honing dingki.

Anini, tata’ak ko cidal, ma’edet ko romi’ad, marawraw to kaeca ka’edeng no dingki to herek nolahok. I piliyawan no cidal o kacakatan a toki, o sapatodong ’icel no dingki, itira i 7% tangasa 10% ko cekal ko kaliyon.

Mikihatiya kita to toki a comikay, malifet ko masamaamaanay a pades. Misi’ayaw to sapilaop to no hekalan “2050 kakoracay safalic” a patosokan, micowat ko Taywan to miliyaway a kinairaira, patireng to calay sahoped, ato sakaci’icel no calay, hacikayay, tatiih matayo, caay ko mamisikol patikol.

Tomenek to ko ’icel no kitakit tina 7 miheca, o Taywan ono hekalan to ko Taywan. (七年厚實國力，臺灣已是世界的臺灣)

Dengan o picikeroh to sapifalic, i ’ayaw no 7 miheca, matiya o cialimacedan kita to katatapalan ato kasakitakit a pakayraan, sa’icel sa micowat to kicay, sakatomenek ’icel no kitakit, midipot to finawlan, midama to sakarihaday no kitakit, macekal ko katatapalan no demak, itiya mikilim to sapicoker no kasakitakit.

Mata’elif to ko 7 mihecaan to nipisa’icelan no polong finawlan no kitakit, o kicay no Taywan, mahapinang ko tadamaa a ’icel no pitiker, malosapalowad to polong no cikiw makakafit no ’icel, o ci’icelay to ko kitakit no conghoaminko.

O dadahal no GDP no mita, nai kacakat ako itiya 17.5 ca’or ko kacakat, anini latek mata’elif to ko 23 ca’or payso. Toni pinapina a mihecaan I polong no cikiw o masapateray ko kicay, ato karorayan kacakat no kali’aca, o Taywan to pinapina miheca malakilacay ko kacakat no kicay, makikaka ko no polong no cikiw, tomenek sakakaay i sepatay a kangican, madotoc ko katomenek no kalali’acaan.

Matiya to, tomenek ko sakipayso no sifo no mita, pado’edo to 6 miheca materek ci’osaw ko payso no sifo, masasiraoy ko finawlan, dengan o pakilac to sapi’aca a paya sacoker to kalali’aca, pakilac to payso, TRASS, misadadahal to sapadafoh picaliw to loma’, midama to sakahemaw no karetengay ’orip; misa’icel to sakalalen no tokay niyaro’ ko comahad, matongal ko pacefong ko kasairaay a macakat.

Misa’icel kita to picikeroh to “’Enemay tenokay sapilood a kinaira”, misa’icel pacefong to patireng to kanga’ayan, mapalowad malaheci ko kanaira to “kacitodongan milinah”. Tinako to ci’icelay a kakki ato ’icel no pisanga’, mala’a’olec pisafangod i polon no cikiw ko Taywan, malakacangotan no kasahirahira.

Orasaka, mafelih to ko sacecay sanay a kalali’acaan ita. O malitosaay to ’aca to nipasadak no mita to Amilika; anini saka 6 folad, malaheci no mita ko kasatelek to Amilika “Taywan Amilika 21 sici kalali’aca nikasasowalan” a katatelekan.

Pakayni 7 miheca a pikaomah, pasitimlay kitakit ko pasadak to kali’acaan, tadamaan ko pipalalan no mita; misa’icel to kalacalay to Europ, anini, Europ lekatep o sakacidama pacefong ko Taywan. O ’icel no kicay no mita ko sapahapinang i polong no hekal o caayay ko mamakotay ko Taywan.

Nai 2016 mihecaan i, o sifo ni Tsai Ing-wen o nano niketonan, midotoc to kanga’ayan; mi’imer kita to “Sepatay nido’ocan”, caay pilengat, caay pipahatalam, i pipecec caay ka kolomi, mikihatiya to polong no cikiw i nisakapolongan makakomod, malakapot mipa’ading to tomenek rihaday no sa’etal, o pipasadak to nga’ayay ’icel I hekal.

O katalafaliyos no kasatatapal, pahapinang kita to no tamdawan a mikasini’ada; o cimalonenay ko Turkey, tala’ayaw sakacecay kita; Russia ato Ukraine kalalood, micoker kita to Ukraine a tomireng. So’elinay to, caay kapawan no mita, toloay miheca a salifong, nisakapolongan a kapot masasidamadama to “koliyol a nga’ayay”.

Talacowa caay paterep ko pirawraw, nikawrira caay pahater ko rakat pasayra i hekal. Taywan Dipong kalahakelong caay kaselic, Taywan Amilika a kalali’ay matiya o ’ongcoy tanektek; o kalawidangan a kitakit ato harateng masasiingir to kitakit, o kasakitakit micoker to Taywan; nai romaromaay kitakit a kapah, i kasacefangan makakitikiting to “Viva Taywan”.

O kasapolongan ko kalata’angan no Taywan, malopatosokan no hekalay, caay ka ngiyangi ko Taywan, awaay ko kahinapecan i polong no cikiw ko kadadotoc comahad no nikapolongan, ato pahapinang to rihaday a kacemahad.

Paso’elin a tomenek, midotoc to sakacekal a rihaday no sa’etal. (自信沉穩，持續貢獻區域和平穩定)

Aniniay a Taywan, o no hekalan to a Taywan. Mapahapinang to ita, ano o maamaan to a sapilood, polong no nikapolongan a comahad, ano eca kasakitakit a milonolay, o nga’ayay piti’eran kita, o cikalamkamay, o cirihadayay a sakapot; micoker ko kasakitakit to ’icel no mita, ira ko marikecay a ’imeced.

Imatiniay mapolong kita, o cipaso’elinay a tanektek, misi’ayaw to hekal; ira ko tanektekay a pipaso’elin, misi’ayaw to Congko, o sakacowat ko sakiikor, patireng to sakatatapal o rihaday ko sakaka’orip.

O malacongtongay, o sikining no mako, o sapidipotaw to sakowan to kitakit, midipot to 2300 ’ofad finawlan no Taywan a nikapolongan ma’orip; nanoya, milongoc to sakanga’ay masarihaday a masasitapal, o finawlan, mapakoniraay awaay ko mipalitay, awaay ko karetengay kasasi’aliw; o Taywan to, ano o kasasitalan, o pasadakay to sakatomenek a rihaday ko sa’etal.

Miliyaw haca kako paini, “O rihaday ko papili’en a masasitapal, midotocay to kanga’ayan i kasasicowa a ta’akay nifacoan, o sapidamaaw to sakarihaday a safawah ko nihaenan.”

Mangalef, mahapinang to no polong no cikiw, kasasitapal no Tawan a riyar o sakatanektek no rihaday, caay ka awa i kasakitakit sakaraoy no syakay ato kacemahad; o cecay no kasatatapal caay ka nga’ay sapifalicaw; o kasacirid no kasatatapal o rihaday ko kasasisalof.

Orasaka, dotocaw ko pisa’icel, midama to niyah pikowan ato kasasipolong a mapakonira, masasitari’ang i so’elinay a likisi, midotoc patireng to tomenek a rihaday no kasatatapal.

Anini, adihay ko kakeridan no kasarekad ato lafang, maemin itini. O kalalifet no kasarakad o nikapolongan a sici ko nian, nika anini malekapot kita itini, o sanga’ayay nikapolongan a nengnengen i Taywan.

Minanay kako, ni kaherek to no singkiw, sawaden ita ko karokirok, mikilim to ta’akay kalacecayan i salaloma’an no Taywan, mapolongay faloco’ patireng to saniyaro’, marikec pasipapotal. Paso’elin kako, o caayay kasasiiked ko kasarekad, mapolong citodong to sikining no kitakit.

O kangalayan ita parana’an i kalacecay no finawlan i Taywan, masasitari’angan ko pa’ayaw, o kasasipolong ko sakalalicay no pido’edoan, pidotoc to kanga’ayan ko safaloco’en, o saki Beijing a kasasilayap to sakacowat a miparana’, o rihaday ko so’elinay a sowal.

Pakaso’elin kako, o picoker no kasakitakit a syakay micokeray to Taywan, mangalef mangalef ko ki’emel. O pinengneng i polong no cikiw, o pisa’icel to sakarihaday no Taywan haysya, lepetaw ita ko nia nga’ayay, mi’emet mikowan to katalawan, itiya o kasa’etal no kasatatapal o tanektekay rihadayay nipacakatan. O nian no kasarekarekad no Taywan, saki kasatatapal, caay ko laliyasen likisi a sikining ato kalacecayan sikining.

Midotoc tala’ayaw ko kitakit, pakayni i Taywan manga’ay ko hakal. (國家繼續前進，讓世界因臺灣而更好)

Finawlan no kitakit, ano masamaamaan i ’ayaw no 65 miheca a 823 kalaloodan, ano eca anini misi’ayaw to papotalay a pipatalaw a salifet, oyaan to ko pisaimeran, caay kasasiiked, o cecayay ko ’orip itni kanatal kohirateng.

Tahanini, Conghoa minko Taywan, o kalacecayan to no 2300 ’ofd finawlan ko nian. Oni kalacecayan, pasaopoay to kasasiroma no finacadan a likisi, ato 74 mihecaan a nga’ayay tatiihay a kasasiketan.

O citodongay koni to karikecan, o midipot to kitakit, midama to nikapolongan pakoniraay a ’orip no mita, mangalay masasiingid, misanga’ to ta’akay kasasitelekan.

O nikapolongan no Taywan, itiniay i laloma’ay papotalay a nipenecay ko sakasomelet, mapalahad to tanektekay ma’ikes. Midipot to kasapolongan no Taywan, o sakatadamaan no pidipot to kapolongan a nikapolongan.

Miahowid to karikec ita mapolong, pasipolong no hekal ko patedi to nikapolongan no Taywan; o cipaso’elinay ko paratoh to i hekalay tamdaw, o citari’angay cimikowanay ko tamdaw no Taywan, miparonoay to nga’ayay. Malipahakay i hekal ko tamdaw no Taywan, mido’oc malanikapolongan tamdaw, pakoniraay tamdaw.

Miahowid to finawlan no Taywan pafeli ci Tsai Ing-wen tosaay rekad, sakalacongtong no Conghua minko, mikihatiya to tamdaw no Taywan malakapot, nai faloco’ay ako ko piahowid.

Nia pinapina miheca, kanga’ayan ko nidemakan, ira ko caayay ka tatodong i faloco’; o kalacongtong, awaay ko pisorad to dademaken. O nian o kasapolongan no kitakit, citodongay to pikowan caay ko kalata’angan, o maanan a dademakan, o sakaraheked no finawlan ko nihaenan, o pisa’icel no sifo a patosokan ko nian.

Polong no finawlan no kitakit, paherekan no rekad ni Tsai Ing-wen i ikor no mihecaan i 520, nikawrira o mamidotoc tatala’ayaw ko kitakit.

Paso’elin kako, o masinanotay tomenek ko Taywan, o mamidotoc tatala’ayaw a romakat. Caay ka dengan o pipafeli to hekal ko nga’ayay no Taywan, o sakanga’ay no hekal i o nano nikapolongan no Taywan a fangcal.

Sa’icelen Taywan, sa’icelen Conghua minko, ahowiday mapolong.

Mifalicay to tilid. (翻譯者)

Ci Masao Nikar.