Tafokod

tafokod （網罟/褡褳）

Tafokod hananay o tayal no fahinay kapah no pangcah mafanaay a tyra i talawadaw ato riyar a mifoting, halikaen to pangcah tona foting, saka mido’do to mato’asay a minocos mateneay a demak.

Ano mangta to ilisin i, fafahinay a tayal konini tayra i aloaloan mifoting, sakaen no po:long a niyaroen.

Itira:ho o orip no sapangcahay i, o minocos to mahaanay a demak, cacay ka tawalen ko mahaanay a demk, o fafahinay tyra i talawadaw mi konglen, sasifanay no mama no kapah mahanaay a demak.

Pi’arawan to lakaw

Sowal no mama fuya na i koyo a niyaro a tamdaw http://www.amis.org.tw/

O nikafana' no Pangcah/Amis to tafokod ato no lekakawa a pifoting: Faco no masaPangcahay/masaAmisay, fana' no seraserayan, ato no lekakawa a pala

Sakacecay: Siwkay

Itini i no Taywan a finacadan i, o Pangcah/ Amis ko finacadan no riyar, kacinganganan i matasimay a selal, misa'alingayay no ina ato sakacifana' to riyar ato tarawadaw. Itini to  i pasawali laeno no lotok mililisay to riyar ato i satimolan no Tayawan ato i masadafdaf no Kalingko ato Posong ko masaPangcahay/masaAmisay, mikiriyar ato mikitarawadaw a ma'orip, matenetenesay a misoped to fana' no leno^ ato kerah, ato rakat no foting. O tatapangan a sapifoting no kapah ko tafokod, o nipifolesak ato nipisolimet tona tafokod i, o pipatodongan to nikapalada' to dafong no niyaro' ato nikarikec no finawlan. O lekakawa no pifoting no Pangcah/Amis i,  matae'elifay to saka'orip no finawlan, macakat ko pipadoedoan to lekakawa, tatayalan no kapolongan ato sakati'er to kawas. O tatapangan nonini a pikadkad i, pakayni i tatayalan no niyaro' ato masasipadang no finawlan a mipahapinang to lekakawa no pifoting, to nikapadefong to saka'orip no Pangcah, piilisinan a kaitiraan ato fana' to seraserayan.

Sakatosa: O nikalalen no tayalan no kapah ato limecelan i faco no finawlan

mahapinang ko lekakawa no pifoting to tafokod, o nika o fa'inayan ko mikeriday to selal to mifoting, saka mikadakad to rayray no masaPangcah/masaAmisay. O masatosaay ko lalan no masaPangcahay/masaAmisay: O no fafahiyan ko mikeriday to ngasaw ato midotoc to dafong, o no fa'inayan a kasaselal ko mikeriday to tatayalan no kapolongan. O kasaselal no niyaro' i, misasa'er to fa'inayan nani pakarongay tangasa i kalas a misasilsil. O matayalay to tatayalan i 'ayaway ko kapah, o mamacakatay ko ma'ikesay a kapah to mama no kapah ato cinganganay a kalas, mata'eliay to pinapina a mihecaan i, ta misaselal to, saka masarikecay ko kasaselal. Sapipa'oripaw ato sapipasimawaw ko masaPngcah/masaAmisay to niyaro', mapatireng ko sakacirikec no kasaselal, masasiketay to misa'alingayay no ina a lekakawa, saka masatosaay ko lalan no lekakawa no masaPangcah/masaAmisay. O matiniay a lekakawa 'i, o sapipalalen to ci'icelay a fafahiyan i misa'alingayay no ina a lekakawa, o sapipacakat to fa'inayan pakayni i pi'emet to demak no niyaro', ta mapatireng ko tata'angay a ngangan. Saka i tarawadaw ato riyal a mifoting ko tafokod, mipatomecekan to tatayalan no kapolongan no fa'inayan ato lekakawa. Citodong a mipolita to rakat no nanom ato kaitiraan no fotifotingan, o matiniay a taneng i, saheto o i tatihi no mato'asay a minanam to pinapina a mihecaan, ta maala ko matiniay a taneng, saka o kananaman no mitafokod i, to pipahapinang to cingangan ato nikafana' no fa'inayan i niyaro'.

Sakatolo: O lalosidan no lekakawa ato fana' to sapisanga' ko kasasiikeiked no fafahiyan ato fa'inayan

O lalosidan no lekakawa no masaPangcah/masaAmisay i, midoedo to lekakawa no fafahiyan ato fa'inayan, sakacaay kasawad to lekakawa no niyaro' ato sapatanetek to rikec no niyaro. O misakoreng ato misalosid(o teked no fafahiyan): O fafahiyan ko citodongay a misakoreng, misanga' to sapitangtang ato sapisalisin a kasasiromaroma a lalosidan. O misatorik ato sapirepet to foting( o teked no malitengay a fa'inyan): Tadamaanay ko fana' to misatirik to lalosidan, saheto o malitengay ko citodongay, misanga' to fakar, rakar ato masamaamaanay a sapirepet to foting. Oni a kasasiiked no tatayalan i, masapadapadangay ko kapah a mifolesak to tafokod i 'ayaw ato malitengay a misanga' to sapirepet to foting i ikol, saka maliteng to ko tireng no malitengay i, pado'edo ho o tatapangan no mipalowaday to tayal.

O nikalariting no lisin to misaloma' ato piforting: Ira ko matalolongay a kalalitilitingan no lisin i misaloma' i pala ato pifotimg i 'alo. Tinako sa, o lekakawa no to'as i, malepon to ko pafafoyan i tihi no loma' i, cakaeca tayra i 'alo a mifoting ko fa'inayan, o sapisalisin a mipakelang to nikaleponan. O matiniay a lekakawa i, pahapinang to pinang no Pangcah/ Amis, o pifoting hananay i, caay ko piala aca to kinaia a nanam, o nikalaliting no lisin to lekakawa no dademakan, pafalien ko nikarorayan a lisin, caay ko sakapafecol to tiyad aca.

O misacepo' i: O nikapahapinang to lekakawa no kasaselal i demak. O misacepo' hananay a lisin i, itiniay i sakalima a folad tangasa i sakafalo a folad to midemak, o sapalemed, o sapirikec ato o sapipalaliting to tamdaw, ato pipatomecek to 'icel no kasaselal. Caay pacefa a miketon to lisin a romi'ad, o mitooray to  palapatan, tinako sa , itini i sakalima a folad, ira ko fakici, kakaho ato fowa a masadak, matatodongay ko pifoting a romi'an, saka malalitin ko lisin ato seraserayan. Itini i misacepo' no masaPangcahay/masaAmisay i, o kasasiiked no tatayalen ato pisalilam to kinaira i, mipahapinang to micidekay a lekakawa no nikalaliting no tamdamdaw. O matiniay caay kahecad a kasasiiked i, o sapilifeten to pidoedo no kapah ato pingodo to malitengay. Nikaorira, o 'osaw no malitengay a foting i, mipahofi to ciicelay a selal ato pakalongay a pakahemek. Oni a pisalilam to kinaira i, mipalafangcal to nikalaliting no kasaselal, saka mala tadamicidekay a lisin ko misacepo' no Pangcah/Amis. O pipalada' no malitengay i, o sapipahemak ato sapipaini a sowal, saka caay ko nikalaan to foting aca ko nipafelian, o pakahemek aca to kasenngan i 'ayaw no alomanay. Oni a pakahemak hananay i, o nipinengnegnan no Pangcah/Amis to kasengan no kasaselal i, ira ko sapicoker, sapipa'icel to faloco', saka  pakaolah to nikarotengan a selal a parayray.

Saikolay

O lekakawa no pifoting no Pangcah/Amis to tafokod i, o masasifoday a nikarariting no finawalan ato seraserayan. Pakayni i tarawadaw ato riyal ato i pala a midateng a fana' i, mapatireng no Pangcah/Amis ko teked to kakaenen. Itini i pikinengneng no aniniay, mikadakd to kalimelaan a fana' no malitengay to pifoting, pakayni i picoker to serangawa  ato padoedo a pidipot to seraserayan i, ma'emin ira ko satadamaanay a 'epoc no pikingkiw ato pipademak. Saka o nikafana' no Pangcah/Amis to tafokod i, caay ko taneng aca no pifoting, o nikalaliting to finawlan ato seraserayan a mipatireng to masasipadang a pinangan. Oni a harateng i, o tadakalimelaay a harateng.