Onto no pipa’orip to wawaayho a tasalamaan fafahiyan

Onto no pipa’orip to wawaayho a tasalamaan fafahiyan-talakal ni Idek a demak (救援雛妓運動「彩虹專案」)

Masapakoyoc ho ko kicay no yincumin no taywan itiya, ’aloman ko awaay ko todong a ciraraw a caayho karaod to 16 mihecaan a limecadan fafahiyan, o nika cango’ot to payso no mato’asay, mapacakay caira i tasalamaan i Huasici no Taypaksi, malatasalamaan fafahiyan. Matiya o kakaenen ko kalali’aca to tasalamaan, sakarenec no mato’asay to kacidafong, o sakarahekedaw to ’alip no mi’alipay tamdaw, itiraay i madamu, mili’acaay to tamdaw ato ta’alipan a misimaway ko kacitodong to sakacikinairaay.

O kasini’adaanay itira toya tirengan a fafahiyan no yincumin, i mipatangican cangra to kali’aca to ’alip, makelot awaay ko kinaira nangra, halo sakacipakoniraay ’orip awaay to.

Itiya i 1987 mihecaan, o lekapotay (Funi Since) ato kapah no yincumin, mitelek to sapipa’orip toya fafahiyan no yincumin, pakayni i “Funi Since” a sakapot ci Liao Biying, Cao Ailan papinapina tamdaw a milalicalicay masasowal, mitelek mitahidang to yincumin, kasakapot onto no fafahiyan, sakapot no salngoc, sapakot no pakayraan, sakapot no sician, ira ko 31 no lekapot ato citodongay, o “Talakal ni Idek a demak” ko pangangan, malekapot pangiha to “Miliyang to malali’acaay to tamdaw - -midama to wawaayho a tasalamaan fafahiyan” sanay.

Itira i 1987 miheca 1 folad 10 romi’ad, mikihatiya ko finawlan no syakay to “Talakal ni Idek a demak”, asa’opo i Longsanse ato Huasici no Taypak a miliyangay mirarakat ato misapatek a maro’, miliyang to pipakonira no sifo to “kalali’aca to tamdaw ato wawaayho a tasalamaan fafahiyan no yincumin”, nanoya tayra i Koylin imeng no Taypaksi pafali to iliyangay a tilid. Oninianan a lalowadan onto no syakay sarakatay mirarakat i lalan to midama to wawaayho a tasalamaan fafahiyan.

Itiya pirarakatan i, o finawlan no onto pakayra romakat cangra micod i pi’alipan lalan, mitaneng to kafadesan, kaacekan, kasomadan, kaceda’ahan no wawaayho a tasalamaan fafahiyan itira. Orasaka dengan o kaadada no faloco’, o piliyangan, finawlan no onto awaay ko sasowasowalen to demak no madamu, mili’acaay to tamdaw ato ta’alipan a misimaway.

Orasaka o itiyaay ho a rekec, mipakoniraay ho to pihakeno to rikec ko matiniay tamdaw; pi’epec patangic to kalali’aca to tasalamaan to fafahiyan o nipikokso no tamdaw, ano awaay ko mikoksoay, onini a mala madamuay, mili’acaay to tamdaw ato ta’alipan a misimaway caay ka citodong ko rikec. Saka oya nipa’acaan tayni a masawawaayho a ’a’alipen a wawa to fafahiyan, tona no loma’an ato nipi’epecan no tamdaw ko kalatiih, saka caay ka nga’ay mikokso, saka caay nga’ay pieca ka pa’alip, ikaka to nika pikiraromotan no tamdamdaw ko kafades, patangic han no madamu, mili’acaay to tamdaw ato ta’alipan a misimaway ko sapiliyas to pisetek no sarikec.

Orasaka pakayni to piliyang a mirarakat, o sakapot no syakay onto tayra heca i mitomadaway (Ciencayin) mingitangit, miliyang to katadanca no imeng, “midama to wawaayho a tasalamaan fafahiyan” a onto malosakasasowalen to no finawlan no syakay, misahiraterateng to ko finawlan to sician to saki “salongoc no tamdaw a harateng”, “sapakonira no tamdaw”, “ o mo’ecel no rikec” a sasafaloco’en, saka i 1988 miheca 3 folad, o nikapiepec no icowacowaay a no syakay ko malaimengay, patireng to to “Cenfong conan”, midemak to sapirepeta to malali’acaay to tamdaw, mipa’orip to wawaayho a tasalamaan fafahiyan.

Saka tosa miheca i 1988 miheca 1 folad 9 folad, o “piliyaw misetol to pa’orip to wawaayho a tasalamaan fafahiyan” sanay a onto, oya Funi Since ato yincumin solongoc a yofayof misetek to piliyaw mipa’orip sanay a lalowadan, o takaraway lekapot no Mincitang ci Payan ko citodongay malakakeridan, nanay mapadama niyam sanay a tilid ko todong no sakapot no Funi since a tilid.

I ’ayaw no piliyang no dademaken i, tayra ho kako i Tihuaci mi’aca to kiladom to malocalay, oya pa’acaay to kiladom a tawki, caay to piai to ’aca a midama tonini a lalowadan no demak, micoker takowanan. Nawhani o paini no paromi’aday a paratoh toya romi’ad o mamaorad sanay ningra, itira kako i kadademakan no Mincintang a kalomaocan itya, tasoay romi’ad ko pitilid ak to kalocalay a tilid ta malepon, malosaka cacayaten no mirarakatay no syakay sakapot, nao 31 sakapot matongal to tangasa 55 ko kasakapot ko mikihatiyaay, saheto o no makoay a cecay a mitilidan itiya.

Onini a demak o ’ayaway no 38 mihecaan koni, miliyaw haa miripa’ to Huasici lalan a miliyang, o sapipa’orip to wawaayho a tasalamaan fafahiyan.

Pihiratengan anini romi’ad – 1/10