Mama Intiw

Mama Intiw (涂恩綢)

O pitoor no ’Amis a tamdaw ci mama Itiw (阿美族人涂恩綢（Intiw) 的歸信)

Maraod to ko 100 mihecaan ci mama Intiw (Tu enchou) ciwlo sarakatay a mitooray no yincumin a likisi i Taywan nai 1916 miheca, ’ayaway yinciw no Yusan sinkakoyin ci Namoh Rata misilsil cingra to mitooray no ’Amis a tamdaw ci Intiw o lalowadan no likisi.

Midotoc to no kaDuipongan to’ek Tokar kiwkay (Ciamisan kiwkay no Tongpo ciwkay) a tilid masowal, ikor no pipaino’ ni mama Intiw ciwlo i, nano mala sicuci mala ciwloay to, mipasifana’ to mitooray no ’Amis a mifalicay t osowal, malakapot ici Afang Titay foksian to pipatenak i no ’Amisan a todongan.

Pasowal ci Namoh Rata foksi, aniniay tamdaw a mifana’an to likisi no pipatenak no ’Amis, itira i 1931 miheca tayraay i Tansuy Niwcin (Oxford) pitilidan a mitiliday tamdaw, i 1934 miheca maocor tayra i Fata’an “Sa’ayaway foksi no ’Amis” ci Afang Titay. Nikawrira, ci Afang Titay o nano Kavalan finacadan tamdaw, o fafahi ci Panay o Sakizaya a finacadan tamdaw, i ka Dipongan a to’ak oni tosaay finacadan saki sician a piseyek pala no ’Amisan, nika anini mipangangan miliyas to ’Amis finacadan. O paretatengaan ni Namoh Rata foksi i, “pahapinang to kafiyol to ’Amis to saki hamon nangra.”

Midotoc to matiliday i likisi no Tokar kiwkay, sarakatay mitooray no ’Amis a tamdaw, so’elinay onini paino’ay ’Amis tamdaw ci mama Intiw. Pakayni tonini kacaciyawan, mikeroh ci Namoh Rata foksi to ’Amis ciwkay, o paino’an ni mama Intiw i saka 10 folad 22 romi’ad patodong han ko “Paso’elin ci Kristoan no ’Amis” piharatengan romi’ad, telek han i 1931 mihecaan “Pipatenakan piharatengan miheca”, o sakafana’ no finawlan to likisi, padoedo mikilim to so’elinay likisi.  

Mi’eses ci Namoh Rata foksi, o kafiyol to no to’ek ci mama Intiwan, mikadafo cingra to Tangafolan finacadan, o no Payrang ko pipangangan mitilid. Nika midotoc to likisi a tilid no Tokar kiwkay, nai 1921 miheca miteka malaciwlo to 20 no mihecaan ko halafin, o mato’asay no kiwkay itiya, ’aloma ko mafana’aty cingraan o ’Amis a tamdaw saan.

Ci Kolas ko mama, ci Nangi ko ina ni mama Intiw ciwlo, masofoc cingra i kaDipongan i 1877 miheca i Tikay niyaro’ (aniniay Sanmin no Posko), 18 ko mihecaan ningra itiya, malinah nai Tikay tayra i Tokar niyaro’, misa simalay to no Rakes a kilang ko tayal, nanoyaan mikadafo cingra to Tangafolan a fafahiyan, o teloc a wawa ningra o salikaka no Takoliaw kiwkay.

Caay ka dengan o pipatenak likisi sarakatay no ’Amis finacadan ci mama Intiw ciwlo, o mimicowatay to kiwkay cingra. I 1948 miheca, ci mama Intiw ciwlo ato ci Afong Titay foksi malahakelong cangra tayra i ’adawang no Takoliaw niyaro’, o pihayda patireng no Tokar kiwkay ci Asing (Lin Qingji) ciwloan a lihay. Ci Asing (Lin Qingji) ciwlo i 1949 miheca mapatireng kakeridan no Takoliaw niyaro’, caay pitolas patenak, saka o saka tongal no ’Amis a tamdaw mikihatiya i Tokar kiwkay, ato tangasa 1955 miheca, itiniay tio i ’Amis ciwkay ko Takoliaw kiwkay. O toloc ni mama Intiw ciwlo saheto o salikaka no Takoliaw kiwkay, mirocok i wawawawa ko nitooran.

Mama Intiw (涂恩綢)

Semo^otay miheca a paso’elinay pipaino’ mala sarakatay misinting i no ’Amisan. (受洗歸信百年 阿美宣教先鋒)

Maraod to ko 100 mihecaan to nano pipaso’elinan a mitoor to Kawas ni mama Intiw o ’Amis a tamdaw sarakatay mitooray no yincumin a tilid likis no Taywan. Itini kalalicayan mipaini ci Namoh Rata foksi to pipatenak to ratoh i niyaro’ no ’Amis to saki ci Intiwan parana’an no likisi.

Midotoc to no ka Dipongan a matiliday i kiwkay no Tokar ( Ciamisan aniniay), ikor no pipaino’ ni Itiw, itini i Tokar kiwkay mala hicoci ato ciwlo, mala mifalicay to mipasifana’ay i mamicomod a ’Amis tamdaw, milecad to citodongay to misintingay no ’Amis ci Afang Titay itiya.

Piini ci Namoh Rata foksi, aniniay tamdaw o pisatapangan patenak to ratoh a likisi no ’Amis, patodong sa itiniay i 1931 miheca tayraay i Tansui Niwcin (Oxford) pitilidan minanam to sifana no Kawasan, i 1934 mihecaan maocor tayra i Fata’an a “Sarakatay foksi no ’Amis” ci Afang Titay (Xu Nanfeng) . nika, ci Afang Titay o nano Kavalan finacadan, o fafahi ci Panay o Sakizaya finacadan, I ka Dipongan to’ek pikowan onini tosaay finacadan o no sician pitelek pacerohan palakapot no ’Amisan, nika anini mapatikoay ko kacingangan miliyasay to ’Amis.

Midotoc to nitilidan likisi no Tokar kiwkay, sarakatay misintingay no ’Amis a tamdaw, ona sarakatay piino’ a ’Amis a tamdaw ci Intiw o han to. Onini kalaliyangan, pa  to ’Amis ciwkay, ka itinien i paino’an romi’ad ni Intiw 10 folad 22 romi’ad ko pisetek to “Pipaso’elinan no ’Amis ci Kristoan” piharatengan romi’ad, oya 1931 miheca teleken ko “Pipatenakan piharatengan miheca”, patodong to sakafana’aw no finacadan to likisi, padoedo mikilim to so’elinay likisi.

Paini ci Namoh Rata foksi, ci mama Intiw o nano kafiyolan no to’ek, mikadafo i malapayrangay to a Tangafolan finacadan, ono kowaping to ko kacingangan. Nika midotoc to nitilidan likisi no Tokar kiwkay, ci mama Intiw nai 1921 mihecaan misatapang mala ciwlo to 20 mihecaan ko lafin, laloma’an no kiwkay a mato’asay itiya, ’aloman ko mafana’ay o nano ’Amis a tamdaw cingra.

O mama ni mama Intiw ci Kolas, ina ci Nangi, ka Dipongan a pikowan to’ek 1877 masofoc i Tika (Sanmin no Posko anini), 18 ko mihecaan itiya, nai Tika malinah tayra i Tokar, mitangtangay misasimalay to rakes ko tayal itiya, saan mikadafo i laloma’an no Tangafolan finacadan a fafahiyan, o teloc ningra o mitooray salikaka no Takoliaw kiwkay imatini.

Itini i pipatenakan likisi no ’Amis caay ka dengan sa’ayaway ci mama Intiw, o micikerohay i misadadahalay to kiwkay. 1948 miheca, ci mama Intiw aci Afang Titay malahakelong tayra i Takoliaw a sefi no niyaro’, mihayda ci Asingan (Lin Qingji) to pala ono Takar kiwkay a salikaka kansya lihay. Ci Asingan (Lin Qingji) macikero pala kakeridan no Takoliaw niyaro’ itiya, caay pitolas mipatenak to ratoh itiya, saka pakayni cingraan ranikay sa matongal ko tamdaw no ’Amis mikihatiya to sa’opo i Tokar a kiwkay, tangasa i 1955 miheca, mapatireng ko ’Amis ciwkay to masofoc ko Takoliaw kiwkay. O teloc ni mama Intiw sahato o salakaka no Takoliaw kiwkay, a mirocokay to nipaso’elinan.  

Mama Intiw （涂恩綢的記述）

20 sician sarakatay mitooray a tamdaw no ’Amis a tilid (記述20世紀初阿美族入信的先驅)

Ano sowalen ita ko “mama no pitooran’’ i, mahirateng i telangay Fangcalay Cudad a tamdaw ci Apraham, nawhani cingra ko mikriday to pakifaloco’an no ’orip no tamdaw. Anini, masowal ita ko pipatenakan no ’Amis i, caay ka nga’ay a malawa ko cecay a mitooray a tamdaw no ’Amis – ci Intiw a ciwlo, nawhani pkayni i cingraan, itiya i 2016 a mihcaan, ira ko todong no picomod to pipaso’lin to smo’otay mihca a kansya lihay no mita.

Ano pakaynien to nitilidan i, nai 1916 a mihcaan, ira ko no ’Amis a tamdaw ci Intiw i Tokar (nano kuan-in-san, cya-mi-san) a kiwkay, itira a misatapang a kalokiyolan no ’orip ningra. Itini cingra a micomod, paso’lin to Tapang a pasingli, a malamitoorayto. Ira ko pinapina no mihcaan a malahicoci no kiwkay, sa:an i, mapatireng cingra a malaciwlo, do^doen ko milaocan no kiwkay a tilid i, 20 ko halafin no mihcaan ningra a malaciwlo saan.

Ano sowalen, awaayho ko paso’linay to Kristokiw no Yin-cu-min itiya. Dengan i no payrangan a kiwkay ta ira a masapinang a matilid ko dmak. I Tokar (nano kuan-in-san,

cya-mi-san) a kiwkay ira a matilid i rayray no kiwkay ko dmak ningra, i 1916 a mihecaan ira ko nai Ingkilisay a sin-kiw-si ci Song-cung-cyen a foksi na tayni i pasawali no Taywan mirakat to niyaro’ itini i Se-pay, Tokar, Awawan a kiwkay, i 10 folad to 22 romi’ad (pilipayan) sasepat ko pasingliay a salikaka, oni a sasepatay a tamdaw ira ci Intiw o ’Amis a finacadan

a mitooray. Tona manga’ay ko ’orip no pitoor ningra, saka i 1918/12/1 a romi’ad, i pikrid ni Lien-te-lyi a foksi a mapatireng cingra a milahicoci.

Itiya i 1919 a mihcaan, lomahad ko tamdaw no Tokar a kiwkay, milihayay i pilipayan i ’ayaw no lahok i, ira ko 175 ko tamdaw, hrek no lahok i, ira ko 155 ko tamdaw saan. O dadaya to pikioyiko to papaso’lin a sa’opo i, mata’lif ko 70 ko tamdaw o mikapotay, i laloma’ nonini a mikapotay haw i, ira ko 40 ko misa’Amisay, ci Intiw ciwlo ko mifalicay to sowal a pala no 'Amis/Pangcah.

O hakelong sanay ci Intiw to ka’oripan ningra itiya, mikadafo i Tangafolan a loma’, sa cingangan to no kaping i kika, saka caay ka hapinang o nano ’Amis a tamdaw cingra, o matiliday i laloma’ no kiwkay haw i, ^deng o malaciwloay ato saki patenak misinting ato pasifana’ to misa’Amisay a sa’opo a o mafana’ay to no ’Amis a sowal a mihongyakoay a saan. Nikawrira o pipaso’lin ningra a mitoor i, caay ka hapinang a matilid itini i rayray no kiwkay.

Orasaka, awaay ko todong i laloma’ no pisinting no ’Amis ko demak ningra, awaay ko pinang a mido^do to sakitini cingraan, dengan o pihayda o sarakatay a pasingli ato sarakatay a malaciwlo no ’Amis a mitooray cingra ahan.

Itiya i, tona ikaka ko picingcing no Ripon to tayal no Kristo a pipatenak, saka paci^ci saan ko Ripon a papita’ong to Amatelas a samiyay no Ripon, madahdah to ko pipatenak to Kristokiw i Taywan, repeten aca nangra ko mita’ongay to Yihofa a Kawas.

Orasaka, itiya i, midemak ko kapah no Tokar a kiwkay to dadaya no pilihayan a romi’ad, o ’angsit a simal ko dawdaw, o kamiay a sifay ko sapisinting itini i ’adawang no Takoliaw. Itiya i, awaayho ko yika, tilifi, sifay a nanengnengen. O tamdaw no niyaro’ ira aca ko matiniay, pitengil ko mimaanay saan to pipakimad. Yo misatapang tahira i paherekan ko nia demak i, awaay ko pitolon, ta pakaikor to a o kafana’an, ira ko kakarayan ato ira ko pisemseman a malatosa, caay ka nga’ay a midemak to tatiihay ko tamdamdaw a saan.

Nikawrira o pakafana’ to so’linay a sowal no Kristokiw konian, oya tano ngisngis sanay a Yis Kristo i syasing, o tati’eran no tamdaw a so’linay a Kawas caay ka saan.

Yo mapahrekto ko sakinatosa a kalalood no hkal, itiya i 1947 a mihecaan ko Taywan, pado^do ko Tokar a kiwkay tayni i niyaro’ no Takoliaw a misinting to ratoh no Kristokiw, o itiyaay a tamdaw minengneng to pirayray a pakafana’ i, pakokatawaan saan ko tamdaw, awaayho a matngil ko iraay ko cima a mapa’oripay a tamdaw. Ci mama Intiw ko mifalicay a mihongyakoay to sowal no Taywaan a pala no ’Amis/Pangcah.

O pahrekan no miheca i 1947 i, ci mama Asing ’Afo, nao mikihatiyaay malasofitay no Ripon a mapidah, o saiko:ray a minokay cingra nai Nan-yo, 32 ko mihecaan itiya. Minokay tayni i Takoliaw i, pasowal cingra to matanengay ningra a demak i kalaloodan ato pawacay cingra i pirofoan a matanengay a pa’orip no Kawas ato sini’ada, pilayap no Tapang. Ta paso’lin cingra to Tapang a mipaino’. Mitengil ko tamdamdaw i fahka’ cangra.

Orasaka, tahidangen ningra ko toloay a laloma’an a ngasaw, pakafana’en ningra to nika so’linay ira ko tada Kawas itini hkal. Nanoya, ona toloay a laloma’an awaay ko kahinapecan nangra, saka i 1948 a mihecaan mapolong cangra a paso’lin to Tapang, sa’osien ko tamdaw i ma^deng 22 cangra. Ci Asing ’Afo ko mikriday cangraan a tayra i sa’amisan a niyaro’ i Tokar a kiwkay a mikapot to lihay itira, ta itiya a mafana’ ko sawalian a Ciwkay to nika ira i Takoliaw ko ’Amis a mitooray a saan.

O misawadayto a malaciwlo no Takoliaw kiwkay, ci Amoy Asing han, o misawawaan ni mama ci Intiw cingra, ira ko sowal ningra to saki’orip no mama ci Intiwan, o sarakatay a mitooray, paso’linay ci Yis Kristoan a ’Amis a tamdaw. Itini i no payrang a kiwkay ko picomodan ningra a malamotooray, o nano mikadafoay cingra i loma’ no Tangafolan a finacadan, o nikararid ningra i no payrangan a Taokar kiwkay ato laloma’an no Tangafolan, saka o pinengneng no ’Amis a tamdaw i cingraan i, o mafana’ay to no ’Amis a sowal a Tangafolan saan a fahka i cingraan. Ano so’linen i, o tada ’Amis a tamdaw cingra.

Caay ko tadamaanay a tamdaw cingra i niyaro’, caa:y ko kakangodoen no finacadan, nikawrira mikihatiya cingra to malcaday ko mihecaan a tamdaw ko nikalalicalicay, i kasalalicayan ci mama Intiw a caay pilawa a pasowal, patngil to pakayniay ci Yis Kristoan a ratoh, nikawrira ira ko hinapec nangra a mina’ay, sowal sa “Ora Amilika a tamdaw(mitoro’ to syasing ni Yis) mafana’ tisowanan haw? Mipadama i tisowanan Cingra haw? Pacefa: sa kiso a paso’lin…? ” saan.

Tona milongoc ci mama Intiw cangraan a papitodoh to samiyay i, paca’of saan cangra, “Todohen a mimaan? Ciira (mitoro’ to samiyay) ko milecaday i titaanan, sa ta’ongen nanay niyam.” Ano hareteng han i, o caay ko kangodoan i laloma’ no ’Amis ci mama Intiw, nawhani o nipipaso’linan ningra ci Yis Kristoan ko saka’osi no finacadan i cingraan itiya.

Sowal sa ko wawa ci Amoy, “I lima, enem ho ko mihcaan ako i, dipoten nanay nangra, nawhani nai kasofoc ako i, malaemang a matiya o lotong a miming, caay ka comengaw ko mata a mapohaw, pakanengneng kina mato’asay i takowanan i, salimela sa a sini’ada saan, mingitangit to tada mama ato ina ako to ngalay nangra to sapidipotaw takowanan,nanoya madipotay nangra kako. Tona madipot kako i, to dafadafak ci mama Intiw, mitatoy to kaysing, paroen ningra ko nanom, miala to sota’ i lawac no loma’, kiwakiw han ningra i kaysing, ta sacaciyaw sa ko ngoyos ningra a mitolon to Wama i kakarayan, mahalineknek koya nanom ato sota’ i, pananomen ningra kako, roparopen ningra koya sota’ i mata ako, maala ko pinapi:na a romi’ad to pidemak ningra takowanan, nano yanan sa a manga’ay to ko tireng ako a tanektek a malahad.”

Tona ira to ko mitooray i niyaro’ no Takoliaw o nano nikridan ni Asing ’Afo to pilipayan tayra i Tokar a kiwkay milihay, saka itiya a mafana’ cangra ci mama Intiwan to nika o ciwlo

no kiwkay, i pipakimadan no lihay i, cingra ko mihongyakoay a misano’Amis.

I pilihayan i, i ka^mangay a lihay pasifana’ cingra to paradiw “Katayni paso’lin ci Yisan” sanay no payrang, “ Lay-sin-ya-su, lay-sin-ya-su, lay-sin-ya-su- hen-cay,

hen-cay-lay-sin-ya-su, lay-sin-ya-su-hen-cay.” Tata’ang ko ngiha’ no radiw no ka^mangay. I no mato’asay a lihay i, i ’ayaw no lihay, mikrid cingra to ’alomanay a minanam to radiw, o payrang ko sowal ningra, “Cya-lan-lay-hon-koy-syeng-si ti 62 siw, ti 62 siw, lan-lay-ngim ‘Syong-te -cung-cu-ti-ka-te’ ci-siw, lan-lay-ciw ti 1 cat ka ti 6 cat e kua-su, ti 1 cat ka ti 6 cat e kua-su a-ni-kong:

'Syong-te -cung-cu-ti-ka-te, si-cya-man-mi-ta-hang-e, kung-law-kit-tua-yo-kit-kua, cit-se-cing-ho-yeng-po-sua. Ciw-ti 6 cat, 'Syong-te-e-on-kung-po-cin, ce-ken-ya-su-kiw-man-min, tay-ke-tiu-yin-cin-sip-sin, ka-i-kam-sya-si-lay-in.’” nihaenan ningra a mikrid ko ’alomanay a micomod i laloma’ no sini’ada ni Yis Kristo.

O sowal, mata’lif to ko kalaloodan, misatapang to micomod i niyaro’ no ’Amis ko Kristokiw, o picomod no ’Amis to Kristokiw, o nano pihaklong no haykiw ko paso’lin. Itiya i matli i Tokar kiwkay ko sapahaykiw a dafong. Itiya ci mama Intiw o ciwlo no kiwkay ko mikihatiyaay a matayal a mipalilam. Yo mipalilam itiya i, malipahak ko faloco’ ningra, sowal sa, “Mikansya to Tapang, ani:ni to paso’lin ko finacadan ako ci Yis Kristoan,” saan.

O sasowalen, o ciwlo no Taokar kiwkay ci Intiw a o kapah no ’Amis, itini cingra a paso’lin to Tapang a mipasingli, itini a malahicoci, malaciwlo, o sakatadamaan no kiwkay itiya, mihongyakoay to no payrang ato ’Amis a sowal, mikapot ko fana’ ato adayay no Kawas i cingraan, o fa^detay ko faloco’ ningra a matayal caay ka ngida’.

Mikansya to Kawas, onini a kapah no ’Amis ci Intiw o ciwlo no Tokar kiwkay, o kafana’an i rayray konian, malopido^doan no ’Amis a tamdaw a mitoor to rakat ni Yis Kristo, marayray malnak ko ratoh ato kitakit no Tapang i niyaro’ no ’Amis.

Mitiliday: Ci Masao Nikar Foksi