Taywan Kristo Ciwlo Kiwkay Cingaloan kiwkay

Taywan Kristo Ciwlo Kiwkay Cingaloan kiwkay (台灣基督長老教會鳳信教會)

O Cingaloan kiwkay itiniay i niyaro’ no Cingaloan no ’Amis finacadan a Kristo ciwlo kiwkay.

O Cingaloan niyaro’ itiniay i Fonglin cen Fongsinli a sa’etal. Cingaloan niyaro’ o nano nimatangan a fa’elohay paniyaro’an, nga’ayay kamaro’an ma’orip, nai Miacin a to’ek, ’ayaw no Ripon, nai Fata’an sa’etal mafolaw tayni to nian paniyaro’.

Itini i 1936 mihecaan, o nano Cingaloan niyaro’ a 17 ko mihecaan ci Cen Cin-cien, nai Fata’anay kiwkay ci ’Afang (Si Nan-min) a foksi ko mikeriday, misatapang pasifana’ to Ratoh. I 1940 miheca, ci Si Fu-cen singsi nai tiraay i Fonglin Kristo Ciwlo kiwkay a patenak, i paherek no kalalood no saka tosa no hekal itiya, o kadado’edo no pipatenakan to Ratoh, ci Si Fu-cen foksi sada’it cingra to fiyaway niyaro’ a tincumin, misatapang patenak to Ratoh a tayal, itini i herek no lahok to pa’aliwacan, patireng to no Ripon a sowal saki mitooray lihay.

Itiya ci Cen Cin-cien ato papinaay tamdaw tayra mikihatiya to nia sa’opo. Ikor, ci Cen Cin-cien, Lin A-yie, Huang Song-si, Lin Cin-lay, Kang Sin-long, Lin Ci-mi a enem ko tamdaw itira i Fonglin kiwkay, ci Si Fu-sen foksi ko pi’inoay cangraan, mala o mitooray to ci Yis Kristoan. Itiya i 1948 mihecaan i, ci Cen Cin-cien a papinapina itini i Cingaloan niyaro’ a laloma’an no mitooray, macaorecorek to loma’ a masa’opo. Nanoyaan caay katalaw to pilokes mikari’ang i cangraan, mi’imer cangra to sapi patenak to nga’ayay Ratoh ni Krisato, nanoyaan patireng to kiwkay cangra.

I 1949 mihecaan, nawhani matongal to ko mitooray, micaliw ko kiwkay to loma’ no ’Oping malo kasa’opan, itiya ira ko 30 no tamdaw. o kapah no Fata’an kiwkay mararid tayni i Cingaloan kiwkay a midama to tayal, mihomong to mitooray salikaka, itiya tangasa i rafas to 40 ko tamdaw. itiya i 1950 mihecaan, ci ’Afo (Kang Sin-long) masapinang ningra ko fa’edetay faloco’ no ’a;omanay mitooray salikaka, matongal to ko tamdaw no masa’opoay, nanoya masasowal to picaliw to sera, patireng to eli’ a kiwkay.

Itiya ci Papay (Ke Papay) tinkiwsi itiya i 1950 mihecaan itini i Cingaloan kiwkay mala tintosi.

I 1955 mihecaan, matakop no faliyos a maloyoh ko eli’ a kiwkay, o salikaka no kiwkay nai Kotofoki a Dawlik niyaro’ micolo’ to matelangay no loma’ a kilang, mala sapi patireng to kilangay a kiwkay.

Nanoyaan i, ci Looh (Wang Min-long) foksi tayni itini Cingaloan mipatenak, misahalaka ko salikaka mi’aca to sera patireng to fa’elohay kiwkay, mihayda ko salikaka i piwakayan no kiwkay, pacekil ko mama ato ina ni Talakong (Lin A-yi), ono niyah a sera litosaen ningra pacakat to malo patirengan no kiwkay a sera, nanoya salipahak sato ko ’alomanay salikaka no kiwkay, o ’alomanay salikaka ano eca o pionip, pipanay a lifon nangra pacakaten i kiwkay, ano eca ni pakaenan a fafoy, ato kayko a li’acaan pacakaten tayni kiwkay, malo sapatireng a kihi no kiwkay, oya mafana’ay mimokong a matayalay, papadapadang saan, masasipa’icell, oya fa’elohay a kiwkay itini i 1961 miheca 12 folad 23 romi’ad mipacakay to kansya a lihay itiya.

Piatapangan no kiwkay, o ka’emangay ko nisafaloco’an a tayal. I 1957 miheca, pafilongan a lihay marafas ko 40 tamdaw ko mikihatiyaay, i 1959 mihecaan mangalef marafas to 50 tamdaw ko mikihatiyaay. O kiwkay itini i 1959 miheca midemak to yociyin, nikawrira o kafalic to no syakay, pasi tokay mafolaw ko yincumin, oya yociyin i 1972 mihecaan paherek.

O kiwkay, “Kacomahad, pasasiyor, miwacayay” ko patosokan, nanay pakayni pilihayan madado’edo ko paini to sowal no Fangcalay Cudad, saka lima o tolonkay o pisapinangan to cudad a mikingkiw ato mitolon, ato cecay folad kina cecay kina tosa ko “Tarokos ni Kristo pinanaman to sifana’”, paromi’ad ko ciwlo sicoci ato kasakapot pinanaman, palahad to salo’afang no salikaka, saan miliso’ misasini’ada to miliyasay a salikaka.

Roma i, midopoh ko kiwkay to mato’asay ato ka’emangay a tayal, midehekatay Cingaloan kiwkay mineker midotoc i niyaro’, i syako patenak, mipatado, miwacay to Ratoh ni Kristo.

Pasayra to i malitengay ko kiwkay, ira ko 2/3 ko malitengay a tamdaw, macekel tariktik ko mato’asay sa’opo no kiwkay, macekel ko sa’opo no fafahiyan, o iraay ko sa’opo: mato’asay, fafahiyan, kapah, ato ka’emangay sa’opo. Palecaden ko mato’asay makikaka ko no kapah a sa’opo, mararid ko kalisaot, papolong han ko kacedeng.

I 2023 mihecaan 9 folad 1 romi’ad misitapang ko “Kongyin wenciencan” mapatireng, mala o kadademakan no kiwkay.

O mikihatiyaay a iying no kiwkay, polong ira ko 76 tamdaw, 29 ko fa’inayan, 50 ko fafahiyan. Kalosa’opo salongan ira ko 45 tamdaw, ka’emangay ira ko 10 tamdaw.

1.Kacefang no kiwkay:

Ciwlo, ciwlo ato sicoci, kasakapot (lihaypo, tintopo, kiwikopo, dafongpo, mitiyapo, demakpo, sini’adaaypo), o lihaypo misilsil ko (sikatay, paradiway, pahanaay).

Kiwikopo misilsil to (mato’asay, fafahiyan, kapah, ka’emangay, Kalingko sa’etal, kapah sa’etal).

Dademakay no kiwkay a cefang: Koangyin yofayof ato patireng to koangyin wenhua cienkangcan.

2.Kasarakad a tayal (ka’emangay, minanam to cudad, paradiway, kasacefang, ato romaroma) demakan.

Lihay 09:00-11:00

Ka’emangay 09:00-11:00

Saka tolo loma’ lihay 20:00-21:00

Saka lima tolon lihay 20:00-21:00

Kasa cefan sa’opo

Mata’asay cefang saka sepat ’ayaw no lahok 9:00-11:30.

Fafahiyan cefang saka sepat lipay no folad pilihayan harek no lahok 13:30-15:00

Kapah cefang sakapot (palakapi sa’opo)

Masakapahay saikoray lipay no folad saka tolo dadaya 20:00-21:00