Pisacepo’ a kimad no ’Amis

Pisacepo’ a kimad no ’Amis - Fafahiyan kanatal (阿美族海祭的神話故事之一-女人國)

Itiya: ho, ira ko cecay a kapah to fa’inayan ci Maciwciw ko ngangan nira, malalokay matayal to romi’ami’ad. Ira ko cecay romi’ad, matiya to romi’ad tayra i omah matayal, talifahalan sa makereng ko ’orad. O katata’ang no ’orad, tata’ak ko nanom no ’alo, saranikay milikid ko nanom malenlen ko sekal, oya sato ci Maciwciw maala to no cedas ma’alol tayra i riyar. Manga’ay aca matatoy cingra ko cecay a kilang a datong, caay aca ka ’alol cingra.

Halafin ko romi’ad, malikid no riyar ci Maciwciw patayra toya kafokilan a kanatal, ano nengnengen pamatiyaan o niyaro’ ningra, nanoya miteka cingra misolap o aira ko niyaro’ hakiya sato. Halafin ko rakat ni Maciwciw, awaay manengneng ko tamdaw. maroray to ko rakat ningra, saka itira cingra toya cecay a kilang pahanhan, nanoya sa a maleda’.

Kaoratang ningra i, mato iraay matengil ko soni no romakatay a ’alomanay tamdaw, pasayra i cingraan a miraod. Talafahal sa talipa’elal ci Maciwciw, nengneng han ningra ’aloman ko tamdaw mitaliyokay cingraan tamdaw mitatoy to po’ot ato ’idoc, katiwa’an ningra: onini a tamdaw saheto sa o fafahiyan.

O cecay sanengsengay fafahiyan nangra pasowal sa: “O maanan a ci polotay, mana awaay manengneng I’ayaw? Nika nengneng han mato manga’ayay kaenen kina saw.” Pakatengil ci Maciwciw i, talaw sato.

Sapilaliwan ci Maciwciw itiya, masapinang to noya fafahiyan, sakalamkam sato miala to sapifedfed cingraan, ta panokay hanto noya fafahiyan a panokay tayra i niyaro’. masapinang no Maciwciw awaay ko fa’inanay no niyaro’, saheto o fafahiyan ko citodongay to tayal. Saka citelocaw nangra to wawa i tadamaan ko pidemak nangra, sakaciwawaaw to wawa a tamdaw manga’ay tayra toya takaraway lotok no niyaro’, micelak to kamay a pasifali, mapafali ko kamay, pakayra sa i padahaw masadak ko cecay a wawa. masamatira, malimaan cangra to fa’inayan, nanoya caay ho pakanengneng cangra to masamaanay ko fa’inayan.   

Rofoen nangra ci Maciwciw i ray no niyaro’, halafin, ira ko cecay sanengsengay a fafahiyan, kangodoen no ’alomanay fafahiyan cingra. Harateng sa ci Maciwciw: “Alatek o kakeridan nonini niyaro’ ko nafafahiyan.” saan, nengneng han nonini a kakeridan ci Maciwciw, sowal sa: “Matokaeso’ay kaenen konini polotay a tamdaw, nika makodos tato. Pasoesoen ho pakaen, itiya to kaeso’ kaenen.” saan, pasowal han to ningra koya tatihiay tamdaw patorod tonini a demak, ta liyas sato. Caay ho pitengil to pilongoc ni Maciwciw, miliyas to i cingraan.

Saka tosa romi’ad, maraod to ko kakomaenan, ira mipawsa ko cecay fafahiyan, mato kaeso’ay koya kakaenen. caay ka adihay ko nikaenan ni Maciwciw, nawhani matalaw cingra to kasoesoan a makaenaw. Sapilaliwan ci Maciwciw, nika tanektek ko pirofoan. Ikor, masapinang to ni Maciwciw oya a fafahiyan koya mipawsaay, mato koda’itay nengnengen kora fafahiyan, saka cisalongoc to cingra tora fafahiyan.  

Ira ko cecay romi’ad, oya to ko pipawsa to kakaenen konini a fafahiyan, pasowal han ni Maciwciw, to sapipadang noni fafahiyan. Pakatengil to pasowal ni Maciwciw, safaheka saan, masapinang o tamdaw aca ci Maciwciw sato itiya, nanoya hai hanto ko longoc ni Maciwciw, tangasa toya lafii, o po’ot ko sapipeleng a mikari’ang toya pirofoan, pasayra to i riyar a milaliw.  

Tangasa i lawac no riyar i, manengneng ni Maciwciw ko adihayay a dawdaw pasayra i cingraan milaop, kalah sato ko faloco’ ningra, samaaanen ako ko nga’ay hakiya saho. Fahal sa ira masadak nai riyar ko cecay a ’iso, pasowal sa ci Maciwciwan: “O widang noya fafahiyan kako, cingra ko paocoray takowan pa’orip i tisowan.” han nira.

Safol sato ci Maciwciw micakod tayra i korod no ’iso, opoh sato koya ’iso pasiriyar midangoy. Talacowan samaamaanen to noya fafahiyan a miferet to sakotang, ’idoc, ato mi’iwas to tamina mingata i, nga’ay aca madopoh ko pidangoy no ’iso, milaopay a hitay caay to pakalaop; sanga’ay sato ko pilaliw ni Maciwciw, ta caay to kala o kakaenen no kakeridan no fafahiyan.

Maala to no ’iso ci Maciwciw patayra i niyaro’, macakat talasekal ci Maciwciw caay ka takop ko piahowidaw, pasiriyar to koya ’iso. Tahira ci Maciwciw i niyaro’ i, itiya a mafana’ pina:ay to mo’etep ko mihecaan piliyas ningra; o mafana’ay cingraan a tamdaw caay to ka papina.

O sapiahowidaw ningra to pa’orip noya fafahiyan ato ’iso, to mihecahecaan tayra ci Maciwciw itira i kacakatan talasekal a riyar, o ’icep, toron ato epah ko sapiharateng a pacakat i cangraan.