Cay Ing-wen

O papelo ni Cay Ing-wen i 2021 (110 ) mihecaan (蔡英文 2021年國慶演說)

O romi’ad no cung-hwa-min-ku 110 miheca anini. To: mihecahecaan a romi’ad, malacecay kita, maacang kita to romi’ad no kitakit.

Katadamaanen ko faloco’ ita mapolong, miahowid to nirorayan no ’ayaway ma’orip tonini a sra. Ano o ’ayawayto, ikorayto tayni, mikirorayan mikinafalah nangra to tiring kina fangcalay loma’. Anini, ma’oripay i Taywan a finawlan, o ccayayto a ma’oripay, saliyaliyaw sa a malifet.

Miteka anini miheca saka lima folad, masatar no lifong kita a Taywan, o satadamaanay a lengatan koni. 800 ko malasawaday ko ’orip, o salaloma’an, o nga’ayay widang ita cangra, o mikapotay ma’orip titaanan cangra. itini, satapangan no sowal ako, mipaini kako to lalomaan nangra mita’ong todong sahinom i cangraan.

Pakayni tonini a lifong i, mahapinang ko kasinanot ato kasatamdaw no finawlan no Taywan.

Ano masamaamaan ko fa^edet ciferang no rimi’ad, caay pisawad a citamokis, talacowacowa ko rakat i, milonokay a mitilid to ngangan QR Code, caay ka aingid to tamdaw. Kalifongan i, mido’edo to pacorok no sifo, masarayray ko pipapeno. Misa’icil kita, miahowid kako to pido’edo no finawlan, caay ko mipakoniraay ko sifo.

Itini, miahowiday kako to Hong-hay/Yong-ling- kikingkay, Tay-ci-tin, C-ci a yofayof to pikomod to sifo. Miahowid kako to marorayay a polong no ising ato midipotay no malaisingay, miahowid haca kako to polong no finawlan no Taywan, ka’efoan i, malacecayay, midipang to kitakit, o nianan koya masafinawlan no kadadipot a miolah to kaxeraan.

Caay ko nikasasida:ma aca, halo padama no widawidang, o Dipon, Amilika, Litufan, Slofake, Cisko, Polan a kitakit, o ledef no hekal to salifong i, manikaw to sapeno, milaya’ to kamay a midama cangra.

Anini, o tatayni a patireng to Ttay-piaw-cu ko Litufan, o a itira ko romaroma kitakit a Tay-piaw to nian. O nian haw i o “O kapolongan no malafinawlan, malawidangay no hekal” a han. Saka imatini, o itiniay mapolong, pi’pi’en ita ko kamay, todong o piahowid ita i cangraan o taypiaw no kitakit.

Ira ko nga’ayay a litengan no Taywan a tamdaw, caay pisiwala to nikanga’ay no tao. I ’ayaw no miheca pasadak kita to tamokis “Taiwan can hlpe”, anini miheca patayni cangra to sapeno “Sakacihakelong a sapeno”, o “masakoliyolay ko kanga’ay” ahan. O a itini kako a pasi’alomay miketon, o sasatadamaanen no Taywan no kasakitakit, mapalenak ko “masakoliyol ko kanga’ay”.

Tonini cecay miheca, masaliyad no lifong ko laloma’an, nikawrira caay ka cimafateray ko kaci’icel a lamahad.

Cango’ot ko hekal to salaloma’an no pan-taw-ti, mahapinang ko palonol no Taywan to kacango’otan, i kasafalifalic no In-Tay a kuwan, o sakatadamaan a nengnengen ko Taywan.

Satalolong sa ko dadotoc no Taywan ato Dipon, makanga’ay titaanan ko O-meng, Taywan Amilika patatikol kasasowal i TIFA, pasingsi ko Taywan to pikapot i CPTPP, i Hua-Fu, i Tokyo, i Kanpira, anoca i Prusel, caayto salawacen ko kasasowal to Taywan, sa’aloman sato ko masafinawlan a widang, mangalay micoker to Taywan.

Paso’linen ko ’icel ita, ato malalikid to mangataay ko hirateng, tadamaan ko demak i kasakitakit. Rarangian no Taywan i kasakitakit, caayto ko malapakoyocay i Asiya ko Taywan, kita anini, maedeng ko pisi’ataw to salifet a “Kodaitay a kitakit”.

Saka tosa, mici’iwi’iwian ko taliyok no kuwan, mangalef ko sapilengataw.

Nikawrira masangaanga’ay kita, mangalef ko pipenec no cung-kuo titaanan. Orasaka, patapalen ako kita o finawlan, akaa sapisoraraw.

O sici no hekal i matini, mangerngeray kasafalifalic. Micowat ko patalaway, mina’onayto ko micokeray to mapakoniraay a finawlan no kalohekal tonini, o ’a’ayawan no ’adipel ko Taywan imatini.

Mahaenay saka, hakelong sa to rakat no kafafalic no hekal, matiniay ko cung-hwa-min-ku, i 72 mihecaan ko nika mici’iwi’iwian ko demak. O cecay a ’awas no mita i, mato mificficay(mikitingay) to rarakaten no hekal, o ikoray a rakat no hekal, mato sakafater ko rakat no Taywan.

O sila’is no In-Tay a kuwan, masararimok a mici’iwi’iwian. Ma’emetayto no Pi-cing ko Syang-kang, rekenanto ko finawlan, macaliwa’ to ko pakayraan no sici ato kicay.

Ya:an haw i, o i Nan-hay, i Tung-hay, mafidfiday ko liyok no sakuwan. I timol ato sa’etip a kakarayan no Taywan, rarid sa a misacikacikay ko hikoki no kisantu, mirawraw to sakarihaday kitakit.

O kakitikiting no min-cu kitakit i, misa’icel a pahinaker to kasasofal a makakomod, ta sapina’on to kafafalic no kuwan ato hekal. O G7, Pi-yi, O-meng, ato Mi-Re-In-Au a “se-fang-an-cien-tuy-hua”, lalitemoh sa a misa’imer to sakarihaday no Tay-hay, nanoya sida’it to In-Tay sakanga’anga’ayaw, sakacaaw to pikari’ang no Cungku.

Itini, pacecay kako, mangalay ko Taywan pasadak to ’icel pacowat to sakarihaday no kuwan. Pakayni tosaay a hekal i, caay kafalic ko nga’ayay ato niketonan, pararidsa ko kanganga’ay sanay ko nitokeran, misa’icel a mitena’ to sakafalicaw nonini a demak kita.

Pa’icel kako to sowal, sapitolas to maciriday a tosaay a hekal, pakaynien i nikalaliwad ko picahdal.

Halhalen no mita ko kacacedeng no tosaay a hekal, caayka sapiri’angaw, nikawrira caay ko ai pineker a makolomi ko finawlan no Taywan. O mamipararid a mitongal to sapi’ading to kitakit(kanatal), pahapinang to sapisimaw to tireng a faloco’, sapidipot to saka^ca ka roharoh a pasayra i no Cung-ko pakayraan. Nawhani no Cung-ko pakayraan i, awaay ko patodong to no min-cu mapakoniraay a ’orip no Taywan, awaayko no 2300 finawlan a sakacitodong itira.

Saka tolo, lacecayen mapapolong ko harateng, teleken ko sepatay sapida’oc

Nai 1949 miheca ko cung-hwa-min-ku tayni i Taywan, mata’elif to ko 72 a mihecaan. Tona 72 a mihecaan i, o kicay no mita nai masapakoyocay tangasa i kanimuci, o sici nai katalawan tangasa i min-cu, o syakay nai sacecayay tangasa i kasasiroma no ponka, kasacecacecay a naripa’an no ’awas, malaheciayto masafa^elohay a safaco no cung-hwa-min-ku i Taywan.

O nasafaco kalata’angan to no i hekalay konini anini, o nanoka’oripan no rayray no tamdaw a misa’icel a heci koni. Caayko no nima a tekedan a ’icel, awaay kiso tonini caay ko han tini.

823 a kalaloodan i, ki^emelay a hitay caayko palacidekay. Salaloma’ay no Pan-taw-ti a matanengay tamdaw caayko malacidekay no cen-tang. O ramo a finacadan ci Cen-nan-long, ci Loisa o Ukelan a tamdaw, O ina ni Wen-cen-lin o nano Filipin a hua-len, o ngayngay ko mama ato Dipon ko ina a camel. Pinapina romi’ad a miliyasay a miyakiway ci Wang-kung-huy i, o ’Amis a tamdaw cingra.

Caay sa manengneng ko watawat wata: ko inget ita, malefo ko Taywan wata: ko pisangotefoh. Masasihawopay a kitakit konini, ano ’ayaway ikoray to a tayni, awaayko ci ’iloay, awaayko kasasiroma no tatapangan a warayen i kapolongan. Dengan o kasasiodo’ a milecaday tonini a sera, micelakay to kamay, mihamhamay to tamdaw, malacecayay i kalotamdaw.

O nano nirakatan to 72 miheca i ’ayaw, tata’ak ko kafafalifalic no safaco no kitakit. Nikawrira nikafafalifalic i, ira ko caayay kafalic to pi’imer. O nian i o “pidipot to cu-cien, pidama to kitakit”.

Oni a poso’linan, o saka^ca kangiyangi a tanektek, o sakatadamaan no kaciheci no min-cu, 72 a mihecaan, o midipotan no sufitay mifolawan koni, o ni’imeran no kasarayray no teloc finawlan no Taywan.

Mahaenay a nipi’imer, caay ko no cecayay a si^eked a Tang koni. Anini, kakeridang no Ko-Min-Tang ci Cu-Li-Lon, kakeridan no Min-Cun-Tang ci Ke-wen-Ce, Se-Tay-Li-Lian ci Cen-Su-Hua, ira itini i matini.

O katayni no namo, o safangca:lay a pala a min-cu no Taywan. Kasacen-tang iraira aca ko kalalifetang to sici, naka ano maparapic ko sakitari’ang no kitakit, ato sakiikor no finawlan i, o mamarikec kita, o sakirayray to teloc finawlan no Taywan, midipang to cu-cien, midipang to min-cu mapakoniraay a ka’oripan.

Orasaka, masasitelek kita, da’ocen ko pi’imer to cimapakoniraay a min-cu to masalaloma’ay no kinpo, ’imeren caay ko masasingasaway ko Cung-Hwa-Min-Ku ato Cung-Hwa-Ren-Min-Kung-He-Ku, mi’imer to cu-cien a caay kasasiforaw masasi’emod, mi’imer to sakanga’ay no Cung-Hwa-Min-Ku Taywan, mido’edo to hirateng no finawlan no Taywan.

Oni sepatay a ’imeren, o lalinikay a nipafelian no finawlan no Taywan koni, o tadamaanay paso’linan kinian, o mapa’orong a papatingerongeroh kita to ’adihayay a sakafana’, marikecay a faloco’ a misi’ayaw to iroay a sakalengat(salifet).

Ira ko malecaday ko a’orongen i tatirengan ita, pahapinangen ita ko kapah, manga’ay tahada’oc ko pidotoc i mapakoniraay tonini a sera, o han.

Saka sepat, sopsopen ko ’icel no syakay, sapipalasawad to maciriday

Miteka nai 2016 miheca a mapatireng kako, misa’icel to masamaanay a kalali’acaan, masafa’eloh ko nisangaan, kafalifalic no kinaira, patadamaan ko misa’icelay ato pipacomod, saka manengneng no tamdaw ko nikacakat a mafali’ ko kicay no Taywan.

Tona pinapina no mihecaan, o katadanca no kicay no hekal, mapadama ita ko milietanay minokayay, sakaranikay masafa’eloh ko nisangaan, mifilih to ’ayaw 30 mihecaan to pakinaliay cecayay mitadi’ecan sakararima no kicay, ato milaliway a nikasasorot a payso ato mileslesay a munday.

Anini sato, mahapinangay a kicay no Taywan, miliyaw o sa’ayaway no s-siw-long a pasayni to ko nengneng no i hekalay, o pahapinang to cikodaitay a ’icelay, masikeday a pakayraan no kicay a comahad.

Pasayra to kita to fa’elohay a romakat to caayay ko pitadi’ec a cifa, tomirengay i hekal ko kicay no Taywan, malotadamaanay a safawah. Kita o po:long a finawlan, mafawah ko fawahan no hekal to sakitataanan, ’imeren ita ko rakat a pasayra, ikoray 30 mihecaan a kicay no Taywan, madadotos ko kalikat a fa’edet.

Caay ko kafalic nokicay a cecay, waniken ita ko masamaamaanay a sapades, pacoroh to adihayay fafalicen. Misatata’ang to dadipoten no syakay, malasawadto ko katahafikod no way-ciaw, o sakisimaw to kitakit macakatay to. Misa’icelan ita nai ’ayaw, sahapinang sato i nengneng no finawlan ato i hekalay ko kaciheci.

’Aloman ko milicayay i takowanan, samaanen ho ita ko saki Taywan? Rahoday ko ca’of ako, karatayal to saka falic ato saka ci’icel no kitakit, ato sakacomahad no kitakit to ikor, malosakada’oc a rihaday, sakarocek a ’icel no Cung-Hua-Min-Ku Taywan, ira ko macekelay a syakay, sapilitemoh to ikoray a sakafalicaw ato salifet.

Si’ayawen ita ko halafinay a hadang no syakay no Taywan, sakacaay kalacecay a miciriday nihiratengan, kilimaw ita ko pakayraan sakanga’ay misalof, ta malasawan to koya halafinaw a kararawrawan, haenen ta awaayto ko sasikolen tala’ayaw a romakat.

Iraen ita ko pakayraan no sakacomahad no kitakit to sakirikec ato kasakapot, sakiniyaro’ pakiraan, sapitoris to pala ato sakacomahad no niyaro’ a tadamaan to sapikokmod, sapicaliwa’ a misalof, masarocod ko pikomod micaliwa’, mahapinang i nafaloco’an no finawlan.

Sakitini, sakafalic no sarikec no kinpo, o sasi’aywen konian. Mapatirengay to ko Siw-Sien iingkay i Li-Fa-Yin, tonini a sien-kay, o a i Cung-Hua-Min-Ku a kinpo ko parana’an, sapihadimel to min-cu pakoniraay a pakayraan a midemak to Siw-Sien.

Takaraw ko ’adwang to pakayraan a miSiw-Sien, patapal kako to kasaCen-Tang, o sakanga’ay mikomod to kitakit ko piSiw-Sien, o citodongayto ato caayayto kacitodong, palasawaden ho ko masasiromaay a ci’iwiay, kai kaainiini to sakasarocod miSiw-Sien, makilim ko sakalacecayaw.

Cuan-Sing-Cen-I a tayal, masiday no likisi ko kadoka’an ato kasasikalat, samaanen mihiniom, mi’esesay, milifetay to taneng ato sakacodah no aniniay tamdaw.

Roma sato, samaanen ko rarakaten no kinaira no kitakit, o nian haca ko hahiratengen.

Awaay ko cecay a kitakit ko satikotiko sanay to kinaira a mipado’edo to sakacakat no kicay. Mikihatiyaayto kita to rakat no kasa kitakit, misintingan to i 2050 makorac ko kinafalah to patosokan, o mamisafaloco’ misalalan ko kasacefang to rarakaten, milecad to dado’edoen, maratar mi’eses to katalawan, patireng to koritacay, sapalolol to sakacitingki. O sakalalifet ato sakadotoc to taliyok.

Demaken kina tadamaanay a lalaocen, ta malosakaci rihaday a tahada’oc, masiday ko nga’ayay kitakit to sakikapah. Orasaka, i ’ayaway nikasasowalan i, nikasasiroma no Cen-Tang, maciriday harateng no sici, i kasasiroma no pakayraan no sapilinik, sakararawraw awa ko patolasan. Mahaenay a kararawraw awaayko sadama a comahad no kitakit, o sakala’om, laliyoc sa itira:to.

Orasaka, ikor no katomireng ho ako i, pacomoden ko ’icel no syakay, mapolong mikilim to lalan no sapisalof to dademaken. Malakayat to kamay mafafolod ko syakay ato sakisici, mapolong mikilim to masasiromaay a ngoyos, mahacecaycecay ko pisalof, kalopakayraan no sakacomahad no kitakit, mapatireng ko ’imeceday a parana’an.

Saka lima, ma’iray paso’lin a malakayat, pasayra i hekal ko rakat no Taywan.

2021 miheca, maledef ko salengat, o kapacekilan a mihecaan. Anini kalaloodan i Tokyo no Au-Yun, mapahapinang no milifetay no Taywan ko awaayayho a nga’ayay a tingsu. Itini kasofocan no kitakit anini, liyawenho ita a miahowid ko milifetay a singsiw ato rarikoray a cefang, paepaen ita ko kamay. Miahowid i tamowanan pakanengneng ko hekalay to Taywan.

Pakayni toni kalalifetan i, patirengen ita ko caayay ko maciriday a malaliliday finawlan no Taywan. Mafana’ kako ira ko miki’araway to mimaliay o mamataoi’ saan, ano masadak malalifet ko singsiw no Taywan, caayto pinengneng cangra to tilifi, kai faloco’: sa miwaho. Mafana’ kako, ira ko malalifetay mipana’, ikaka no singsiw ko pisatemitemik no faloco’.

O warayan i kapolongan ko nian. O caayay ka sapinang a keliw koni, kakitingen niira ko kasacecacecay no mita, kahemekanto, kaingetanto, kaingetanto, kalipahakanto, malacecay ko kalipahak, misiked to malafoay, mahemek to kalipahakan, miteked to malafoay.

No opih a kimpay to tatosaay a fainayan, tana pakafana’ ko tilifi “in” pahapinang i, paso’lin kako, ’aloman ko micaceli’ay a talalosa’.

Halafinto ko pitala to nian. O nga’ayay no Taywan, o pipaso’lin no Taywan, o pisaki^emel no Taywan, mitalaay to pihiyda no i hekalay, nanengnengen no i hekalay. Anini a lalood, mafiloayto ita.

Tona pinapina a romi’ad, tona mipasasa ko hikoki ma’efer i fafa’ed no Taypiy i, ’aloman ko romakatay, tomerep a mica’ngaw minengneng. Minengneng cangra to midipotay to kitakit a kung-cing.

Caayko dengan a kong-cing, oni a kaacangan, i lalan no Taypiy manengneng ko minanamay a hitay. Milasalay a hitay, mikoracay a sofitay, o karanikay no pidemak no sien-ping, ato o mirarakatay i lalan a paliding, ato awa:ay i lalan misarakarakatay a paliding, i Cung-Cin-nan-lo a cipatalaay to dademaken.

Alamitatoy to wikidtingwa a misasing, talacowa caayko kafana’an to manan a hitay, latek caay pakasowal o maanan caira, o sakanga’ay a rihaday ko nihaenan. O sofitay ita cangra. o hitay cangra. mamidipot kamaro’an ita caira titaanan, ano ira ko kalingsesan to sapipa’orip, tona Cu-Cien a padamaay, tona ira ko katalawang no taliyok, citodongay a midipot to sapades no sera, o mamikinafalah to tirang mipadama to kitakit.

2021 mihecaan, o kapacekilan, tona minokay koya nai Tung-Au i, masadak ko hikoki’ no hitay 2000, i kafekang mitaliyok, patodong to pihamham minokay.

O hitay ato Tung-Au sahetoay o tadamaanay no kiyakiy a tamdaw. Mihamham kako to finawlan no kitakit, o nga’ayay no Taywan, paso’lin to Taywan, saki 2300 ’ofad ko pasacefang malacecay, o sakalata’ang i hekal.

Hawikiden ita ko kasenengan ato paso’lin a tala’ayaw, o tatapangan ko tireng, kalipahakan no i hekalay, pakonohekalan ko Taywan. Palemedan ko Cung-Hua-Min-Ku sen-re-kuay-le, nanay malemed ko finawlan tanetek ko tireng, mararid rihaday. Ahowiday titaanan.