Pipaka’orad a lisin no ’Amis

Pipaka’orad a lisin no ’Amis (祈雨祭的儀式及由來)

I’ayaway a finawlan tamdaw, caay ka rahoday to saki’orip, awaay ko pisopedan to nanom ano eca picayatan to nanom, saka palingata sa i cinemnemay ko pipaloma’, manga’ay a miradom. O pinaloma i, litado sa to ka’oradan micefos to pinaloma, ano malitemoh to ko kakedalan a romi’ad, caay ka nga’ay to saki’orip no finacadan.

Paka’orad to ko niyaro’ no ’Amis. Radiw.

“O yiyo o hoay, hahihay. Hayo ngongay, hahihay.

O yiyana ngangay, ha-hi-hay. O yiyana ngangay, ha-hi-hay. O yiyana ngangay, ha-hi-hay.

O yiyana ngangay, ha-hi-hay. O yiyana ngangay, ha-hi-hay. O yiyana ngangay, ha-hi-hay.

O yiya ho hoay, hahiyahay. Hayyi hiay, hahiyahay. Hay yo hoay, hahiyahay. Hiya hiay, hahiyahay.

Pataynien ko a’oraden, hahi hay. Pataynien ko a’oraden, hahi hay. Pataynien ko a’oraden, hahi hay.

Nanitimolay ko a’oraren, hahi hay. Nanietipay ko a’oraren, hahi hay.

Nani’amisay ko a’oraren, hahi hay. Naniwaliay ko a’oraren, hahi hay.”

Tona mararid ko kacidal no romi’ad saka, ma'icang ko sera, mafadi’ mapatayto ko pinaloma ato pina'orip, mikilim ko tamdaw to piradoman.

Marawraw ko finawlan to nika awa no nanom. Itiya i, masasowal to ko kakitaan ato kalas no niyaro’, mikomod to finawlan no niyaro’ palimo’ot to pipaka’oradan lisin a romi’ad, o midemakay to pipaka’oradan a lisin i, oya mato’asay no niyaro’ maponengay fafahiyan ko citodongay midemak toni a lisin.

Itiya i, ocoren no mama no kapah ko pakarongay no niyaro’ tayra i lotok a miala to koliya’ a kilang, ’akaway fila’, papah no aloloay, ato lengac, lolod han malo sapi’acaw midemak, nanoya o kakitaan no niyaro’ ko pafeliay to fafahiyan no niyaro’ ato maponengay fafahiyan tayra i ’alo ano eca cinanomay a nemnem, mitatoy to koliya’ ato lengac ko sapiwatawat.

Dengan o fafahiyan aca, tatiih mikihatiya kofa’inayan ato ka’emangay a miki’araw. Pidemakan itiya, caay ka ciriko’ ko maponengay fafahiyan a mawacay, sacipa’araw saheca, patelien ko koliya i sasifo’ a mitaliyok, o roma cifa’inayay a fafahiyan itira i lawac no maponengay fafahiyan, miwatawat to lengac misapeti’ to nanom, pasilaloma’ micefos i tatirengan no maponengay fafahiyan, itiya milaha’ a romadiw to sapaka’orad a radiw ko maponengay fafahiyan, papotalay fafahiyan milecad a romadiw, mipacpac to nanom, micefos pasimaponengay ko demak. matiniay paka’orad a demak sapanengneng to kawas no nanom, pakanengneng to i hekalay a tamdaw a tomangic o pingitangit to kawas no kakarayan pafeli to o’ol, o ’orad ko sapilesi’ a micepa’ to sera.

Nengnengen han cangra i, matiya o misalamaay to nanom a kaemangay ko nidemakan nangra.

Matiniay a pipaka’ord a lisin, kina tolo, kina lima a mitiko midemak, tangasa ira ko pipaca’of no kawas i kakarayan. Pakatengil ko kawas no kakarayan to pingitangit no tamdaw, nengneng han pasi’etip ko lotok, mato sato’eman sa ko lotok a madodem, saka ’oradan, nika awaay matengil ko kakereng no kakarayan, awaay ko katefad no ’orad.

Nanoya, saka tosa lomi’ad, miliyaw haca midemak a paka’orad, tangasa matengil ko kakeleng, makereng ko ’orad. Mahaen ko dmak no pisa'orad hananay.