Foting ni Idek.

Foting ni Idek. (Idek 的漁獲)

Iti:ya ho, o malakawakawasan ho a to’ek i, ira ko cecay a niyaro’ o Dafdaf han koya niyaro’, i lotok ho ko lingad, misahafay ato tamorak ko nipalomaan. Itira i sacomodan no niyaro’, ira ko cecay a loma’, ira ko mato’asay maponengay pakoyocay a ina, midipot to limecedan a wawa to fafahiyan. Masamatira, malokatawaan no niyaro’ ko nia laloma’, rarid sa a lokesen no tamdamdaw, sowal sa: “Ci toka, a i loma’ sa caay ka tayal.”

Mafana’ ko awaayay ma’araw, ira ko cecay a romi’ad, talifahal sa matefad i ‘a’ayawan no loma ko nai kakarayan a cecay a tifekan. Pacekok koya mato’asay a ina pasowal sa: “O nian koya nisafaloco’an ako.” saan. nikawrira, sapilinahaw patayra i laloma’ i, samaamaanen ningra pa’icel i,caay pakalinah cingra.

Nanoya, tahidangen ningra koya limecedan a wawa malalilid a milinah. Tona, o pitefing noya limacedan a wawa toya tifakan i, “Waw” saan malatamdaw koya tifekan, o kapah koya tamdaw, saci sowal saan ci Idek, oya sini’adaay kawas a malatamdaw kako saan.

Nengneng sa ci Idek toya kalatamdawan nira a loma’ o pakoyocay ko ’orip, saci loma’ sa i o malesa’ay maloyohay, o mamalefek ito. Nanoya, tayra sato ci Idek i lotok miletek to mikilang, sapipatireng mifadic to loma’, o pinaletek a kilang i, adihay ko lata’ a kilang, mangataay ko ’alo ko pikilangan ningra, fahekolen ningra pasayra i fanaw no ’alo, mahitefo i nanom koya lata’ i, talifahalan sa malafoting koyalata’ a misasiwasiway midangoy, o nian ko sasowalen no ’Amis: “O lata’ ni Idek ko foting.” sanay a kimad.

Itiya tomireng to koya loma’ ni Idek. Caay ka pina mihecaan i, mararamod to ci Idek ato limecedan a fafahiyan a mikadafo.

Itiya i o saka safaw cecay(11), safaw tosa(12) a folad, o pisatapangan no ’Amis a mimatang to pala o pipatala palomaan to hafay ato tamorak, saka tosa(2) folad ano eca saka tolo(3) folad i, itiya a misatapang palomaan, oya ci Idek awaay ko patodong to ni Idek pipalomaan a pala, itiya, saromi’ami’ad sa cingra a mikared to koliya’. Minengneng sa ko finawlan mana caay ka sadak ci Idek a malingad, katawaen no finawlan cingra: “Citoka, saromi’ami’ad sa a mikared, o sapi maan ko riraan? sa ko ’alomanay.

Caay ka pikihakihar ci Idek to nian, safaloco’ sa mikared to kakaya’ay to koliya’. O riraan, o cisini’adaay a kawas ko niyah, mafana’ to hakowaay ko kaomahan, hakowaay ko pipaloaan a romi’ad. Ira ko cecay a romi’ad, malahakelong cangra mararamod a tala lotok, pasowal ci Idek to fafahi ningra, sowal sa: tatoyen iso ko teloc no koliya’, tiring han itini.” han to ni Idek, ci Idek sato, mitatoy cingra to roma teloc no koliya’, mitaliyok ta pala, palifet han ningra a mitaroh, o polong no semosemot ma’emin a mafangad, matiniay a kamaomah awaay to ‘osaw a malengaway, maherek ko nian i, o pifelih to sera, nanoya misanga’ ci Idek to ’acocol, malaheci ningra misanga’ i, tayra cingra i omah, palifet han ningra a miringer, polong no omah a pala, samatiya sa o mifelihay to sera, o pitala to pipalomaan a romi’ad, o polong no finawlan ala mipalomaloma sato to hafay, panay, dengan ni Idek ko mipalomaay to tamorak ato tara’ar, katawaen ho no ’alomanay ci Idek, mana o atiniay sa ko nipalomaan, awaay ko kalangiwngiwan ningra, saroced sa a misa’icel paloma to papalomaen, o nidemakan no kawas caay ko niharatengan ko pi’arawan a milalat.

Mata’elif to ko pinapina folad i, o nipalomaan no finawlan a hafay ato panay i, madeci’ to a ma’ecak, o mamilitod ito. Orasaka, o kasaselal no niyaro’ midotoc to dademaken no niyaro’.

Roma a kapah, mi’orong to cecay lofoc no panay, oni Idek sa pi’orong i, o cecayay dimata’ ko ningra, itira sa i dimata’ ira a mikalic ko papina a ka’emangay a wawa. so’elinay ko ’icel ni Idek.

Saikoray, maraod to ko ni Idek a pilitodan to tamorak ato tara’ar. Pasowal sa ci Idek to finawlan, “Oya ni’orongan namo a tamorak, pateras han itini, itirawen ko no tara’ar.” han ningra.

Itiya i, mapolong ko finawlan a mipateras toya tamorak ato tara’ar i, pacekok malipahak cangra, oya mapela’ay a tamorak i laloma’ nira saheto o hafay, noya sa a tara’ar i saheto sa o panay ma’emin, tada o kafahekaan koni.

O nian a kimad, o nano kimad no mata’asay to pakayniay ci Idekan a kimad.