O kimad no Iwatan : ’alem

O kimad no Iwatan : 'alem

Saheto o ’atekakay a cikaf ko tatirengan no ’alem, matiya sapidama to tireng a riko no sapilood. Ci’icel ko saripa’, matalem ko sapikorafis a misarefong to sera. Nika miasimaanay ko demak no ’alem, nawhani o pisarefong nira sakatatiih no ma’oripay i lotokay a kilakilang.

Toya romi’ad, tahidangen no ’alomanay koya ’alem, misatamdaw i cingraan. Oya lotong ko sa’ayaway pasowal, mainget to ’alem, pasowal sa: “Pakomaan sa kiso to pisadefong, misadefong sa tahira to i pahanaan no mako, makari’ang to ko makapahay a hana, misatatiihay kiso takowanan sa.”

Mainget koya ngafol to ’alem, sowal sa: “Misadefong sa kiso, tahira to i potal ako, talifahal sa masadak i defong, pacekok ko faloco’ ako, o maan ko matiniay.”

Pasowal sa ko eco, sanawanawang sa midefong ko ’alem a lotolotokan, alatek makari’ang ko lamit no ta’akay a kilakilang; oya sato a takolil (kodiwis) i, maketer to pisatalimaamaan no ’alem, o katalawan a mari’angay sa to demak no ’alem, maingtel ko ’alomanay, nanoya ma’emin a mihai ko ’alomanay to pilaplap to ’alem i lotolotokan itiya.

Samaamaanen to noya ’alem paini to sapi’ading cingraan i, caay to pitengil ko ’alomanay. Samaanen ho sato koya ’alem i, liyas sato to lotolotok, itira sato i katalawan a ’apilipilisan ma’orip.

Miliyas to ko ’alem to lotolotokan i, sanga’ay satoko aro’ no ’alomanay, matamaay to ko demak no mita saan to cangra a masasowasowal. Nikawrira, ikor to no romi’ad i, masapinang to nangra ko ka’aloan no ’a’ayad i lotolotokan, oya nga’ayay a kilakilang lesap sato a sakapatayan.

Oya fangcalay ka’oripan no finawlan i, makari’ang to no ’a’ayad, rarawraw to ko ’alomanay. Sa cisowal sato ko lotong to finawlan: “Malihiway koya ’a’ayad, mimokmok cangra i tapangan no kilang a misadihif, caay ka filo a mipacoli. Kakaya’ ko sema no ’alem, cingalayay, oya i dihidihifay no kilang a ’a’ayad i manga’ay nira makaen. Kalimelaan away to cingra i lotolotokan.”

Oya sato a ngafol i, sowal sa: “O mafana’ay misarefong ko ’alem, pahoda ko demak nira mipalasawad to itiraay i tapangan no kilang a ’a’ayad. O kakalimelaan malaplapay to no mita ciira nai lotolotokan.”

Pasowal sa ko Iso: “Talacowa falitfit ko demak no ’alem, nikawrira o pikarkar nira a misadihif caay ko padetengan nira to saki titaanan, ’arawhani o pikakilim nira to rakat ato kaitiraan no ’a’ayad, o sapidipotaw nira to lotolotok. Rorohen aca no mita cira.

Itiya mahiratang to no finawlan ko ’alem, ala sowasowal to nga’ayay mafana’ay komaen to ’a’ayad sato, o midipangay to lotolotok a kawas sato. Nanoya miketon to ko ’alomanay mili’ay to ’alem, mitahidang to pipatikoaw cingraan.

Patiko to tayni i lotolotokan koya ’alem, mipatala to sapihamham i cingraan, patodong sato to “Midipangay to lotolotok a kawas” sa ko pakompay. O cima ko mafokilay to demak no ’alem o mitekopay to ’a’ayad ko tayal ningra, pakayra cingra i dihif a masadak pasowal sa: “Ma’eminay ci todong kita mapolong to pidipang to lotolotok, misa’icel to kita i manga’ay to. Mana’ay kako to kompay, nika mangalay kako to kafana’ ato pipalecad namo. Ano ira ko tatiihay a pisarefong no mako i, li’ayen to kako.

Mifalicay to tilid no ’Amis, ci Masao Nikaw / mipacomoday ci Iyus.