Malikakaay ato Karecrecay

Malikakaay ato Karecrecay. (兩兄弟及食人鬼)

To saan, ira ko malikakaay a fa’inayan, malingad i omah. Ira ko malonem itira i salawacan no omah. Yo miradom sato cangra, ira koya malonem itira i tefon no ’alo a mironang. Tiko saan tayra i talo’an a miala to ’idoc, tahira han to nangra i tefon i, ira ho kiya malonem, itiya kotang (safi) han to nangra, caay katama, mapacekok koya malonem, saka, laliw sato. O nia romi’ad, o mapidahay kina malikakaay.

Saka tosa a romi’ad, matiya to i nacilaay ko kasadak a malingad, tahira i kalahokan, tayra haca cangra i ’alo a miladam, manengneng haca nangra koya malonem mironang i tefon, itiya sakalamkam sato cangra tayra i talo’an a miala to ’idoc, patiko cangra ira ho koya malonem, itiya i patangsol han nangra mipatama mikotang (misafi) to ’idoc koya malonem, “Aya, matamaay!” Matama kiya malonem. Piyoc sato a milaliw.

Na saan kiya malikakaay, do’edo han nangra kiya mayasyasay a remes noya a malonem caay ka tama nangra, to’eman to ko romi’ad, lafin sa cangra mafoti’ i kilakilanan i lotok. Dafak sato, hinamen haca nangra, mahinam nangra i, ira i tatihi nangra a mafoti’ a madiko kiya malonem.

Masamatira ko demak nangra, lomowad koya tatosaay i, lomowad koya malonem, laop han nangra i, cikay saan koya malonem a milakiw, paterep saan cangra i, paterep sa koya malonem. Orasaka pado’edo saan cangra a milaop, tahira sato cangra i ’alo, caay to ka hapinang nangra koya naripa’an no malonem. Katoledan nangra i, manengneng nangra i sa’owac a sawa’eran ko dademakay a tamdaw, mato iraay i kafafaw ko maro’ay tamdaw saan cangra. Itiya do’edo han nangra pasifafaw, so’elinay ira ko cecay mimingay a loma’.

Comod saan cangra i laloma’ i, ira ko cecay a mato’asay a maro’ itira, licay han nangra koya mato’asay: “Ma’araway iso ko malonem mita’elif ina?” han ngangra a milicay, “Awaay ari.” Saan ko ca’of noya mato’asay. Sowal sato koya mato’asay, “Aka ka itini, kalamkamen a milaliw, mapatay noya kamo ano honi.” “Now saw iro mapatay kami?” han nangra. “Nengnengen, o misatoronay kako i matini to malo sapasikaen noya karecrecay i takowanan ano honi.”

Saan ko sowal noya a mato’asay, “I cila, o wawa ako ko maka’enay, i nacila saan i, o fa’inay ako ko maka’enay, deng to kako ko ’osaw.” “Ano saan aca ina, dadada! Pisatoron to.” han nangra ko sowal. Maherek sato a misatoron, teli han to i pa’enan. Oya sato malikakaay, tada caay to ko cahiw nangra, orasaka, tingih tongih han to nangra koya nitelian a toron, mafecol sato, “Ano ira koya karecrecay ano honi i, pilimek itini i rarikor niyam, aka ka talaw.” Han noya malikakaay a pasowal koya mato’asay.

Sa:an, sakaraskas sa ko kilang, mamirmir to koya mato’asay, sowal saan “Ira to kira koya karecrecay a tayni.” So’elinay, ’aloman koya karecrecay. Nengneng han nangra, ira ko matongihay a toron i pa’enen. Sowal sato koya karecrecay, “Cima ko mitingihay?” saan a mafirang. “Ano saan aca kaenaw ita ko titi nina mato’asay, tiya ka’enen ita ko nian a toron.” Oya sato o safa i, pasowal “Da to, ini kako ko ka’enen.” Oya sato a karecrecay, sawa’ han nangra ko patih, so’elinay, tengteng han noya safa ko kamay noya cecay a karecrecay, do’etoc saan a malitod ko kamay noya karecrecay, “Aya, caay aca ko matiniay, ci cediay aca kina mato’asay.” Saan a pasowal.

Matalaw, feleng sato cangra a milaliw. Itiya i,dohedoh han to noya tatosaay a malikaka. Sa’elinay, hinam han nangra ko nirakatan noya karecrecay, paka fafa’ed sa no kilang a romakat. Tahira cangra i sa’owac, ira to koya fangcalay a fafahiyan itira, mafaca’ to riko’. “Mimaanay kiso itini?” han noya tatosaay a malikaka. “Caay ka matira kini ko demak ako, nialaan no karecrecay kako. Mifaca’ay kako i matini to riko’ nangra, name ’adopay i honi.” han noya kaying a pacoki. Nengneng han noya tatosaay koya riko’ i, matapedi’ no remes. Liclic han to noya tatosaay, “Icowaay ko loma’ noya karecrecay?” “Iraw i dihif, mafoti’ay to i matini itira,” han nira a pasowal.

Oya sato o safa, “Ano saan aca, tayra kako, patayen ako,” saan cingra. Oya sato a fafahiyan, “Aka ka tayra, patayaw nangra kiso,” han nira a pasowal. Caay pitengil to sowal noya kaying koya safa. Paci’ci saan a tayra. Tahira han ningra, mafoti’ to a apolong kiya karecrecay. Comod han nira kiya dihif, adihay ko titi a matating. Nengneng han nira i, ira ko saripa’, fongoh, o fadowac no tamdaw. so’elinay, o nian ko koma’enay to tamdaw. sodoc sato cingra toya nitatoyan ningra a fonos, calcal han a mipatay koya karecrecay, sasawasawad saan ko fongoh noya karecrecay. Cofel han ningra koya fonos i, mararopit haca koya fongoh ato tireng noya karecrecay. Sodoc han ningra, masasawasawad haca.

Orasaka, tatoy han to koya fonas, caay to cofelen ningra, oya sa a karecreay, ma’emin a mapatay. Nokay sato koya safa a tayra itira i pakalitemohan ningra toya fafahiyan, tahira han ningra i pifaca’an noya a fafahiyan, awaay to koya kaka ningra ato fafahiyan. Do’edo han to ningra ko narikoran nangra, tangasa i loma’ noya mato’asay, “Awaay a mita’elif koya kaka ako ato cecay a fafahiyan haw?” han ningra. “Ira to, i honi aca,” han to noya mato’asay. Sowal sato koya safa, “Iso saan mato’asay, aka ka talaw, ma’eminay to ako a mipatay koya karecrecay.” Hemek sato koya mato’asay.

Minokay to koya safa a mido’edo to lalan nira yo tala’ayaw. Tahira han ningra i loma’, sowal sato ko tao, “Pafesoc sanay koya kaka iso ato ya fafahiyan tayra i loma’ no hongti, ya nihakolongan noya kaka iso a fafahiyan i, o wawa no hongti.

Sowal sato koya kaka to hongti, “Ini to ko wawa iso, nialaan ako itira i:raw, na maala no karecrecay,” oya sato a hongti, olah sato. “Ano saan aca i, kararamod kamo,” han noya hongti ko sowal. Ho:ni, hadak sato koya safa itira i loma’ noya hongti. Pasaowal sato , “O demak saan ningra a wawa iso, nani alaan no karecrecay, matamaay niyam iti:raw. Oya sa a karecrecay i, ’aloman, kinafalah sa kako a micalcal mipatay, ma’emin to ako a mipatay cangra.

Orira ko saka irairaay aca a minokay ko wawa iso, ano caay ha’enen ako, o mamapatay to kora wawa iso, o angah ko sowal ni kaka ako, caay ka Ingra ko mipatayay toya karecrecay, kako ko mipatayay, ano caay kiso paso’elin i, licayen ko wawa iso.” Tengil han to noya hongti koya wawa ningra, so’elinay, mafirang, sowal sato, “Kiso o kaka, o misaangahay i takowanan, o mamifalah to tai’ ko tayal no miso, tatiih mahaen k odemak,” sowal sa koya safa, “Ano saan aca, kiso to ko cifafahiay tona wawa ako,” so’elinay, oya kaka, misamangahay, mala mifalahay to tai’, oya sa a safa, itira i tatihi no hongti ko safa. Hatira ko sowal.