Afan singsi

Afan singsi (方敏英宣教士)

O mipalowaday to tilid no misa’Amisay (阿美語文字化的重要推手)

Ano paka’arawayto kiso tona takaraway ko tireng, hato kakerengay ko ngiha’a matawa ato ikakaay ko fana’ a misano’Amis a somowal hawi, caayto ko mamapawan iso kona tamdaw, cingra hawi, ci Afan singsi, o nai Amilikaay a tayni a malasingsi ko tatodong ningra. Ono holam a ngangan ningra i, ci Fang Min-Ing han. O tadangangan ningra tono Amilika hawi, ci Virginia Ann Fey (1933-1993).

Itiya yo 1959 miheca 8 folad 18 romi’ad haw i, mapolong ato kapot ningra a tayni i Taywan, minanamho cingra tono Holam a sowal i Taypak, ta malinah cingra a tayra i Tai-tong i 1964 miheca 3 folad 1 romi’ad. Itinito ko pisatapng ningra a malasingsi i ’Amis a finacadan tahira i piliyasan ningra tonini a hkal a ma’orip.

O pinanam to sowal no ’Amis ato O pirocok to tayal a mifalic to Cudad. (學習阿美語著手聖經翻譯)

Kona o papasifana’ ci Afan to sapina’on to tireng a midipot, ta maliyas ko adada. Nikawrira, tona malakapot cingra aci Toris Foksi a matayal i Madawdaw no Singko i, sacifaloco’ saan cingra to sapifalicaw to Sowal no Kawas a patalano’Amis. Ta ira ko pinanam ningra to sowal ato pinangan no’orip no ’Amis nai papinapina no kaying—ci Apong, ci ’Oseng, ci ’Oping. Tadamalalok ci Afan a minanam, saka mahmek ko cimacima i cingraan.

Yo mahrekto ko tayal ni Toris Foksi i 1965 hawi, miliyasto cingra to Taywan, ta ci Afan singsi to ko mirocokay to tatayalen a ma^min to sapifalic to Sowal no Kawas. O sakaci^pocaw no tayal, saka masacacay ci Afan a tayra i Tailand a kitakit a mikapot to sa’opo no Lin-KoKu i 1965 miheca, itira a malalicay ko tayraay aca a sayho to sapa’orip to sowal no Pangcah. Taloma’ sato i, malalicay cingra ato iing no ’Amis Ciwkay to sapisanga’ to tilid no ’Amis to saka calowayaw a mapa’orip ko sowal no ’Amis ato madama haca no Seng-Cin-Kong-Howi kona dmak, saka irato a malahci a mapalowad ko tilid no masa’Amisay pakayni i picaliw to tilid no Loma.

Iti:ya ho i 1956 miheca haw i, na iraayto ko “Pihtatanaman to tilid no ’Amis” sananay a codad a maasipto no salikaka, kirami ono ㄅㄆㄇㄈ ho a tilid kiraan. Masopsop ko 500 a sowal to nipasa’opoan to sowal no Pa’ilasen, Posko, Fakong, Ciwkangan, singko. 1966 hiheca to haw i, mafalicto a palanoLoma a tilid ko ananamen, saka irato ko “Fa^lohay a Pinanaman to tilid no ’Amis” sananay a codad a marina’. Orasaka, malipahak kita to nika irato no cidek a tilid no mita o misa’Amisay, o mamasarayray to a mapa’orip ko sowal ita o ’Amis. Nikawrira, o karorayan hawi, ona pisaliyaw haca a misalingtad a miraod to kiwkay no kasaniyaroaro’ a pasifana’ tona fa^lohay a tilid no ’Amis.

O nika dado^do no nipirina’ to kalocudad no ’Amis (阿美語出版品陸續問世)

O kakahmekan ko nitayalan na Afan ato marariday a midadamay to tayal ningra a kasakapot oya papinapina a foksi, o malahciay nangra a marina’ a codad hawi, 1966 mihecaan no aasipen a mamangay a ratoh—“Likat”, 1970 miheca no “Matay”, 1974 no“Fa^lohay a Katatlekan no Fangcalay Codad” (masasotiri’ ko tilid no ’Amis ato Holam), 1975 miheca no “Kayakay no Nga’ayay a Ratoh”, 1979 miheca no “’Olic”(masasotiri’ ko tilid no ’Amis ato Holam), 1981 miheca no “O polong no Fa^lohay a Katatlek ato cidek no Katlangay a Katatlek no Fangcalay Codad” ato Fangcalay a Radiw (masasotiri’ ko tilid no ’Amis ato Holam).

Nasaan hawi, Malinah ci Afan a tayraan i Sin-Cowang no Taypak i 1983 miheca, halo polong no lalosidan ningra a mahawikidto ningra. O saka saan hawi, hai mangata ako a maliso’ ko i Tokayay a malinahay a matayal ato micodaday a salikaka ato o kiwkay no misa’Amisay saan ko harateng no faloco’ ningra. Talacowa, mato matkeday ningra ko tatayalen to sapifalic to sowal no Kawas, kirami caay ka sawaden ningra ko nanga—toan ningra a tatayalen, o kdec hananay ningra ko safatel a ma’orip, o flon hananay ningra ko polong no dafong ningra to saka lahciaw a mirina’ to codad.

Onini hawi, o pisarocod no niyah a mirko tono Kawasan a patatodong i cingraan. Yo itinito i Taypak cingra i, malahciay a nirina’an ningra a codad hawi, 1986 miheca no “Amis Dictionary” (masasotiri’ to tilid no ’Amis, no Holam ato no Amilika) ato 1992 miheca no “O ’orip no ’Amis” (masasotiri’ to tilid no ’Amis, no Holam ato no Amilika) ato 1993 miheca no “365 a Kakimadan no Fangcalay Cudad”.

O nipifolsak to sapaloma to saki ’orip no ’Amis ato pirocok to rayray no to’as (撒播文化種子 傳承民族精神)

Yo ccay a romi’ad no 1993 a mihcaan, masadak ci Afan a talaroma a niyaro’ a ira ko dadmaken ningra, kirami itira cingra i lalan a mafahal a mastol no haiya cingra, tadatata’ang ko doka ningra, na paising cingra to tolo a folad hawi, tadasida’it ko safa ningra to fa’inayan ci Marko, saka alaanto no safa cingra a patala Amilika a paising, caay pakaala to pinapina a folad i, mangalef ko adada ni Afan singsi, saka pelek sato cingra. Talacowa caay a tala ni Afan singsi a manina’ ningra ko ma^minayto a mafalic a marina’ a Fangcalay Cudad i 1997 a mihcaan, kirami mato Sowal ni Yohani itira i Fangcalay Cudad, sowal sa, Tona mapatay ko ccay a sasafakan no ^mi i sra, saka malengaw cira a maloficto ko hci no minaloan nira. saan. So’linay, o tadamaanay ko nitayalan no ’orip ni Afan singsi, o matatodongay a tatahada’oc a kahmeken no mita o kasarayray.

Talacowa caay a tala ni Afan singsi a manina’ ningra ko ma^minayto a mafalic a marina’ a Fangcalay Cudad I 1997 a mihcaan, kirami mato Sowal ni Yohani itira i Fangcalay Cudad, sowal sa, “Tona mapatay ko ccay a sasafakan no ^mi i sra, saka malengaw cira a maloficto ko hci no minaloan nira,” saan.