Saasik ni mamo:
Saasik ni mamo:(阿嬤的掃把)
[mikawit | o yin-se-ma no pisinanot]Saasik ni mamo:-Tingting.(阿美族阿嬤的掃把-芒草)
Ira ko cecay romi’ad, malitemoh ako koya mato’asay a mamo (ama:), mateli ko kawkaw ato takamayan i takoyodan, licay han ako: “Mamo, tatalacowa kiso?” paca’of sa ci mamo: “Talalotok kako a mitingting, sasanga’en no mako to saasik.” saan, faheka kako pakatengil a milicay: “Adihay i sa’acaay i, tayra ho kiso i lotok a mitingting, kalifotan i.” paca’of sa ci mamo: “Caay ka nga’ay ko no mi’acaan, o no malengaway i pala a nisanga’an saasik ko nga’ayay kalosaasik.” saan.
Kafahekaan ako ko paca’of noya mato’asay a mamo, mamisanga’ cingra to saasik i, oya nai malengaway i palapalaan a malengaway a tingting ato no to’asan nisanga’an ko nihaenan ningra, o pinengneng no mako, o tada mi’imeray midotoc ho cingra to no to’asan lekakawa no ’Amis ko nisatolan.
Kacitingtingan a palapatan, i saka 10 folad miteka a ci po’eni, ta ciporaw tangasa 12 a folad, mangalef i piporangan a romi’ad, fangcal a nengnengen ko poraw nira, ano i ’apilis no lotok, lalan no omah, pirarakatan a pala, sakohecal sa a nengnengen itira ko kaporaw, itiya i kaporangan manga’ay a minengneng.
O ’Amis a finacadan, militado to malengaway i palapalaan a iraay a tingting ko sapisanga’ to kalosaasik no loma’, kahemaway tatoyen, fangsis ko sanek a lomaingay, o cialafohay laloma’an makorac nira asiken.
O fenek no mato’asay i ’orip. (老一輩人的生活智慧)
[mikawit | o yin-se-ma no pisinanot]Maharateng i kaemangan ho no mako, ira aca macait ko saasik i kalimoco’ no loma’. Orasaka itini i Notimolan kalokanatal a finacadan ira ko malecaday to no ’Amis a lekakawa, o cecay no saasik todongay onol no laloma’an a ina, saka ira no loma’ o iraay ko ina, o cecay no saasik misolimetay to laloma’an, o cecay no saasik o sapipalahad to fenek no wawa a midimokos to loma.
O roma sato, I’ayaway ’orip no ’Amis, ira aca manengneng ko saasik mateli i laeno no takar, tona mamafoti’ ko tamdaw o saasik no tingting ko sapitihtih to alafoh no wa’ay, o todong pitihtih a mifahfah to karetengay no wa’ay, itiya manga’ay micomod i rihadayay a foti’ no dadaya, o mirocokay to to’as no ’Amis ko tingting saasik ni mamo.