O 'orip no i tokayay a 'Amis

O ’orip no i tokayay a ’Amis(都會阿美族)

O ’Amis hananay a tamdaw , o ’Amis hananay a tamdaw , o matayalay to romi’ami’ad caayay kataraw to cidal ato ’orad , hi yo ho hay yan , micekiw sa i riyar , mikalang i ’alo , lipahak to romi’ami’ad . o kafana’an no nimanima konini a radiw , malamaan ko ’Amis i pisitapangan no pi’ilisinan , caayay katawal no misa’Amisay a romadiw , tadafangcalay a radiw koninian , pakayni i imi nonini a tilid no radiw i , mahapinang to no mita o mafana’ay ko ’Amis a milipahak to ’orip , o misawidangay to piserayan a finacadan , o misa’icelay o malalokay i tayal a tamdaw cangra , tadamahapinang to no mita tonini a tilid no radiw , mansa miliyas i pinaloma’an a niyaro’ ko ’Amis i , tayni i pisiyakayan i mahaen aca ko ’orip ato demak no misa’Amisay .

I ’enem a polo’ ira ko pito a mihecaan ko ’Amis a misitapang a miliyas to pinaloma’an a niyaro’ , tayni i ’etip ato i timol a kitakit a misiyakay . o mingataay to adihayay a katayalan a kitakit ko kasa’opuan no ’Amis , o kasa’opuan no ’Amis a kitakit i , mapulong itini i Taypak、i Kilong、i Tawyin、i Tayciw ato i Takaway a kitakit , o misakiliay、o mifutingay、o misamukongay、o misatikingay、o misatinkiay、o patirengay to loma’ ato parakatay to ta’angayay a tosiya , taheto o kalihanawan ato kuli kalacemceman ko tayal no ’Amis , o mafana’ay a masa’opu’opu a maro’ a ma’orip , o makaciselalselalay ko kasakaput no ’Amis hananay , mansa mapakangangan no finacadan a tamdaw ko ’Amis『o tokay Yincumin』han nangra .

Ano hatini i , o ’orip no ’Amis i tokay i , taheto o miesuyay to loma’ , o roma i micakayayto to loma’ ko aro’ nangra , ano mahaen o tudong to o sakatosa a niyaro’ nangra ko kamaro’an nangra imatini , nawhan ’awaay to ko ’omah ato loma’ ato sera ato mato’asay i niyaro’ , kamahaen sa’osi han ko mihecaan i , tolo a polo’ ira ko tolo a mihecaan ko piliyasto napaloma’an a niyaro’ a tayni i ’etip , toloayto ko rayray no silsil no laloma’an no teloc i tokay , icuwaho ko pakayraan hakiya , pakayni i sici、i sifo、i kicay、i siyakay、i serangawan、i kioyiko、i yosang、i salongoc、i niyahpikowanan , taheto o tasalamaan no pisingkiwan no sici apiw ko ’Amis ato finacadan , sasakaniw han no sifo ko kita , ’araw han ko Linpuying no Yincumincu masafa no Tan ko faloco’ nangra , ’awaay to a pasitini i Yincumincu ko paifaloco’an a miliclic a milicay to sakairaaw no Yincumincu .

Mahaenay ko kacango’ot no kakelidan no Yincumin , masafa a masafa no Payrang kita , nawhani o rarongocen ko faloco’ ato haraten no pulong no misa’Amsay , talipaerawayto ko faloco’no mita saw ？ macengawayto ko mata no mita saw？kalamkamento no mita a palowad ko nano tato’asan a fana’a patenak i Taywan.