Kawakawasan ratoh no ’Amis/Pangcah-O pipaco’ay no lotong.

Kawakawasan ratoh no ’Amis/Pangcah-O pipaco’ay no lotong.(阿美族傳說故事-猴子的報恩)

Iti:ya ho, ira ko cecay pakoyocay laloma’an no ’Amis/Pangcah a tamdaw, o damsayay faloco’ a mato’asay akong, ira ko cecay romi’ad nai lotok a omah to pinisnis to rengos a minokay i, talifahalan sa ko ta’akay ’orad, oni mato’asay akong madopoh to comikay tayra i tata’akay a kilang mikilidong to ’orad.

Caay pahater koya ’orad, mapades koya mato’asay akong, sowal sa: “Aya! Samaan sato, a to’eman to ko romi’ad, tata’ak ho ko ’orad, pakacowa sato kako hakiya?” saan. Itiya, safana’sa nai semosemotan masadak ko masafelengay a lotong, ira ko cecay a lotong mi’awitay to falako a milicay toya mato’asay akong: “Akongaw, onini a falako pacaliwen ako kiso, ira i loma’ niyam ko sapatala a sakalafi, mihamham tisowan to katayni i loma’ niyam.” Orasaka, hakelong sato ci akong pasilotok palafang i loma’ noya lotong.

Tahira i loma’ noya lotong i, to’eman to ko romi’ad, oya ’alomanay a lotong masadak mihamham ci akongan, halamham pakaen to kakaenen nangra. Komaen itiya i, manengneng ni akong koya mato’asay malitengay ina a lotong mata’enang i kafoti’an, itiya licay han koya kakeridan a lotong: “Mamaanay cingra?” paca’of sa: “Halafin to ko adada ningra, o maanan rengosan a sapaiyo, caayto pakanga’ay.” Itiya sadak han ni akong i tafolod ko sapaiyo ato langto no ’afo a pacamol, pafeli han koya kakeridan lotong: “Pakaenen cingra to nia sapaiyo.” Na kaenen noya lotong a ina saka tosa a romi’ad, maadah to ko adada, miahowid koya kakeridan a lotong, sowal sa: “Tada miahowid to piadah iso to adada no mamo, ira ko sapatafo ako i tisowanan.” Kakeridan lotong miala to ’arawraway cinaw sapafeli ci akongan, pasifana’en samaanen ko pidemak.

Nanoya, mahawikid ni akong minokay koya ’arawraway cinaw, safaheka sa ko laloma’an to kapinokay ni akong, itiya nao minafoyay ho kiya sona: i manengneng ni akong o mafana’ay to a romakat, pasowal sa ci akong: “Toloay ho romi’ad ko piliyas ako kiya?” saan, paca’of sa koya wawa to fainayan: “Toloay to mihecaan ko kaawa iso i, imatinib to kiso a ira minokay”.

Itiya i, pasadak sa toya ’arawraway cinaw ci akong, pateli salongan a felac, itiya saadihay adihay s akoya felac, adihay a adihay sa malifowas marasras, salipahak sato ci akong, sowal sa: “Kafahekaan kina ’arawraway cinaw!” taikor tomes sato i loma’ koya felac.

Nanoyaan sa i ikor, o caay to ka talalotok ni akong maroray talalotok minisnis a maomah, itiya o cimafecolay to ko ’orip to romi’ami’ad no laloma’an.