Dadangoyan

dadangoyan （竹筏）

Maraod to ko saka 4 a folad tangasa i saka 6 a folad to mihecahecaan, pifotingan to kakahong no pasawali a pangcah koni a “dadangoyan”. Orasaka, itiya ho misanga’ to dadangoyan o tadatata’akay a demak no niyaro koni, nano to’as a rayray ko taneng a misanga’. Itiya ho misanga’ to dadangoyan, o mama ko pasifana’ay to wawa, o mama ko papasifana’ to taneng a mikadot, anini sato i, o selal to ko pasifana’ay to taneng mikadot.

Nano to’as o paniyaro’ an no Pancah i, midoedo to kasa’alo no lotok nai Kalingko tangasa i Posong ato mililisay to riyar masaniyaro’ay. Maro’ay i pasawali a Pangcah i, misiikor to lotok misi’ayaw to riyar, mingata to Tay-pin-yang, orasaka o Pangcah hananay, caayay ka edeng o i Fotoday ko iraay ko pariyaray a serangawan. o Pangcah to i, o manmaan saka’orip, kakaenen, sakalali’aca maemin milecad to talihocan. Nika, o Pangcah han mafana’ miala to ’aol, mato misaloma’, tayhaw, sasoni a sapengpeng, halo “dadangoyan ” sakatayal a ma’orip maemin mafana’ miala to ’aol malo sakatayal a lalosidan. ano tooren ko pifoting to rayray, o mililisay to riyar o tada saka’orip ko pifoting a demak, saka caayay ko sasawaden ko lisin no pifoting a demak ato foting to.

Misanga’ to dadangoyan (製作)

Maala ko cecay a folad ko pisanga’ to cecay a dadangoyan, tosa, tolo miheca mafalicen to. Misanga’ to dadangoyan, i’ayaw no cecay a miheca, talalotok ko fa’inayan mipili’ to mowatik ato fitonay a ’aol, papolong sa miala to matatodong a panokay, ta patatodong han miketon ta lafongen i tafok mi’icang sakaca ka ngela’, caka fao. pinapina to a folad, alaen to i tafokan, o po’ot ko sapipodac, roma a niyaro sapikayangan mili’akong, no telang ho ko taneng, dohdohan a mitarang, sarara sa, tatiih tata’ak ko namal, patatodongen kalamkamen, sakaca ka todoh masiyaw. saikoray to satisil han to mitelek, o ’oway ko safalod, roma sato miala tokilang no kamoraw malosakadot. pacefong to dadangoyan tanamed misakadokadot, ano caka tatodong o nengneng o fana’ a miselic, mato pakafitan to sakadot, tahiraen to nika fangcaal to misakadokadot ko pisalof.

pacefong (下水儀式)

Maherek masanga’ ko dadangoyan, ira ko pasalong pacefong a lekakawa. Tinako to itiniay i Torik no Pasong a niyaro’, pinaherek a dadangoyan itira i riyar no Torik a pacefong, ala sa to limaay a fatac no talod falodhan malofawahan, saycomod patelien ko cecay a talod, ka’ayaw i sota patelien ko tamako ato ’icep sapato’aya, sarakat o Tomok ko mamikerid to kalas mifetek misaali nanay lihaday ko pacefong, makadofa ko kinayra a foting, oya misangaay toya dadangoyan a tamdaw hacecacecay sa micomod toya fawahan, todongay to mifalah toya kaacekan a demak, tatiih misiikor a minengneng. Pakayni tonini pisalongoc to to’as, o kawas no riyar ato kawas no lotok palemeden koni pacefong ato adihay ko foting.

Ano haratengen, caka samaan ko pisanga’ to dadangoyan, nika mikadot sato i caay ko kahemaway, nawhan kahemaw mahakelong no tapelik a masonol, ano awaay ko taneng ato nafanafan’an i, caay kafilo a mikadot, aniniay sato no soka to ko sapisanga’, awaay to ma’araw ko no ’aol, Onini to ko sakalahedaw ko taneng ato pacefong a marayray ko demak, itini i pasawali i Kakacawan no Posong i 2005 a mihecaan pasangen a palowad no tata’akay a pitilidan no siyako, palowad to malalifetay mi’iwas to dadangoyan, paytemek sa ko kasaniyaro’ a misanga’ to dadangoyan, lacecay sa patalahekal to taneng, nanay toni kalalifet, maparayray ko taneng, ko pisanga’ to dadangoyan ato pacefong, maparayray ko tadaheci no serangawan.