Komoris no i Siwkulanay a Pangcah

nani… a masadak Wikipedia
跳至導覽 跳至搜尋

Komoris no i Siwkulanay a Pangcah (秀姑巒阿美的河祭)[misinanot | o yin-se-ma no pisinanot]

Komoris no i Siwkulanay a Pangcah O komoris hananay i, o lalowaden no niyaro’ to mihecahecaan. Ro:ma, satokeled han no cecay a naniyaro’an a cilowad. Ro:ma, malaladof ko pinapina a niyaro’ a malacecay ko lowad. I ka’ayaw no ilisin saca a cilowad to komoris. Cecay a lowad, ano ranikay i, tosa ko romi’ad cecay ko dadaya. Ano mangayar i, tosa ko dadaya tolo ko romi’ad. O tata’ang no nanom ko pi’arawan to saka ranikay ato saka ngayar no lowad. O kacilowadan to komoris i, o Siwkulan a Tarawadaw. O demak a komoris i, Tafa’en ko sawa’eran no kacacinowasan a pasayra i roma a sonol no nanom. Ta i tiya yo makerah to ko nanom a mifoting. O lalosimeten to sipitafa’ i, o kilang malotartar, o eli’ ato talod, o tafayar, o fokeloh, ato fonak ato si’elac, hatira. Yo miteka a mitafa’ to nanom i, cecay ko sowal no mama no kapah, saferiferih sato ko safasafa a kapah pakinacecay to tayal a mitafa’, awaay ko matayoay. O saka saan a pakinacecay to tayal i, nga’ay caay kasarocod ko nanom a misetol to satafa’ o sanay. Naw hani, ano masarocod ho ko nanom a mipelox to tafa’ i, caay to ko mamafilo ko nanom a liyawen a mitafa’. Orasaka, satariktiken ko tayal a maemin. Sasitahefod sato ko narikoran no kapah a comikay. O kahemekan a minengneng ko kafarihfih no kapah a mitafa’. O nokay nai pala Ano maherek ko pifoting, maedeng kami a minokay ano dafak i ano saan ko piditek no mama no kapah to lowad naira i, ocoren no mama no kapah ko sadosidos no ciopihay a selal. Patakec han naira ko cohcoh i laeno no coho’ i safaled no ’amatorod naira. Itiya i kasademseman no foti’ to dadaya, na’on saan caira a comikay a mitaliyok to niyaro’ a paratoh to i loma'ay. Sowal saan:“ Oy! Ina! Tekong ’araway, ’arirawraw no folad, keliw sasefet, minokay kami ano dafak” saan a palatoh to i loma’ay. Pakatengil ko i loma’ay to piparatoh no kapah i, maratar a manikar ko fafahiyan a misahakhak to sasatoronen. Ta sa’apeladen naira ko toron a misapangkiw no kawat ko pisakofetol, cecay a kamat ko nika pisadadahal. Ta patayraen naira i ’adawang a patorod i teloc no lofang koya toron i mamalahok . Ta sirimrimen no pakarongay no lofang a mipili’ ko fangcalay, o sakaay ko nini, o sasafa'ay ko nini a apelad saan a misiwatid. Yaan yo safangcalay i, o malosapaka'en to mato'asay saan ko pisakilac no sasafa'ay a lofang. Ano minokay sato ko kapah i, tangsol han no mama no kapah ko foting a misakilac.Tata’akay a foting i, malo no Kalas a kilac; mimingay a foting i, o sapakilac to teloc. Matiraay ko pisakilac no Pangcah a masasereserer. O ’osaw a misakilac a foting i, malosakalahok to no finawlan i ’adawang. O komoris hananay i, todongay o sapalatamdaw to kapah ato teloteloc a mingodo to mato’asay, ato sakafana’ no misina’el to niyaro’. [1]

  1. 吳明義. (2011). Wikipedia 維基百科 族語詞條試寫─原住民族語詞條 2011作品集. 教育部.