Towana foksi

Towana foksi (顏明福牧師)

I 1930 miheca masofoc i Kaheciday niyaro’ no Posong a tamdaw, itiya i 2009 miheca 2 folad 27 romi’ad miliyas to hekal a mapatay, 80 ko mihecaan ningra ma’orip itini hekal.

1951 miheca misawad cingra mitilid i Yusan sinkakoyin, i 1980 miheca milaheci to sawse no Tongfan sinkakoyin, itira i Fotod, Kaheciday, Taypi a niyaro’ ko rakat no pipatenakan to Ratoh no Kawas.

O sa’ayaway no Yincumin Tintisi tayraay i niyaro’ no Fotod kiwkay ci Towana foksi, nai 1951 miheca 7 folad 20 romi’ad herek no lahok itira i Tongcin ko kahiceraan, itira i Sifosya no imeng ko aro’, kaitira ningra i Fotod a mipatenak to Ratoh, tangasa i 1953 miheca 8 folad ta miliyas to Fotod.

Ono Dipong sa a sowal ko sapiparatoh ningra, o niyaro’ay no Fotod tamdaw ko mifalicay to sowal no Tao, sapiini ningra i o tilid ni Yohani a Fangcalay cudad ko patodongan a mipatenakan.

“Pasowal sa ci Yis i cangraan, ‘Katayra kamo i polong no hkal a patnak i tamdamdaw a ma^min to Nga'ayay Ratoh.’” (Marko 16:15)

“Saka, lowad sato ko nisawawaan a tayra i cowacowa a patnak to Nga'ayay Ratoh. Mikapot ko Tapang i cangraan a matayal. Pakaynien no Tapang i nipidmak nangra to kafahka'an ko nipipahapinang to nika o so'linay ko nipatnakan nangra a sowal.” (Marko 16:20)

Mahirateng ako, 21 no mihecaan ako itiya, onini a tosa a tilid no Fangcalay cudad, safaloco’ sanay to nanosowal ato piocor ni Luo Xianchun foksi ato ni James Sun foksi, mala sa’ayaway no yincumin a tayraay i Fotod niyaro’ mipatenakay a Tintosi matayalay no Kawas.

I 1951 miheca, o isi taliyok no Fotod itiya i, caay ko nga’ayay ko saki’orip, awaay ko maan to pilafinan ato kiwkay itiya. 21 ko mihecaan no mako itiya koyod sato kahemaway a losid miliyas to niyaro’, mikalic to tamina a tayra i Fotod, ira ko 12 no widi ko rakat i riyar tangasa i Tongcin no Fotod niyaro’. O pacereman to dafak itiya, ’aloman ko mifotingay i riyar no Tongcin i lawac no riyar, ala pasayni sa ko nengneng no mata i takowanan, nika awaay ko miraoday milicay takuwan, saka aro’ sa kako i lilis no riyar, mitala to aira ko mangalayay mitahidan takuwan a komaen. Nika awaay aca ko cecacecay milicayay mangalayay.

Sato’eman sato ko romi’ad, oya to awaay ko mikiharay takuwan, nanoya i, kitosor (to kneel) sa kako i tafotafokan a mitolon to Kawas, wata ko pihadidi to pades no salifet no faloco’, macahiw, maso’aw, malotay ko tireng, nanoya kihatiya sa to fafoy a mafoti’ i pacifaran.

Masalafii ko pirawraw no likes i tangila a miparac, o todong no pilood to tatirengan ako, kaheteng masanek ko tayi’ a fafoy ato piaekor nira, caayay to ka nga’ay ko foti’ masalafii, tongal han no malotayay a tireng. Caayho ka taedad ko romi’ad, ira ko cecay a fa’inayan micomod i pacifaran a tomayi’, mapalal koya itiraay a fafoy misafades sapilaliwan, matalaw kako to sapiri’angaw niira, miceli’ kako itaya a masetol koya tamdaw, pako kawas saan takuwan a mitahidang to imeng, mafana’ koya imeng takowa o nai Taywan tayniay tamdaw, sasida’it saan takuwan, mihamham padamso pakaen paka foti’ takowanan.

Toya dadaya mikansya kako to pikakawa no Kawas, milongoc mitolon kako to pisinting saki Fotod a tayal, nanay mafohat ko fawahan to sapaRatoh i Fotod, saka fana’ no Tao finacadan to Kawas, mala pa’orip a Kawas nangra. Talacowa, awaay ko cecacecay tamdaw mafanay takuwan, caayho ka fana’en nangra ko Rotoh no Kawas. Nika padadoedo han no Kawas pacekil ko kapah no niyaro’, mangalay milayap mikonling mikihatiya to paRatohay a tayal.

Matiya o sowal i Fangcalay cudad: “Nanoya, tahidangen ni Yis a misa'opo ko tosa ko safaw a tarokos. Paflien Ningra cangra to 'icel ato sakacitodong nangra a mifahfah to palafoay ato sapiadah to adadaay. Ta ocoren Ningra cangra a papipatnak to pakayniay i Kitakit no Kawas a ratoh, ato miadah to adadaay. Pasowal sa ci Yis i cangraan, ‘Ano mirakat kamo to niyaro' i, aka pitatoy to maan aca. Aka pitatoy to cokor ato lofoc ato kakaenen ato payso. Aka piala to sapatisod a riko'. Ano talacowacowa to i, ano i cowaayto a loma' ko makahiay a mihamham i tamowanan a tamdaw, ta itira han a maro' tangasa i piliyasan namo toya niyaro'.’” (Loka 9:1-4)

Sa’ayaw ako tayni i Fotod a patenak to Ratoh, o rakat ako a romakat to no tamdawan karotoday lalan, saka tayra roma a niyaro’, ta nai tini niyaro’ tayra toya niyaro’ a caay pitolas pasifana’ to Ratoh, maroray sa aro’ sa pahanhan, maso’aw nanom sa to i lalanay a nanom; tahira sa i niyaro’ o salikaka ko mihamhamay pakamaro’, o dadaya itira ko pipasowal to Ratoh no Kawas ato pakayniay pidemak ni Yis to kafahekaan a demak a kimad, pasifana’ cangraan a romadiw, ranikay ko fana’ no Tao tamdaw minanam, sapatek sa mitengil to pipaRatoh to sowal no Kawas.

O pipatenak to Ratoh no Kawas tahanini ira to ko 58 ko mihecaan, nano awaayay ko kiwkau mapatireng to ko 7 a kiwkay, ira to ko niyah Tao tamdaw a matayalay no Kawas, tada maolahay ko Kawas to Tao finacadan a tamdaw.

Maharateng, kaitiraan ho ako patenak to Ratoh i Fotod a tosaay a demak. Sakacecay a demak, mapakokot no a’sidan no pitilidan no Tongcin a Kongcantang a tamdaw, mingitangit to Cinpicongpo kao tatiihay tamdaw ko pararaw a patayen; nawhani o cecay a wawa mitiliday toya dafak pacakatan fayfay i romadiw to radiw no kiwkay pakoradiwen tono kitakit, malemed aca o kakeridan no imeng i Hongto o mitooray to Kawas a tamdaw, saka caay ka patayen ko ’orip.

Saka tosa a demak, pakokot ko isisiw no Fotod takowanan, o mikadihay to finawlan pakitolon a miadah to adadaay, saka caay ka patayra i isisiw mipaising saan takowanan, nika oya so’elinay ma’oripay a Kawas maparihaday Ningra kako. Matiya o sowal i Fangcalay cudad: “Milcad kiso i takowanan a makari'ang a mapades. Mafana' kiso to dmak ako a mapades a makari'ang itira i Antiyok, i Ikonium ato i Listra. Mahadidi ako konini a ma^min. Pa'oripen no Tapang kako a paliyas tonini a pades a ma^min.” (2 Timoti 3:11). “Pilongoc i Kawas to pipalmed Ningra to mari'angay i tamowanan. Pilongoc to pipalmed no Kawas cangraan. Aka pi'kak to tamdaw.” (Loma 12:14). “Onini ko sakapitahidang no Kawas tamowanan. Nawhani mahaenayto ci Kristo a misemsem to saki tamowanan. Malopi'arawan namo ko dmak Ningra. Saka, o dado^doen namo ko dmak Ningra.” (1 Pitoro 2:21).

Ira i faloco’ ako ko ngiha milicay takuwan “Ano cima namo ko cisiriay to smo'otay i, ano masiday ko ccay i, maanen namo saw? Laliwen ningra i pala koya siwa a polo' ira ko siwa a siri, ta tayra cingra a mikilim toya ccay a masidayay a siri tangasa i kakraan noya siri.”, orasaka caay sa pitolas micoracor takowanan mikilim to masidayay a suri, matiya o sowal no fanacalay cudad “Caay ko sapasneng ko nipipatnak ako to Nga'ayay Ratoh. O tatayatayalen aca ako konini. Ano caay pipatnak kako to Nga'ayay Ratoh i, o cacilafo kako.” Orasaka o nika’orip no mako o saki no Tapang a ’orip.