O kimad no Iwatan : lotong ato ’alem

Itiya ho, itini i lotolotokan, ira koya malaidangay a lotong ato ’alem, saromi’ami’ad sa a misalama. Ira ko cecay a romi’ad, malacafay to kina lotong ato ’alem a tatosa, oni sa a mamenacay a lotong pasowal toya idang ningra toya a ’alem: “misalama kita to malalimekay a lawla manga’ay to?” han nira, paca’of sa koya ’alem: “Hayda, manga’ay to.” O nga’ayay awaayay ko tatiihay harateng no ’alem, saka, o maan ko ni sowalan no lotong i, hai saan a caay pina’ay. Pasowal sato kiya lotong: “Cimaay ita ko ’ayaw a milimek hakiya?” paca’of sa koya ’alem: “Kisoay ko ’ayaw ari.” asowal koya lotong: “Matayoay ko wakawak iso i, kiso ko ’ayaw saan kako.” han nira. Paca’of sa koya ’alem: “nga’ay to.” sato. Nanoya misa’osi to koya lotong, cecay, tosa, tolo,…. Tahira i semo’ot, oya sato a ’alem to no nira i, ana a matakop no lotong kako na saan i, pasayra i semosemotan a milimek.

Micomod i semosemotan koya ’alem i, harateng sa cira, ano haen asa ranikay matama kako, kao pikarkar ako to sera a dihif, itira kako i dihif a milimek, nanoya o tariktikay a cisakorihay a waay nira i, sakalamkam sato a mikarkar to sera misadihif, itiya itira a milimek.

Maherek a misa’osi to sema’otay koya lotong i, pasayra to i semosemotan a mikilim toya ’alem, safaloco’ sa, oya ka’acekan masakawilihay nengnengen a ’alem i, tanamaw ako, hakowaay ko fana’ nira to kacaloway ako saan, miala to cira to lamal, todohen nira koya semosemotan, salata’ang sa pasowal: “Dadada, kasadek.” saan. Matodoh to koya semot i, awaay manengneng ko kasadak a pilaliw noya ’alem, tangasa kaleponan a matodoh i, awaay ho masadak a manengneng, mangalef ko lata’ang noya lotong.

Nikawrira, ikor no nian mafana’ay koya lotong to pilimek no ’alem i dihif no sera, awaay ko maan to nadoka’an, ma’inget a ma’ingtel ko falaco’ nira. Pado’edo oya ’alem to ko misa’osiay to pilimek noya lotong i semosemotan to cecay, tosa, tolo,… tangasa i semo’ot, maherek koya ’alem misa’osi i, matira to mitatoy koya ’alem to lamal mitodoh pasayra i semosemotan, nawhani mafokil ko lotong a mikarkar to sera a misadihif, nanoyaan sa matodoh a mapatay koya lotong.

Halisakemotay ko lotong to romaroma a ’a’adopen. Malahakelong tala lotok mikasoy ko lotong ato ’alem. O na caay ho pikasoy ko ’alem, pasowal sa toya lotong: “Kaka a lotong, caay ho pikasoy kako, pasifana’en kako ari.?” han ningra. Manengneng no lotong koya ci cekaay a kilang, sowal sa: “Tayra kiso fafaed no nia kilang, ira itira ko kasoy.” Paso’elin sa koya ’alem to sowal nora a lotong, tayra tora a kilang a mikasoy. Nanoya, laya’ sa ko kamay toya kilang, ’emin sa macocok no ceka ko kamay, saadadaen sa a mifikfik to kamay, tano cala’ sato. Tano tawa sato koya lotong i tatihi.

Mafana’ ko ’alem to pisakemot noya lotong i cingraan. Nikawrira ’emet han ningra ko adada a misatawatawa, do’edo a malahakelong to lotong a mikasoy to palawilaw. Maherek miala to palawilaw i, pasowal sa koya ’alem: “Kaka a lotong, ’ayaw no kakomaen ita to palawilaw i, tayra ho kita i fanaw a mingingoy, malalifet kita cima ko halafinay i nanom.” han nira, mafokil to nanom koya lotong, nika samalata’angay sa, paca’of sa: “O pingingoy i, kako ko halafinay i nanom.” saan, ca’ekod sa micelem i nanom, caay pahoda ira to a masadak. Pasowal sa koya ’alem: “Kakoay to ko micelemay, hadidi han kaka ko pitala takowan.” O macelemay ko ’alem i nanom, ca’ekod sato i nanom, naitira i lalinik no nanom, ira ko dimok saka tayra ci palawilawan itira, itira to cira a komaen, nanoya, pakayra haca toya a dimok patiko, masadak nai nanom.

Maherek a mingingoy i, macahiw to koya lotong, malahakelong a patiko a komaen to palawilaw. Oya sa a lotong sahalafin sa i palawilawan a mikilim to kakaenen, awaay makilim nira. Makalah to cinira a misawaliwalin, madoka’ to ko kamay a maremes, caay ho pakakilim to palawilaw a tali. Oya sato a ’alem i, tano tawa sato matiya o lotong i tatihi, itiya to mafana’ koya lotong a masamangah.

Mifalicay to tilid no ’Amis, ci Masao Nikar / mipacomoday i wiki ci Iyus.