Yu Huilin Simpu

Yu Huilin Simpu (于惠霖神父，Rev. Urich Scherer, SMB)

Yu Huilin Simpu (Rev. Urich Scherer, SMB), i 1934 miheca 7 folad 13 romi’ad masofoc i Zurich no Switzerland, nano kaemang i laloma’an no Tingsokiw ko to’as, nanay i kiwkay ko tayal, nanoya micomod i Paylenkay minanaman mitilid, i 1955 miheca mikapot to Paylenkay, i 1961 miheca mapatireng mala Simpo.

Ci Yu Huilin Simpu i 1963 miheca tayni i Taywan, itira i Sincu minanam to sowal no kowaping, ta tayyra i Kakacawan no Posong midamaay to kiwkay a Simpu, citodong pasayra i no Payrang a pisinting. Satapangan mangilay ko sowal to no Payrang, o kakatawaan, tinako “kakarayan (tentong)” sacisowal sa “ Fadahong (Tenpong)” sato.

I 1966 miheca o nano pilongoc no Sokay i Switzerland, minokay i kitakit minanam to pakayniay no harateng no syakay ato mamitoor a patosokan sapicikeroh no kiwkay a tayal, i 1971 miheca tayni haca i Taywan, sa’ayaw itira i Tayciw Maryknollkay minanam to sowal a pitilidan, tosamiheca ko pinanam to no Kowaping ato Payrang a sowal. I 1974 miheca, patiko i Posong ci Yu Huilin Simpu, sa’ayaw itira cingra i Posong sa’etal kiwkay malamicokeray a citodongay, i 1984 miheca mipacarcar ko tayal i Fotod a kiwkay.

I 2008 miheca, paherek ko tayal ni Yu Huilin Simpu minokay tayra i Switzerland. I 2020 miheca 12 folad 31 romi’ad, paherek ko ’orip ni Yu Huilin Simpu i hekal i Switzerland.

I 1975 miheca, katayra ni Yu Huilin Simpu i Fotod i, tayra i kiwkay mikerid to pimisa, palecadan matiyaan ko wayway ato pinangan ningra ci Ji Soucang Simpu, matahidang aca cingra mipacarcar to kacitodong to kiwkay mikerid. Kaitiraan i Fotod, ci Yu Huilin Simpu malakapot ko ka’orip to itiraay salikaka, o talid to, konga to, o kakahongay to ko kaen to cecay romi’ad.

Ceda’ah ci Yu Huilin Simpu, o picikeroh to no Kowaping a sowal, o kapah nanoyaan sa miliyas to no ina a sowal, patongal sa no pisolot no kalodafong, nanoya sa masonol ko to’asan ponka no Tao finacadan.

I 1980 miheca, tayra i Takao ci Yu Huilin Simpu, caay ka sasinga’anga’ay ko Payrang ato Yincumin itira, o pisa’icel ni Yu Huilin Simpu saka ira ko nikafalic.

Kafana’en no tamdamdaw ci Yu Huilin Simpu o pakatawaay to tamdaw, i sa’ikoray pinokay ni Yu Huilin Simpu toya romi’ad, mato’ol ko salikaka, minanay ko salikaka no Siawkang kiwkay miliyaw ho a tayni patikol, saci sowal sa ci Yu Huilin Simpu: “miketon kako to sasowalen, o caacaayto pinokay kako a tayni ano dafak.” saan.

I 2020 miheca 12 folad 31 romi’ad, mapatay ci Yu Huilin Simpu i Switzerland, sa’ikoray ka foti’ ho i isingan saheto ono Payrang a sowal ko nika sasowalan, romadiw to miraradiwan no Taywan a radiw to “Sio pacing” sanay.