Si Hongtao Siwsi

Si Hongtao siwsi (薛弘道修士)

Si Hongtao siwsi (Br. Laurenz Schelbert, SMB, 1939-2022), i 1939 miheca 12 folad 7 romi’ad masofoc i Moddal no Switzerland, mipatirengay to mimingay katayalan to marar ko mama, orasaka nano kaemangan mananam to misamararay a fana’, misawad to cyukako matayal i kaysya tolo iheca, ci kompay to kicik. I 1967 miheca, matahidang ni Ou Siding siwsi, mikapot ci Ciyaste Simpu (Rev. Karl Stahli, SMB, 1937-2017) tayni i Taywan, tangsol sa tayra i Sincu minanam to kowaping a sowal.

I 1967 miheca, ci Lei Huamin sinpu (Rev. Franz Leimer, SMB, 1928-1997) i 1963 miheca patireng to pinanaman, o nihaydaan no Kiwikopo, songila’ mafalic ko pakapi i Kongtong kawkong a kicik pinanaman congsin, nika caay ka edeng ko sakatayal payso ato kadademakan, dengan o misamararay ato misakilangay a tosa ko iraay, cecay miheca ko pinanam, ci Si Hongtao siwsi citodong to pakakafitay to marar pisifana’, roma a misakilangay ci Huang Cingtai singsi ko citodongay pasifana’, no kikay ci Ma Fulin singsi ko citodongay pasifana’ay. Nawhani tadanga’ay ko nipipasifana’an, itiya mihecaan malayap patoroden no Posong siencenfo, midemak to pakoyocay yincumin minanam to kicik, malakangalayan ko milali’acaay.

I 1969 miheca, ci Si Hongtao siwsi citodong to no Kongtong kawkong kaysya a kakeridan ato pinanaman singsi, pacomod to nai Toic (Germany) kicik a pipasifana’ a pitodongay a tilid sapasifana’. I 1969 miheca tangasa 1976 mihecaan, ci Si Hongtao siwsi itira i Kongtong kawkong kikayka, misakilangayka ko kalasingsi, mi’eses to Kongtong kawkong mitiliday misanga’ to kafoti’an no adadaay, nanoya kacinganganan i loyok no Taywan itiya, tinako Taytong Senmo isingan, Taypi Kensin isingan, Makay isingan, Canghua isingan, Kalinko Menno isingan, Nongmin isingan citodongay, mitoro’ o Kongtong kawkong no nisanga’an a kafoti’an, masamatira, tangasa anini kasasowalen no tamdamdaw.

I 1976 miheca, ci Si Hongtao siwsi tayra i Kangle Tinsokiw citodong kakeridan no masakilangay, i 1986 miheca Kangle Tinsokiw mafalic to pala Tinsokiw kiwyi congsin a kakeridan, i 1990 miheca malinah tayra i Taypisi misafaloco’ay congsin Kowangcise citodongay, misa’icel to sapipasifana’ misanga’ ato piterekan. Roma i, halidamaay cingra to sakisyakay, mikapot to Taywan Tinsokiw sepalan fafahiyan padamaay yofayof, mikihatiya to pakayraan sakapot miliyangay to pirikec to pakiyaway a demak.

I 2005 miheca, ci Si Hongtao siwsi madadoedo tayra i Congko, Malaysiya, Singapore a pasadak to nifana’an a kicik, mikonling to Mitiya a tayal. I 2013 miheca, ci Si Hongtao siwsi mitahidang no Switzerland Sokay malakomong, itiya miliyas to 46 mihecaan a Taywan.

O sasowalen cingra, ci Si Hongtao siwsi palalanay ci Wurosi Simpuan (Rev. Josef Eugster, SMB) to saka cipalowaday sapiwi’awi’ to saripa’ a fana’. I pisintingan i Taywan i, malatiih ko tosor ni Wurosi Simpuan a marawraw i, pafelien ni Si Hongtao siwsi to cecay tilid ci Wurosi Simpuan “sakatangka’ no ikor” (Gesund in die Zukunfi) sanay a sakisaripa’ a tatilidan, nanoya micowat to ci Wurosi Simpu to “sakatangka’ nai saripa’ay” sanay a sifana’. Oroma sato, ci Si Hongtao siwsi o micikerohay to “Caytang hocin Ci Sucang sinpu ponka kiwiko kikingkay” a pipalowad.

I 2022 miheca 1 folad 6 romi’ad, ci Si Hongtao siwsi mapatay i Soyin no Paylenkay i Switzerland, tadamaan ko pipasifana’ ningra to kikayan ato misakilangay kicik i Posong, ato ma’imaray ko pipasifana’ a faloco’, tangasa anini mateli i faloco’ no mitiliday.