Pili'alac ato Pakelag no ’Amis.

Pili'alac ato Pakelag no ’Amis (阿美族在婚喪後的漁撈儀式)

O li'alac hananay i, o todong pipaherekan no ’Amis i pararamod a demak. Itiyaay ho ’Amis a finacadan tamdaw, midemak ko loma’ to pararamod to wawa i, na ikoran no pararamodan ikor a romi’ad, ira aca ko mili’alac sanay a demak no loma’. I pidemak no ’Amis to kararamodan i, itira i kaawaayan no tastayalen no tosaay laloma’an ko piketon to pararamodan a romi’ad, orasaka i pipaherekan pararamod no tasaay laloma’an itiya, ira ko li’alac hananay paherekan a demak, ta manga’ay ko tosaay laloma’an padoedo to tatayalan no loma’.

Roma to i, itini i niyaro’, ira ko fa’elohay ciloma’ay loma’ ano eca o mifadicay to loma’ a loma, mangalay ko loma’ to mipadangay, saka mitahidang to niyah a sangasaw (ano eca o tamdaw no niyaro’) a mipadang, ano maherek to ko demak, o piahowid no laloma’an to pipadang no sangasaw, mipatala ko laloma’an to sapakalafi, mipacok to fafoy sapakaen to ’alomanay. Saka toso romi’ad i, ira aca ko li’alac hananay a demak.

Nanoya i, lipahak ko fiyafiyaw ato malininaay ato widawidang to nika maherek to mapatireng ko loma' i, itiya, mipadang ko matayalay a misaloma', saka, ala pasadasadak a maemin to hemay (hakhak, o toron) a cango’ot ko sapakalafi to matayalay ato lafang saan. Mipateko (tateko) han konini a mipafeliay to hemay. O datengto a cecay ko nisaadihayan a mitangtang.

Saka tosa romi’ad to dafak, tosaay laloma’an mitahidang to sangasaw tayni loma’ a maranam, maherek maranam, pasowal ko faki no loma’, mali'alac anini romi’ad sanay a sowal, saka o malininaay no sangasaw tayra i ’alo ano eca tayra i riyar mifoting, micekiw ano eca mikalang, midongec, ira ko todong to sapakaen to mato’asay, mikihatiya ko sangasaw milininaay a malafi malipahak lomadiw a masakero.

Orasaka, mali’alac hananay o todong kalipahakan a romi’ad. Roma sato, ano maherek to ko pilitodan a demak i, ira ko mali’alac a demak. O paherekan no lipahakay a demak no loma' ko li'alac hananay.

O pakelang hananay i, malecad ato li'alac ko tatodong no pakelang hananay. Nikawrira, o saki no mapatayay a li'alac ko “pakelang” hananay. Ano mapaherek ko pitadem i, mipakelang to sapakalafi to mato'asay no malininaay ato paro no loma' a mihinom to rarom no faloco' no malininaay a maemin. Saka, o paherek no pitadem to mapatayay, caay ka eca o mamipakelang a tala 'alo ano eca i riyar a mifoting to sapakalafi to mato'asay no ngangasawan ato iraay a mihayomay a tamdaw. O mahaenay ko tatodong no pipakelang hananay.

Aniniay a niyaro’ to li’alac ato pakelang sanay a pifoting a demak, matifac to i kasasiroma no pitooran to Keristokiw saka malasawad to ko no kasaniyaro’ a pikihatiya, padengan sato nio salaloma’an to a sangasaw ko pidemak. Roma, ’ayaway a pili’alac ato pakelang sanay a pifoting, palecad o pakelang sanay to ko pisowal.