Kawakawasan ratoh: malikakaay ato fafahiyan wawa no honti

Kawakawasan ratoh: malikakaay ato fafahiyan wawa no honti(兄弟和公主)

Milepel to malonem ko malikakaay (兄弟追逐水鹿)

Yo malingad taraomah a maomah ko malikakaay, manengneng nangra ko cecay a malonem minanom i nemnem, minokay a miala to kotang, patatiko cangra ira ho koya malonem i nemnem a minanom, kotangen nangra koya malonem, cowa ka pakatama.

Tocila a dafak, taraomah hac akoya malikakaay maomah, maraod to ko kalahokan miradom cangra, ira haca ma’araw nangra koya malonem minanom i nemnem. Tangsol sa patatikor tayra i talo’an miala to kotang, patatiko cangra ira ho koya malonem i nemnem a minanom, kotangen nangra koya malonem, matama tona riyad, macekok koya malonem pakaw sa a milaliw koya malonem, pakaaikor a milepel toya malonem koya malikakaay,do’edo han nangra ko matesi’ay a ’irang ilalan, nikawrira, away a makera koya malonem. Mipararid cangra a mikilim, ira ma’araw mapalaliw haca, mipararid ho a milepel, ma’araw mapalaliw haca, sahatira sa a misaliyaliyaw taha dadaya. Maroraen to cangra foti’ sato lawaca no lalan tahadafak. Kakafahekaan mafoti’ cangra i, mafoti’ koya malonem, lepelen nangra i, milaliw koya malonem, haen sa ko pilepel nangra tahira i sa’owacan, fahal sa aw akoya malonem.

Malacafay ato mamo mitoker ci Kalocayan(兄弟跟阿嬤一起對付食人鬼)

Manengneng nangra ko misatafa’an no tamdaw i ci’eci, harateng sacangra:”itini i fafa’ed nona ci’eci caka’eca ira ko koma’ no tamdaw”. orasaka, do’edo han nangra kora ci’eci a macakat pasifafaw, so’elinay ira ko cecay a loma’, o malitengay a fafahiyan matayal i laloma’, licay han noya malikakaay:

” mamoaw! Iraay ma’araw iso ko malonem han?”

” o maan saw? ” han noya mamo a milicay

” iraay ma’araw iso ko malonem mita’elif itini haw?” liyawen haca noya malikakaay a milicay

” icowaay saw, away idang!” sa ko ca’of noya mamo a milalang: cowa ko kataynian namo itini, ano caka kalamkam kamo a miliyas, o mamapatay kako” han noya mamo koya malikakaay a palimo’ot.

Opoh sa a miliclic koya malikakaay toya mamo: ” naw iro?naw iro? Mapatay kaki?”

Paca’of sa koya mamo: ” naw iro? cowa ka nengneng namo ko pisatoron ako han? O sapakaen ako toya kakomaen takowanan a Kalocay tatiihay kawas”, macekok koya malikakaay.

Somowal haca koya mamo:” itiya ho makaen ko wawa ako, caka pina ko romi’ad i’ayaw, makaen haca ko fayinay ako, kako to ko ma’osaway”.

Sowal sa koya malikakaay: ”ano hatira kalamkamen a misanga’ ko toron, sata’angen ’arawrawen ko pisanga’ to toron” han noya malikakaay koya mamo. Ano masanga’ to iso ko toron telien i ’la’eno no pangpangan. Itya sato, oya malikakaay o tadacahiw nangra calohsa a mitongih to mamang toya toron, ma’osaw ko toris no pitongihan i toron, patikoen haca miteli ila’eno no pangpangan, sowal sa:”mamoaw! kapilimek i aikor niyam" han nangra.I laloma’ a milimek cangra mapolong.

Malowid no malikakay ko Kalocay kawas(兄弟打敗食人鬼)

Cowa ka halafin ira matengil ko milipa’ay to mafadi’ay papah no kilang a soni.Mirmir sa a somowal koya mamo:

” a! iraay to a tayni ko midingolay a kawas”

”wo! So’elinay tayniay to”.

’Aloman ko kalocayay a i ’a’ayaw no fawaha. Caka matiya o tomay, cowa ka matiya o lotong, cowa ka matira o tamdaw a kawas. Manengneng nangra ko natongihan toya toron wata ko kaketer nangra:

” cima komitongihay tona toron? Tada patelacay to konini a demak,ano matini haw i,o heci noya mamo ko ’ayaw a kaenen nako ta o toron ko kakaenen ako” saan, racaden no safa ko ngiha’ no mamo: ”ha dada, picomod micepet takowanan, ini kako”

Soso’en no kalocay ko kamay i ngala’ no moco’ sapicepetaw toya mamo, sa’icel han no safa a mirepet ko kamay no kalocay kawas, cefit han nira a mitengteng peto’ s akoya kamay no kalocay kawas, cekok s akoya kalocay kawas a miceli’: oya maro’ay itini a malitengay caay ko mamatini ko kaci’icel, tada maanay to konini, cowa to pakafilo kita kiya”, saan. Patapata sato a milaliw koya kalocay kawas.

Tepatepa sato a makarah milaliw koya kalocay. Oya sa malikakaay opoh sa a masadak nani laloma a milepel, nikawrira, awaay to a ma’araw ko cecacecay a kalocay. Songila’ han mipolita ko naikoran no kalocay, pakakilangay a milaliw. Do’edo han noya malikakaay ko matesi’ay a ’irang tahira i salawacan no ’alo, o mifaca’ay a makapahay kaying ko itiraay. Licay han nangra koya kaying:

”nimaanay kiso itini saw?”

”mifaca’ay kako to riko’ no kalocay” han noya kaying a paca’of, ”cowa ko itiniay kako, o nicepetan no kalocay a tayni, minokay nanipi’adopan ko kalocay papifaca’ to riko’ nangra takowanan”

Nengneng han noya malikakaay koya riko’ so’elinay ira ho ko ’ireng, licay sa:

”icowaay ko kamaro’an no kalocay saw?”

Paca’of koya kaying: ”itiraay tora tonotono’an a loma’, mafoti’ay matini”

Sowal sa ko safa: ”tatata! tayra kita a mipatay cangranan”

Sowal s akoya kaying:”aka akaa!ano tayra kamo ya patayen nangra kamo a komaen”, Nikawrira, cowa ka pitengil to sowal noya kaying koya safa, ferot sa comikay tayra. Tahira to i tonotono’an a loma’, o tangongoay tata’angay a dihif konini. Nafoy sa a micomod a miraod koya safa, nengneng han mareda’ ko foti’ no kalocay.

Mahadefek no safa ko kalocay kawas(食人鬼被弟弟消滅)

’Adihay ko samolimoli sanay a tangol no tamdaw ilaloma’ nona dihif,ira ko oo’, ira ko makamay ato fadowac.

”so’elinay to o komaenay to tamdaw kina kalocay kawas”

Sodoc sato toya nifekec a a fonos ko safa, o pisodoc aca macikcik to ko tatirengan no kalocay kawas, malaliyas ko tanga lato tatirengan, o kamay, oo’ ato tatirengan laklak sato. O kakafahekaan a demak, cofel han ko fonos patatikor haca ko tatirengan noya kalocay, sodoc han Malala ko tatirengan no kalocay, cofel han patatikor ko tatirengan no kalocay, kinatolo a misaliyaliyaw koya safa a misodoc, micofel, kinatolo ko tatirengan no kalocay a malaklak,patatikor. Sakakinasepat ca to ka cofelen ni safa ko fonos, oya malaklakay a tatirengan no kalocay ca to ka patatikor masongila’, laheci sato a mapatay.

Yo patatikor sato koya safa tayra ilawac no ’alo pifaca’an no kaying, awaay to a ma’araw itira ko kaka ato ya makapahay a kaying. Do’edo han noya safa koya ’alo tayra iloma’ noya mamo, licay han nira:

” mamoaw! iraay ma’araw iso ko kaka ako ato ya kaying han ?”

Iraay, iraay ihoni ho mikitingan noya fainayan koya kaying” han no mamo a paca’of

Sowal sa koya safa ci mamoan:

”mamoaw ! aka to katalaw, ma’eminay to ako a mipatay ko kalocay kawas, awaay to ko kakomaen tisowanan” han noya safa.

Hemak sa koya mamo, oya sato safa do’edoen ningra koya kataynian a lalan a minokay.

malahonti ko safa(弟弟成了國王)

Oya i’ayaway a tahaloma’ a kaka ato ya kaying,sowal sa koya kaying:

”O tireng ako cowa ko kalotamdaw, o kaeriden kako tayra i loma’ no honti, minengneng kako to mama ako o honti”

Oya sa kaka ma’araw nira ko hongti, lita’ang sa a somowal:

” kako ko mipa’oripay to wawa no honti, oya macepetay no kalocay taralotok malakoli a wawa iso, mapa’orip to ako a panokay” han nira ko honti a pasowal,

Hemak sa ko honti, milekal to i finawlan:

”tadacipatelaway kiso a mipa’orip to wawa ako, pararamod han to ako kamo”

Ona lihad matenak to taracowacowa a niyaro’, pakatengil ko safa toninian a lihah, tayra sato i loma’ no honti, sowal han ninira ko honti.