Kawakawasan ratoh: lalood ato militangal

lalood ato militangal 戰爭和出草

Miliyas to niyaro' ci Maawil 馬阿維離開部落

Ira ko cecay a kapah ci Maawil ko ngangan ningra, itiraay i Takidis ko loma’ ningra. Caayay ka hayien no niyaro’ay a finawlan to sakalakakeridan, maketer samaforaw tayra i Tomiyac a niyaro’. Tayni to tona niyaro’ ira ko kakafahekaan a demak,o pifalod aca ningra i fadanglan ato pakih sano ’ayam sanay to a ma’efer.

Mafana’ to ko Takidisay a tamdaw,sapitahidangaw papinokay patikor malakakeridan,cowa ka liwaliwaen ningra ko pisata’ota’ong no tamdaw no Takidis,laplapen ningra a panokay koya Takidisay a tamdaw, takawen ningra a mi’ofang ko tamina no Takidis, yo minokay sato maleneng a ma’alol koya tamdaw no Takidis i riyar.

Mipatay ko Pyuma a tamdaw to kaying no 'Amis卑南族殺阿美族的小姐

O Pyuma atamdaw halafinay a pakatengil to nika’efer ni Maawil,orasaka, tayra a mipalafang ci Maawilan. Litemohen ni Maawil koya Pyuma a tamdaw, kinatolo a mifalic to riko’, sakakinacecay o tolak no tomay, sakakinatosa o taloak no lokadaw, sakakinatolo o makamiday a kolah. Safaheka sa koya Pyuma a tamdaw, nikawrira, harateng han nangra o pikalona ni Maawil koni saan,laliw sato a ma’emin.

Ya minokay koya Pyuma a tamdaw, malitemoh nangra ko kaying no Tomiyac niyaro’,matayen nangra kina kaying. Mafana’ ci Maawil tina demak, tadatata’ang ko keter ningra,orasaka, mipatay to kaying no Pyuma a paco’ay. Nanoyanan tata’ang tata’ang ko sapipaco’ayaw faloco’ ni Maawil, cilacila a ma’efer tayra i niyaro’ no Pyuma a militangal. Ora sato o Pyuma a tamdaw misaharaterateng to sapifarataw to pilitangal ni Maawil.

Paco'ay ci Maawil 馬阿維報仇

Nengengen nangra i sera awa ko naripa’an ni Maawil, nani kafekangay a ma’efer sato ko piketon no sowal. Ira to ko nga’ayay a maharatengay no Pyuma a tamdaw, co’eneken nangra ko nicideman a ’aol i karomakatan ni Maawil,caka fana’ ci Maawil tahafikod tona macidemay a ’aol macocok ko tiyad sadak sato ko tina’i ora to ko sakapatay ni Maawil.

Mafana’ to ko Tomiyac a niyaro’ to kapatay ni Maawil, caka’eca ka tayni ko Pyuma a tamdaw a mipaco’ay, orasaka, o polong no niyaro’ maforaw tayra i Cikasoan.

Lalengatan no militangal出草的開始

Cisowal sa ko malitengay to wawa, ”akaa ka matira ci Maawilan, maforaw ko niyaro’ kasini’adaan ko finawlan, ci Maawil ko milengatay to matiniay a demak” saan.

Ciharateng sato ko ka’emangay, saw iro mafelih ko sowal no malitengay, o Pyuma a tamdaw ko milengatay a mipatay to kaying no Takidis, o mipa’adingay ci Maawil to niyaro’ sa tayra mipaco’ay to Pyuma a tamdaw, ano awaay ko pipa’ading ni Maawil, awa to ko tolas no Pyuma a tamdaw a mikari’ang to niyaro’ no ’Amis kiya.