'adipangpang

('adipangpang/蝴蝶)

kasasiromaroma 種類

Adihay ko kasasiromaroma no 'adipangpang.

romi'ad 氣候

'adipangpang

Siwkay

O 'orip no ‘adipangpang

O mafalicay a tireng a fao ko adipangpang, i 'orip nira i, ira ko sepat a kasasiroma no pafalican, nani nikakopa, o fao, o dadingis, ato maladipangpangay. Tadaci'icelay a malalifet konian a saka'orip, tinako sa i, caay kalecad ko kakaenen no fao ato adipangpang, saka caay kamala'afas ko malecaday a fao to kakaenen, o roma sato i, mitiwa'ay ko pafalican to saki tayal, ma'epoc a malaheci ko kasasiroma a tatayalen. Tadafangcalay ko pilamecan a fitoka no fao, saka caay pitolas a komaen ato misoped to sakaciicel. Caay kakomaen ko dadingis a milakec toya caayay pafangcal to sakalengaw a kasi'enawan. O ci sapikpikay ato ma'ikesay to a tireng saki pikopa ko adipangpang, o sakaci'epoc to mikenken a tatongotongodsa ko wawa.

Sahetoay i cecay tangasa i sepat a folad ko nika'orip no adipangpang, nikaorira, itini i palapalatan ato kasasiroma nira i, masasiromaay ko nika'orip. Itini i kadihekoan ato nikaadihay no kakaen i, kalamkam a malengaw ko adipangpang, saka kamoko'ay ko nika'orip nira, ano itini i kasi'enawan ato nikamiming no kakaen i, kakaya'ay ko nika'orip. O roma i,  tosa a folad ko nika'orip no ‘adipangpang, nikaorira, itini i milakecay to kasi'enawan a adipangpang i, kakaya'ay a tahira i pinapina a folad ko nika'orip.

kopa

Masasiromaay ko lalan no saki pikopa to nani kasasiroma no adipangpang, itini i papah, i cengo', ato i ci'im ko miki'adingan no pikopa'an. Anca itini i ngata no kilakilang ko miki'adingan, anca i, itini i sera ko pikopa'an. Anca, itini i ngala' no podac no kilang, i falo ato i ngala' no cengo' ko nipikopa'an. Sacecaycecay sanay ko nipikopa', anca maemin ko nipikopa', iraay to ko romaay a 'adipangpang, i kinacecay a mikopa i, masaso'ot ko nipikopa a patatingerongeroh. Roma sato i, o laleh no wina a 'adipangpang ko sapihiketaw to nipikopa'an i cowacowa, anca itini i mafolangay anca i ma'aditay ko nika limek maemin no nipikopa'an. Ira ho ko romaay a 'adipangpang, o micidekay a wayway ko nikapaytemek sanay a nipikopa' i sera.

Onih

O malaonih a 'orip nai kopa  han ko sa'ayaway a rayray. Roma sato i, i fafaed no kopa ko pikenken to padoc a talahekal. Kaorira, o roma a mikopaay i ngala' a 'adipangpang i, o mananamay a wayway no onih ko pikenken nani tatihi no kopa to padoc a talahekal. Ira ho ko micidekay a kasasiroma no 'adipangpang, o sapi'adingaw to mikaenay to kopa a fao ko nikakifetol no padoc, ta nani ilaloma' no kopa a miofang to papah ko onih a talahekal. Ira ho ko roma a kasasiroma no 'adipangpang, ano talahekal to nani kopa ko onih i, mikenken to padoc, ta caay pila'om. Saka caay ka'araw no 'ada ko kamaro'an nani osaw a padoc. Maherek a mikaen toya padoc i, ikor to komaen sa ko onih toya aro'an a pipalomaan. Caay kaadihay ko mikaenay to tireng no fao a onih. Tinako, i laloma' no Lycaenidae a kasasiroma, o Miletinae hananay a 'adipangpang i, o mikaenay to tireng no fao ko onih nangra. Tinako, o Aphidoidea hananay a fao ko nikaenan no onih no Taraka hamada hananay a 'adipangpang, o Coccoidea hananay a fao ko nikaenan no onih no Spalgis epius hananay a 'adipangpang. Tahira i kafo'edakan a 'orip i, tokak to nikarakat anca nikakaen ko onih, mili'ayaw to sapikafo'edak a mifalic to saka'oripan. I piteka to kapodacan i, misakonayatay ko tatirengan no onih a mipodac to telangay a podac nani tangal tahira i wikor, saikoray i, mipodac to podac no tangal, itini a maharek ko kapodacan. Ano kinacecay a mipodac ko onih i, malacecayay a kacomahadan, kinasepat tahira i kinaenem ko pipodac nira.

Ano matatongoday to ko onih i, tokak to nikakaen, misatiwatiway sato a misarakarakat a mikilim to kapodacan, i rarikor no papah ko papahiceraan nira. To saka nga'ay a micelak to sapihpik i kalaadipangpangan i, mikonayat ko onih to tatirengan a mitiri' to kakahad no kafo'eakan ano maedeng. Ano maketon to ko kafo'eakan i, sa'ayaway a misacalay to loma' ko onih, mikafit to ikoray a wa'ay nira toya calay a patanektek to tatirengan. Pararid sato ko onih a misacalacalay pasawili pasawanan, misakifotolay a safaot to calay a mikafit to tatirengan, ta mala'ayaway a dadingis. Edeng to cacay a romi'ad i, malingato to a maladadingis, itini i, ra^rad sa a mikonayat, makeced, maleto ko tatirengan noya mala'ayaway a dadingis. Ikor sato i, mangalef to a pararid ko pikonayat, ko kaced, ato leto no tatirengan, mapela' ko podac nani falohang, ta kalamkam sa a maco^co a tayra i teloc no tiyad. Saikor sato i, mikafit toya calay ko kakafit no teloc no tiyad, mifo'edak to saikoray a podac, ta maharek to a maladadingis.

Dadingis

Minengneng to fadic no dadingis i, mato ma'engeray ko tatirengan nira, kaorira, manga'ay a madiwmiw ko saka-sepat tahira i saka-enem a tonod no tiyad nira. Itini i, masasifodko piliyaw a misanga' to i laloma'ay no dadingis, paso'oren ko lalosidan no tatirengan noya ka'emangan ho a fao. Ta mala o sapasanga' to tatirengan no ma'ikesay a 'adipangpang. Maedeng to o mo'etep a romi'ad i, maharek to a comahad ko lalosidan no tatirengan no ma'ikesay a fao i laloma'ay no dadingis, ta masadak cira a tahekal.

Mala’adipangpang

Sahetoay i, itini i lafi tahira i papacem a masadak a tahekal ko ma'ikesay a adipangpang nani dadingis. I pisa'ayawan no ma'ikesay a adipangpang a masadak a tahekal i, masakaciwaci a mapela' ko fanges no dadingis i tangal ato i kolol. Do'edo sato i, mikonayat a tahekal ko 'ayaway a wa'ay nira, ta pasadaken nira ko makofolay a sapihpih ato maletoay a tiyad nani dadingis. Roma i, mikapet i la'eno no dadingis ko kaherekay a masodat a ma'ikesay a adipangpang, anoca itira i tanektekay a kamaro'an a mica'it to tatirengan nira. Pasayraen no adipangpang ko nanom no tiyad a micomod i olat no sapihpih, ta kakalamkam sato a mafohat ko makofolay a sapihpih. Ano mafohat to ko tosaay a sapihpih, pasadaken nira nani hemot ko maosaway a nanom. Ano matefad i sera ko adipangpang itini, anoca ira ko mitena'ay to sapihpih, ta caay pakafohat. Awaay to ko 'icel nira a mi'eferay. Ano maatekak to ko sapihpih, aira to ko 'icel no ma'ikesay a adipangpang a mi'eferay.