Ci Difang

Ci Difang (郭英男)

I 1921 a mihecaan ko kasofocan ni Difang a malitengay, a tamdaw cingra, saka i 1938 a mihecaan i, mikapot ciira to Laketun a selal , papidi^ciwen no malitengay cingra. O nian a midi^ciway hananay a tayal i, o tatiyangan no niyaro’, matatodongay a sidemak. I 1978 a mihecaan, matayal ci 許常惠singsi a miloing to radiw no Yin-co-min, o papatayraen i Fako kora radiw no Yin-co-min. Toya tayni cingra i Falagaw a mamiloing to radiw no ’Amis i, licayen ningra ci Piya’(郭子光) a malitengay, “cima ko samaradiway namo o Falangaw?” han ningra. “Ci Difang ko samaradi:way niyam.” han ni Piya’ a malitengay a pacako. Tayra sata ci 許常惠singsi i loma’ na Difang a malitengay a mitengil to radiw naira. Toya dadaya, masa’opo ca Difang a malitemgay i papotal no loma’, maherek cingra a mipalamal toya ’ongto ningra a mitamako i, misatapang to cangra a romadiw. Radiw sato cangra i, sapa sato koya mitengilay to radiw nangra a lafang, mana makapah a tengilen ko radiw nangra? sato ko hemek nangra, olah sato a miloing to radiw na Difang a malitengay. I 1988 a mihecaan, tahidangen no Fako a kitakit cingra a talaFako a romadaiw. Romadiw cangra i Fako, “onini makapa:hay ko ngiha a tamdaw, naniTaywanay, ci Difang ko ngangan nira.” sato ko pipakimaday no sinpon. Itiyato a ’aloman ko mafana’ay to Taywan hananay a kitakit. I 1993 a mihecaan, patekoen na Enigma hananay a romadiway koya niradiwan ni Difang a malitengay i “Return-To Innocence” CD. Wata ko lietanan noya CD, adihay ko payso na Enigma hananay a romadiway. Nikawrira awaay ko mafana’ay cima koya makapahay a ngiha a tamdaw. Tangasa i 1996 a mihecaan i, paka’ayawen no Yatelanta ontokay koya “eturn-To Innocence” a radiw a patengil ko ’alomanay, ta itiya a kalasasowalen no pakatengilay, mana o niradiwan ni Difang kora radiw i, nawiro caka singangan i CD? sato masadak ko hatiniay a sowal. Itiyato mafana’ ko ’alomanay ci Difang a malitengay, i Falangaw ko loma’ ningra, o ’Amis cingra. ’〝’Afasan na Enigma hananay a romadiway ko radiw ni Difang, patikolen ci Difangan ko nidemakan nira.〞sato ko masadakay a sowal. 2002 a mihecaan 3 folad ira ko 29 a romi’adan, toya dafak laliwen ni Difang a malitengay kita a mapatay, yo mapatay cingra i ma^deng 82 ko mihecaan ningra.