Satapangan ira ko salisin to hafay
Satapangan ira ko salisin to hafay （粟祭起源）
Tadamakadofah ko lisain ato pinangan i ’orip no Pangcah, o kahacecay a finacadan maemin ira ko sapisalisin a demak, pakayni to polong a finacadan, roma i madenga ko paytemek, anca ano malecad malacecay ko kahacecay no masakapotay a tamdaw i pisalisinan to i, maemin midoedo to lisin mileca to lekakawa. Pakayni i salisin no Yincomin i Taywan no kawakwasan a sowal ira kono pitooran ato pisalisin a tatodong, mararid ato ’icel no kawakawasan a marariting, malopidoedoan to tanengnengan a ma’orip tona hekal, ira ko ’icel no kawas a pipadang ato mapalemed no kawas sa, saka o kawas ato tamdaw ira to ko katatelek, onini ko litapangan to pisalisin a demak koni. Itrini i salisin a sowal no kawakawasan i, mangaay to mahapinang ko kasafinacadan no Yincomin no Taywan to karariting no tamdaw ato kawas hananay ato pakayniay to pitooran a demak, malasakangaay ho mahapinang a minengneng to kasa’etal ato cakalecad ko pala no ka’oripan, malasakapalowad ko katadamaan no kasasiroma no finacadan a salisin no demak.
Tinako to lilengatan no hafay pisalisin no Pangcah, itini i codad no kawakawasa a sowal ira masowal o calowayay to serangawan a tamdaw i hekal tayra i kakarayan minanamay to no kawasan sapisalisin to sakafangcal no lingad a demak, maherek patiko to minokay, nano itiya misatapang to ira to ko sapisalisin a demak no tamdaw, No telangan ho a mihecaan, Kakomodan Sapatorok a kawas maepod itini. caho caho mafirang to riyar misatapang to mahengheng, Kakomodan Sapatorok a kaws tangsol to minokay talakakarayan, nika o wawa nira ci Sera ato ci Nakaw mikalic to dodang milaliw tayra i Cilangasan, saenger sato itira a paloma’, matenes to raramod sato a tatosa. Milalang ko kawas mararamod ko malekakaay, nika o awaay to ko fafana’en koni a demak, ira ko talaw nangra maketer no kawas, saka o manmaan mina’on cangra, orasaka ca saca pakakera to pades cangra. Iko to makera nangra ko hafay, ciwawa to lalima, safangcal sa malemed ko ’orip nangra. Harateng sato ci Sera ato ci Nakaw, hatini ko nika fangcal malemed ko ’orip, o painian to no kawas a madipot, ano halo piaray a mita’ong a demak mafokil, o mamaaketon to a molahad ko pinaloma sato, orasaka ocor hanto ci Tomay Masera,Tapang Masera tatosa fa’inayan a wawa, tayra i pito’asan a minanam. Mitoor to to sowal no kawas mafana’ to sakilisin a demak ato rarekoen, saheto sakitini no panayan a kawas ato no sakito’as a kawas ko mirekoan a demak.
Itini tonina sakilisin a sowal no kawakawasan, tadamahapinang no mita ko kinaira no sapaloma ato sakilisin no tamdaw, maemin na iromaay a kanatal pafelian, o sapiarayaw ato pinanay makadofah to laday, orasaka misalisin ko tamdaw a mita’ong mingodo ko faloco’ ato sakacaciyawan malalicay to kawas, itini mikitado toni a kawas patalahekal to no faloco’an a mingodo. O lisin hananay milecad to no finacadan a kawas mararitiriting to, mangaay kita pakaynien to sowal no kawasan to pisalisin a minengneng to rayray a kawas no kasafinacadan ato pitooran a kawas.
Pi’arawan to lakaw
[mikawit | o yin-se-ma no pisinanot]- 李景崇，1998，《阿美族歷史》，臺北：師大書苑。
- 達西烏拉彎‧畢馬，2001，《臺灣的原住民 : 阿美族》，臺北：臺原。
- 黄宣衞，2008，《阿美族》，臺北：三民。
- 巴奈‧母路，2010，《阿美族祭儀中的聲影》，花蓮：東華大學原住民民族學院。