Patikoen ko sera no yincuminco
Patikoen ko sera no yincuminco (原住民族還我土地)
[mikawit | o yin-se-ma no pisinanot]I 1988 miheca 8 folad 25 romi’ad, “Taywan yincuminco patikoen ko sera no mako onto no katatekoan” matakos ko rafasay 2000 kasafinacadan no yincumin, milongoc to sakacisera a salongoc, itira i lalan no Taypi mirakat, oya a demak o ikoray to nika tedal to no pi’emec, o sata’akay syakay onto no yincumin u Taywan.
Taywan Yincuminco salongoc yofayof (臺灣原住民族權利促進會)
[mikawit | o yin-se-ma no pisinanot]Kahecalay katalawan a to’ek mihecaan, i 1950 miheca wata ko pipenec no mikowanay a KMT to onto no yincumin, ci Uong'e Yatauyungana (Kao Yiseng), Yapasuyongʉ Yulunana (Tang Shouren), Losing Watan (Lin Ruichang) a kakeridan no yincumin, mapakokot no misolapay imeng to tatiihay tamdaw saan a patayen.
Tangasa i 1980 mihecaan, itiya to nano nipilongoc finawlan no Taywan ci pakoniraay nikalongan salongoc, malengat to ko onto no syakay, saka i mapalihaw ko onto i finawlan no yincuminco.
1984 miheca, cinganganay a maradiway no yincumin ato ontoay ci Parangalan (Hu Defu), Icyang Parod, Tulbus Tamapima a tamdaw, palowad patireng to “Taywan Yincuminco salongoc yofayof”, oya ci Parangalan (Hu Defu) ko sarakatay a kakeridan itiya.
Ikor patireng ko Yincienhuy to casi, kinapinapina a palowad to syakay onto, salongoc piteleng to “mangahay kawasan Wu fong”, miliyang to paoning notilifi mikiki palatiih to yincumin. I 1987 miheca, Yincienhuy mihapiw to “Niketonan salongoc no Yincuminco i Taywan”, pasadak to halo sapikapot mikihatiya to sician salongoc, sera salongoc, pihamon no niyah, patikoen to kacingangan no finacadan, patodong to sowal no ina ato sapirocok to ponka a nilongocan ira ko 17 ko tosir.
Patikoen ko sera a onto (還我土地運動)
[mikawit | o yin-se-ma no pisinanot]I 1988 miheca, to hatiay o yincienhuy matatahic to marariday saki niyaro’ no yincumin a Taywan Kristo ciwlo kiwkay, kasasolsol to kasacefang ato kiwkay no yincumin, misakapot to “Taywan yincuminco patikoen ko sera no mako onto no katatekoan”, saka toya mihecaan 8 folad 25 romi’ad palowad to “Patikoen ko sera a pirarakat”, marafas to 2000 ko tamdaw mapalalay ko pikihatiya, pasi sifo ko pilongoc patikolen ko noto’asan safal no yincuminco.
Sakatosa miheca (1989) 9 folad 27 romi’ad, oya sa a katatekoan o “sakaci’orip ko sera”, “O ina ko sera” sanay a laha, palowad to “mifariing haca patikoen ko sera” a pirarakat. I 1993 miheca 12 folad 10 romi’ad, o “yincuminco patikoen ko sera no mako onto no katatekoan” palowad to saka tolo pirarakat, kao “miliyang to picalap, milongoc to saka’orip, patikoen ko sera ako” sanay salongoc, o citodongay to sakowan to tataparan ko yincuminco, pasadak to 4 salongoc:
1. Kacingangan to yincumin ko sanpaw.
2. Patodongen to sakacisera salongoc.
3. Patirengen i kacitodong a patekedan demak.
4. Oniyah a yincumin ko mikowanay.
Kinatoloay to “patikoen ko sera ako” ko pirarakat, malisaot ko ’aloanay kapah no yincumin mirarakat i lalan. I satakaraway midemakay to laloma’an matingkiay a tamdaw no yincumin i Taywan rafas 30 ’ofad, salongan ko tamdaw a misa’osi i, “Patikoen ko sera no mako a onto” sanay o naikoran no lalood o samakerihay syakay onto no yincumin.
Nao sanpaw pala yincumin (從山胞到原住民)
[mikawit | o yin-se-ma no pisinanot]“Patikoen ko sera no mako a onto” masapinang no mikowanay siikedan, palasapifalic to sician kalomaocan ko salongoc no syakay onto. I 1994 miheca, Mincintang pacomoden sakifalic to sician laocan ko “kacingangan ato niyah pikowan no yincumin”. Toya miheca 7 folad 28 romi’ad, saka 3 rekad pifalic to kimpo mahayda, mapatongal ko liyad to cimiepecay a “sanpaw” salofen pala “yincumin” han. I 2005 miheca, matelek no sifo ko “Tatapangan Rikec no Yincuminco a Finacadan”, o pahecian no yincumin syakay onto i Taywan a pirekec.
I 2016 miheca 8 folad 1 romi’ad o congtong ci Cai Yinwen misetek o romi’ad no yincuminco, midayhiw to sifo mili’ay to yincuminco, mihayda “kacowat rayray i, ikoray tayni a finawlan, micefisay to iraay no itiniay to a finawlan.” Miketon ci Cai Yinwen congtong, o raranikayen micikeroh ko sakisalongoc sakadama no rikec ko yincuminco a tayal.
I 2017 miheca yinminhuy mihapiw “yincuminco a sera ato liyokan no niyaro’ a sera fakeciwen pakayraan”, pakayni i yincuminco to’asan sofal sapifakeciw, matayoay to pinapina mihecaan i, maliyaw haca kalaliyangen. Maradiway ci Panai Kusui, Mayaw Biho a ontoay no yincumin masisaot itira i Katakelan halafin ko piliyang.
Nai 1987 miheca yincienhuy mihapiw to “Taywan niketonan salongoc no Yincuminco” hatiniay i, oya nihapiwen matisil ko 17 toris ko salongoc mala patenokan no harateng to saki syakay onto no yincuminco. Misa’icel to pinapina mihecaan, oya nisalongocan rara sato a malaheci, ira ho ko sasa’icelen. Tangasa anini, padoedo macowat ko syakay onto no yincumin, masararemrarem ko pidotoc ko pihajitiya, mala caayay to ko ka cicango’ot itini i kasasiromaroma a ponka i syakay no Taywan.
I rayray no romi’ad (8 folad 25 romi’ad)
Patikoen ko sera no yincuminco
Nipacipatay o Sin Taywan hepin kikingkay
Mifalicay ci Masao Nikar