O niyaro’ no Falaysan

O niyaro’ no Falaysan (女人國)

Iti:ya ho, ira ko cecay a romi’ad, tayra mikasoy i lakelal ci Sadafan hananay a tamdaw.

Nanoya i, adihay to ko mipodpodan ningra a kasoy. Paka dadangoyan ningra a panokay koya kasoy, macedas ko nanom ’alo itiya, tadacaay ko kalidkid, saka caay to pakafilo cingra a talahekal to pinokayan, mapafesoc a malikid cingra tayra i riyar. Matalaw to o mamapatay kako i riyar na saan.

Pinaay to romi’ad ko kalikid a mapawpaw i tenok no riyar, o no kawas a nipacahcah cingraan i niyaro’ no Falaysan, talapi’elal cingra itiya i, “Aya:, iowaay to kako i matini hakira?” saan a misahiraterateng. Saan ho ko piharateng ningra i, ira t ko Falisan a tamdaw milepel i cingraan. Itiraay sato a niyaro’, “O maan a tamdawan ko matiniay o ci polotay?” saan cangra ma’emin a mafahalen minengneng, (O polot hananay, o panga ko han), sawal sato cangra ma’emin, “Ano matira, pahafayaw no mita, ano maso’so to i, todohen ita.” saan, masa matira, misanga’ to pirofoan ci Sadafanan.

Sakapah han nangra a misanga’ ko rangat, matalaw pilaliwan ni Sadafan. Na saan i, sa romi’ad han to a pahafay no Falaysan.

Araw han i, o roma a folad, ci faloco’ koya pahafayay i ci Sadafanan, saka tayra cingra to lafii a mafoti’. Caay ka halafin i, cipoyapoy to kiya fafahiyan. So’elinay, masofoc to cingra o fa’inayan koya wawa. O finawlan sato no niyaro’, mafana’ to nika sofoc noya fafahiyan, tayra a ma’emin a minengneng toya wawa, “O maan ko matiniay a ci polotay a tamdaw?” saan a ma’emin a maapa. Katatengtengan han to a ma’emin koya panga niya wawa. Na saan i, adada ato sakapatayan koya wawa.

Ci Sadafan sato i, maso’so’ to, “Anini, maedeng to a patayen kina fafoy no mita.” sato koya Falaysan a masasowasowal.

Ci Sadafan sato i, pakatengil toya sowal “a patayen to cingra” ya sanay. O roma ko talaw ningra, a samaanen ako a milaliw saan cingra. Maraod sato ko kalafian, oya citodongay pakaen cingraan i, simeden nira i kakaenen, nengneng han ni Sadafan, o po’ot, salipahak sato Ingra. To’eman to ko dadaya to lafii, ma’emin to mafati’ ko Falaysan, rara sato mifahat mi’owal to pilaliwan a dihif ni Sadafan, nanoya masadak cingra toya pirofoan cingraan i, sakalamkam sato a milaliw. Pasayra mikecor to ka’etip, manengneng ningra ko ’ongcoy i tenok no riyar. Safaloco’ sato cingra, “Ano caay ka kalamkam miliyas itini i, o patay to.” saan cingra, saka milaliw to pasayra i takaraway ’ongcoy, kinapatay sa a macokacok, itiya mikinaca’ekod pasayra i riyar, midangoy tayra toya manengnengay ningra a ’ongcoy i tenok no riyar.

Tahira cingra i, macakat tayra i tongroh noya ’ongcoy, pasiwali sa ci Sadafan minengneng to niyaro’ no Falaysan i, ma’emin ko tamdaw a mikakilim i cingraan.

Harateng sa cingra, tado ko pilaliw toya katalawan i, ano miliyaw macepet kako i, o patay to, saan cingra. Misahiraterateng cingra, mararom ko faloco’ nongra, tano losa’ sa ko fa’inayan.

Na awaayay ko pafaloco’an ningra itiya, manengneng ningra i ngata noya ’ongcoy ko tata’angay a ‘Iso. Milicay ci Sadafan: “Mamanay kiso tomangic itini?” han nira, paca’of han ni Sadafankoya ’Iso, “O milaliway kako to Falaysan, namapalit nangra kako. “Amaanen ako a talaloma’ hakini?” han to ni Sadafan. Sasini’ada sato koya ’Iso ci Sadafanan. “Ano matira aca, pifafa i koror ako, a panokayen ako kiso. Orasaka, ano awaay ko sasela’an no miso, kalat han ko tangila no mako haw.” han to noya ’Iso. “Hay.” han to ni Sadafan.

Saka medok sato a midangoy. So’elinay, kina tolo a talahekal koya ’Iso a pahanhan ci Sadafanan, caay ho ka tenes, tangasa to i niyaro’ ni Sadafan. Tangasa sato cangra, palita han ni Sadafan koya ’Iso, “Cima kiso?” han ni Sadafan, “Hay, kako ci Maciwciw hananay, o pa’oripay kako to kapahay ko faloco’ a tamdaw.” han to nira ci Sadafan, “Ah, o kawas aca no riyar kiso, anini sato, mapatangasa no miso kako i niyaro’ no mako, a caay to ko mamapawan kako ti napa’orip no miso.” han to nira itira i ’a’ayaw no kalacinowasan nangra.

Parikor sato ci Maciwciw a somowal, “Ano misalisin kamo o niyaro’ ka ci ’ayam to fohecalay, cecayen aca, o hemay han to i, limaen a tafo, ka o fala’ no fafoy ko roma haw.

So’elinay, do’edo han to no niyaro’ a misalisin ko nano sowal, ci Sadafan sato, sowal sato to paro’ no loma, “Ano mapatay kako alaen ko fesi no mako patayra i riyar a paratoheni ci Maciwciwan.”

So’elinay, mapatay sato ci Sadafan, do’edo han to no i loma’ay ko sowal nira. patayraen ko fesi ningra i riyar, iraan ko saka kahecid ato kangdaw no riyar. Nano fesi ni Sadafan saan k sowal no mato’asay.