Cay Ing-wen 2024 pafilongan a sowal

“2024 pafilongan a sowal” o paini no congtong a sowal. (總統發表「2024新年談話」)

Conghua minko 113/1/1 (中華民國113年01月01日)

Anini (1/1) romi’ad ci Cay Ing-wen congtong i congtongfo ’ayaw no lahok paini to sowal. Sowal sa anini o saikoray to kalacongtong no conghua minko no ningra, to nia faloay miheca, o pisa’icel no Taywan mi’imer to niketonan, pado’edo to aniniay demak, pado’edo midipang to nikapolongan, misimaw to sakarihaday, misa’icel patongal sakaci’icel no kitakit ko sifo, misakahemaw to saki’orip no finawlan, pado’edo pasomelet to kitakit, midipot to finawlan, misa’icel paliwasak to katalawan, palalodis i cikiw, pado’edo pa’icel to sakakoda’it, tomenek tomireng i kasakitakit.

Sadayen itini i Taywan ko “No hekalan a Taywan”, aniniay a Taywan, o kafana’en no hekal ko Taywan, o misolotay to hakal a Taywan, malokafana’an no hekal ko Taywan.

O salaloma’an no congtong a sowal:

Itini sakacecay i 2024 mihecaan, mipalemed kako to polong no finawlan kitakit, kalipahak to fa’elohay miheca. Mahireteng itiyaay ’ayaway mihecaan, pasowal kako titaanan, malitemoh no mita ko naikoran no kalifong to kacakat no ’aca no kasakitakit ato kaserer no kicay no cikiw a salifet. Caay ko dengan ko nian aca, tikoen a minengneng ko ’ayaway miheca, caayho paherek ko Russia Ukraine a malalood, caayho paterep ko Israil (Israel) ato Hamas ko kasasiwtoc. O cecayay ho miheca konini, itini toni faloay mihecaan, ono cikiw ira ko kacalemceman no kafalican. Semo’otay miheca a salifong, sakalalifet no hekalay tamdaw a kasasipaso’elin, kalalifet no kasakitakit a dadama; o tadancaay a latiih no romi’ad, misiwtoc to kasakitakit a sifo to sapisi’ayaw a ’icel ato sakakodait.

O kapolongan a pakonira tono nisatekedan sakaliyaw masasiwtoc, mapadenga ko katomenek no parana’an no sici, malaliyaw mapasitoc ko kasakitakit to patoroday a coci. Toni faloay mihecaan i, masasiromaay to ko hekal a mafalic. O kapolongan a mapakonira caay ko sakaci’epoc aca, o nai tiniay a sici ko mamidipot to pisitaraan; ato masasi’oret to kasakitakit, o nian koya masakemoday no niaso’elinan.

Toni faloay mihecaan i, so’elin mafalicay to ko Taywan. Caay to kamatiya o i ’ayaway, caay to katawalen ko Taywan, 2,350 ’ofad ko finawlan no Taywan mikihatiya to kafalic no hekal, mikihatiya aca mifalic to hekal. Ano licayen kako, toni faloay mihecaan o maan ko sakamitini, pasowal kako “O hekal” ahan ako; ano licayen kako, o maan ko sakamitini no hekal, ira aca ko “Taywan” saan kako. Toni faloay mihecaan i, mi’imeran ita ko niketonan, padoedo to imatiniay demak; mapahapinang no mita ko nisafaloco’an, misa’icel mihadimelto kitakit.

Caay ka dengan o “Yonginghaw” 27 ko malaheciay, o “Haykonhaw” masafacoay a lonan mapatalananom to, nai sapitena’ a halaka ko harateng, masafa’eloh to ko sapilood, no finawlan sapitena’ safaco mapatireng to, tangasa i pacakat ’icel kasasinanam no sofitay, mapalongay to maparakat mafalic ko pitena’ no sofitay no mita, matiniay a kafalic o o maparakatay ko nian. Nikawrira, caay pilengat kita, caay kakolomi, o tadamaanay tenektekay ko sapaso’elin, malosapaso’elin no syakay no kasakitakit, talolong ato kapolongan malacafay a malafolod, o sakanga’ay cipaso’elinay tanektek kita misi’ayaw to hekal, o cipaso’elinay tomenekay misi’ayaw to Congko.

Anini, “Taiwan Can Help (Manga’ay no Taywan midama)” o nipihayda no kasakitakit a nidemakan. I kangalayan no syahay no kasakitakit i, ira itira ko ’icel no Taywan; I kalitemoh to patalawan no patapalay i, o kalasini’adaay no Taywan ira:ay to.

Itini i katongal no kalafolod i kasakitakit i, nanay hakini o kasasitapalan no mita, o malecad ko pitamorong to tatodong. O nanay kasasitapalan ranikay ko palowad ko nga’ayay to kasasico’aliw no mita; nanay ci rihaday, malalenay, cikapolongan, masasowalay, mapolong mikilim to marariday tanetek ko kasasili’ay no kasatapal. Misi’ayaw to cikiw a kapolongan a mapakoniyah ano eca misatekeday ko kasasiwtoc a malaliyaw, ikoray i, saikoray o pipili’ no Taywan dengan pidoedo mi’imer to kapolongan, misimaw to rihadayay.

Anini mihecaan a yosang no sadimel no kitakit tangasa i satakaraway i 6,007 ca’or. Mipacecay ho kako to sowal, kacidamsayay ko rihaday, ka iraen ko ’icel, pahapinang to no niyah a sapisimaw a pisafaloco’, oya syakay no kasakitakit malacecay ko pidawa to Taywan, mahadimel to sakarihaday no Taywan haysia a macekal, o satadamaanay a satoker koni.

Pahapinangen ko kaki’emel no faloco’, dimawen ko kapolongan pakoniraay a ka’oripan, mahapinang no i hekalay ko nian, caay ko cacango’ot ano eca kacitodongan ko Taywan to kacitodongan no cikiw to kapolongan, a ira to away to manga’ay to caay ko hahaenen. Orasaka, o pihadimel to sakarihaday no Taywan haysia a macekal, caay ko no aniniay a kalacecayan no syakay kasakitakit, o no kasatatapal a kalalecadan a tatodong; dengan o kasasiromaan no kasasiikedan a kalalecadan a tatodong, oya 2,350 a finawlan no Tawan kapolongan a mihalhalan. Toni faloay mihecaan i, calepen no mita ko ’icel no kitakit, lowanen misakahemaw ko mipececay ’icel. Pakaynien no mita picekeroh to “Ciencan cico ciense”, lima patongal to tosa a kinairaan misafa’eloh ato “Enemay makemoday sapilood a kinaira tayal”, sapacakat to micerohan a taliyok, mapa’icel ko todong no kicay, mapalasoked ko raraay no maci niyaro’, mapacakat ko saka’orip no finawlan.

O GDP no mita nai ’ayaw no falo miheca a 17.5 walwalan; no Taywan a pacefongan, nai 2016 miheca katomirengan no mako 8,131 a peno, tangasa i nacila saka lima, ’ayaw no pilosimetan no miheca, tangasaay to i 17,930 a peno, mapacakat ko ’ayaway miheca, halo no Hongkong Hengsen a matifac to. O 2,350 ’ofad ko tamdaw no Taywan, o saka 21 sata’akay kicay i cikiw, o kalalifetan ’icel no kitakit, adahi tangasa saka 6 i cikiw. Kirami, mafana’ kako, o salifong, kacakat no dafong maserer ko mi’acaay sakararima ko ’aca, no loma’ ’aca a mapecec, so’elinay to o saka’orip no finawlan ano eca o nia kicay, malo sakararaay to.

Orasaka, sa’icelen no mita, o kaciheci no kacakat no kicay patayraen i malalenay mo^ecelay a “kaaisalan no syakay”, sapiserer to karetengay saka’orip no finawlan. Matiya ’aya’ayaway pina a miheca, midemak kita to pipasataan, pacakat to salowan to sato ato nikororan, ira ko 350 ’ofad no laloma’an no Taywan, salongan 47% ko finawlan no kitakit, caayto karapot a mipasata.

O yosang no sadipot (cangcaw), nai kacakatan no mako to 54 ca’or, tangasa anini miheca mata’elif to ko 876 ca’or. O nai“0 tangasa 6 miheca o kitakit ko padafohay” sanay a halaka no mita, nai 2016 mihecaan a 150 ca’or ko yosang, anini mata’elif ko 1,100 ca’oran. Padoedo kita to falo miheca pacakat to kinaira no atayalay, nai 20,008 payso pacakat tangasa anini mihecaan to 27,470 payso ko lifon, anini misatapang romakat; “Sasafaay lifon a rikec” nai anini misitapang midemak.

Panamor tona pakalitemoh to salifong ko cikiw marara to macakat toyaan miheca i, ikor to, pacekelen no mita ko saka’orip, o sakalalenaw, padoedo to sakicila a patosokan, padoedo alahad ko kitakit, to sapidipot to finawlan. Orasaka, nai anini misitapang, to folafoladan pacakat to sapadang midipot to wawa sadama. Ono kofaan padipot nai 5,500 payso, patongalen tangasa 7,000 payso; o nano patorodan no sifo nai 8,500 payso, matongal tangasa 13,000 payso ko sadama. O mitilid no mitiliday i ta’akay pitilidan, to mihecaan 35,000 payso ko sadama, oni nai anini miheca saka 2 folad misitapang.

O kakaya’ ho ko rakat no sakamo^ecal no sakiloma’. Nikawrira, 20 ’ofad loma’ syakay kiloma’an halaka no Cayingwen, itini to nia paherekan no miheca malaheci ko nisahalakaan, “Misaraday to loma’ a sata 2.0” itini miheca misatapang midemak.

Paini kako to matayalay a widang to sasikolen. ’Ayaw no pipaherekan ni Cayingwen i, polong no nisilsilan a yosang to 3,000 ca’or i, mapateliay to itini i lawpaw-kiking, caay ka piloh ko sifo, caay ka piloh ko lawpaw.

Pasowal kako to sida’itay to sakidafong a widawidang, o pikowan ni Cayingwen, o tadah i, nano kacitongan ako to 32.97%, pakeroden tangasa i cilaay miheca to 11 folad to 27.17%; faloay miheca ko todong ni Cayingwen, polong no nipatikoan a tadah mata’elif ko 9,000 ca’or. O sifo ni Cayingwen, o mafana’ay patiko to tadah a sifo, caay pasiday i wawawawa to tadah, o citodongay kako, tanektek ko payso no kitakit, malo sakaci’icel no ikoray a sifo, padoedo midipot to finawlan. Toni faloay mihecaan i, pala’isal miliyas to katalawan, mapaaro’ i polong i hekal, palecad to 2016 mihecaan, pata’elif to ko pitoay kacakat no mapasadakay no Taywan. To nian, saki Eurupe macakat ko lima a mapasadakay, mata’elif ko enem ko nipasadakan to talatimolay a kitakit, i Dipong mata’elif ko pito, saki Amilika, mata’elif macakat to 120%.

Pasihekalan ko rakat no Taywan, pasiTaywan ko rakat no hekal. O “Toloay ko lalan no picefong a halaka to Taywan” no mita, misolot to 2.1 walwalan ko micefongay a payso, nai papotalay mipacefongay i Taywan mata’elif to 2.4 walwalan. Misa’icelan to pinapina mihecaan i, mafelih to ita ko dufak to piti’er to cecay a icifa, malaheci to ko pifalic to ’ayaway sifo, to pipasayraaw to ECFA, sapilecadaw to Hongkong ko Taywan, pakalamkam a palecad to kicay no Congko a lalan.

Anini a kasasi’aca to tatapalan (Congko), mato someletay to a masilsil, pasayni to i Taywan a micangray to tadamaanay nisanga’an a dafong ko Congko, makikaka to ko to’asan nisanga’an picangray pacomod no Congko a pinasanga’. Nawhani tadamaan tata’ak to ko ’icel kicay no Taywan, mafalic to ko kasasitado to kicay no Congko, orasaka dadahal to ko sakikasakitakit no mita.

“Taywan Korea to saka’eca pilalisata matatelek” i anini misitapang. Taywan ato Amilika masasitelek mili’ayaw to polong no hekal to “Taywan Amilika 21 sici kalali’aca kasasowalan” ’ayaw ko sasitelek; padoedo o mamitelek to Inkiris to “Pacakat to kalali’acaan kalacafay malatelek”; ato Canada malatelek to “Mipaceroh pacefong ato sapa’orip a kalatelek”. O nia kalatelakan no kalali’aca, saheto o kasafa’eloh no pakayraan no polong no hekal, o pi’awas a paripa’ koni, Taywan mawanikay to ko no ’ayaway sifo a nisetekan to “Pasayraay i Congko, itiya pasayra i hekal” ya sanay a katalawan no ’orip.

Aniniay a Taywan, manga’ay pafesot pasayra i hakal, o pantawti ato takaraway kakki no Taywan, o nian o caay kaciawa a kalacalay no kapolongan ko sakaromakat. Masasemo’otay no salifong ato kalacaan no romi’ad, sakaira no kasaisal ato palasawad to katalawan no salifet, pacecay titaanan, padotoc ko Taywan a kodait, tanektek i kasakitakit, itini i polong no hekal a kicay mapasadak ko katomirengan. Talacowa mawanik to ko salifong to toloay miheca, nikawrira o nia lifong padoedoay ho milifet to syakay no tamdaw. Malifet to ita ko SARS ato COVID-19, nikawrira o mamiselic kita to lalekoan no cienpaw, palalen to i kararemay a malaisingay a padafoh ato katayalan, pa’icel to sakatomenek no tireng a koda’it.

Talacawa maliyas to ko nisidayan no ’ayaway sifo, o sakidinki to kinaira dengan o 1.64% ko mihecaan, talacowa o no cidalan a dinki no mihecaan a pisadingki mata’elif to ko no heneng , nikawrira, kafafalic to sakidinki o kakalamkamen midemak ko nian. Ranikay pacowat to pa’orip to dinky, o sapidama to kinairaan no Taywan to pakayraan malalifet to kasakitakit. Toyaan to, misa’imer miisal to calay no dinky, ranikay misoped to kacowatan ato mipatireng.

O mamidoedo misa’icel to kodait no kinaira no Taywan, katatongod to nipatirengan a COP 28, 2030 miheca polong no cikiw macakat to tosa ko kinairaan, palalecad to no kasakitakit a patosokan marafas ko kacakat, itiya pasayra i 2050 miheca ko kafalic a ciro ko kakorac. Padoedo kita micikeroh to sakafalic no kicay, oyaan ko nifana’an mikerid to sakatadamaanaw, polong no cikiw o parana’an no kinaira a parapatan koni, mipa’icel to sakaci’icel no kicay no Taywan a eca ka cacoscosen.

Polong no finawlan no kitakit, anini citodong ci Cayingwen malacongtong no Taywa (ROC), o sa’ikoray to a pafilong no falo mihecaan ko nian. Ano micokeray ci Cayingwenan kiso, ano o miliyangay ci Cayingwenan kiso, o mamiahowid kako to kahacecay finawlan no Taywan. Talacowa macakat maserer, nikawrira, malakapot kita i kacifalian ka’oradan, malacafay romakat tahanini, malakapot to kitakit romakat tangasa itini. Ano ira ko milicayay tokowan, o maan ko nisidayan i Taywan, pasowal kako, masiday ako ko “No hekalan a Taywan” han ako.

Faloay miheca, aniniay Taywan, o kakafanaen no hekal ko Taywan. Tona malitemoh ko widang to romaay kitakit, pasifana’en cingra, o nai Taywanay kiso i, ’aloman ’aloman ko mafana’ay, o icowaay ko niyaro’/ loma’ no mita. Aniniay Taywan, o misolotay to i hekalay ko Taywan. O nai Ukraine kitakit ci Roysa pakalayap to ngangan no Taywan (ROC). Ci Hoang ren-sin mikerid to Hoyta, Su c-fong mihawikid to caw-wi, minokay i niyaro’, pasayni i Taywan ko nengneng, mipadefong i Taywan.

Aniniay Taywan, o nihaydaan no kasahekal ko Taywan. Orasaka iraay ko nikapolongan a kasaira ita, ano o kasasiroma no tamdaw, saheta manga’ayay malacongtong, midamaay congtong; ira ho, o kaolahan iso a tamdaw malekapot misaparod. Kasafinawlan no kitakit, ato 12 to romi’ad, o mamiliyaw heca kita pakayni i pipili’ no kamay a mitopa, malosakacitodong no sakanga’ay no ’orip no kitakit ko niketonan no mita. Ano manan to ko pasayraan a sician a kasarekad, ano Conghoaminko pakayraan, ano Taywan pakayraan, saheto o kitakit ita ko nian.

Minanay kako, paso’elinen ita ko niyah, paso’elinen ko kapolongan, paso’elinen ko Taywan. Kao nga’ayay ko piketong to Taywan, o pasayraay i hakal a Taywan, midemak to nga’ayay niketonan. Miliyaw heca kako palemed titaanan kalipahak to fa’elohay miheca. Ahowiday.