O pipana’ to cidal a kawakawasan kimad

O pipana’ to cidal a kawakawasan kimad (射日神話故事)

Iti:ya ho i, tosaay ko cidal i kakarayan, cacorok sa patedi to hekal. Orasaka, awaay ko todong to romi’ad adadya i sekal, mafadi’ to ko kilakilang rengorengos, ma’icang to ko nanom no ’alo, caay to ka molengaw ko pinaloma, saka mapades ko tamdaw to saka’orip, malowan to pinaloma cango’ot to kakaenen ko tamdaw.  

Nanoya masasowasowal to ko tamdamdaw to sapipalasawadaw to cecay a cidal. Itiya ira ko tatoloay macodahay a kapah tayra milood toya cidal. Saka mihawikid cangra to kakaenen, ala mifafa saan cangra to kaemangay a wawa. nanoya lomowad to pasayra cangra toya piloodan a lalan.

I karomakatan nangra a tala’ayaw, halo pipaloma han to mamo’ ato mifolesak to panay, kalo lalitoden a minokay. Nanoya mata’elif to ko romi’ad, mihecaan ko nirakatan i, caay ka rahoday rakaten nangra koya sacokacok tonotono’an a lalan. Nikawrira, ha:to caay ho katahira toya kasadakan no cidal, wata ko nikaraay rakaten. Oya sato tatoloay a kapah i, to’as sato i fatad karomakatan ho no lalan, dadoedo sato a mapatay itiya.

Katala’ayawan ho a nifafaan a kaemangay wawa i, masakapah to ko to’as nangra. Padoedo cangra a midotoc to caayay ho kalaheci noya mato’asay, padoedo sa tala’ayaw ko rakat.

Orasaka tahira to cangra toya kasadakan no cidal, misetek to cangra i sakatosa romi’ad ko pipana’ toya cidal. Mara’od sato ko sakatosa romi’ad to kanikaran to dafak, ala mitatoy cangra to pana’, misitara i la’ed no lotok, mitala to kasadak no cidal, nanoya i kasadakan no cidal toya i patama han nangra tatolo ko cecay a cidal mipana’, oya fa’edetay remes no cidal pasilawac a ma’efer mitesi’. O cecay a tamdaw mapara’oteng noya fa’edetay remes, nanoya sa a mapatay, oya tatosaay mapacedet a madoka’ ko tatirengan.

Malaheci to ko demak i, pasiloma’ to cangra ko rakat a minokay, oya katala’ayawan nipalomaan a mami’ i mato’as to, malofic ko kaciheci. Tahira cangra i niyaro’ i, o ma’ofad to ko fokes a mato’asay to.

Nanoya pipana’ nangra toya cecay a cidal i, malowan to ko tedi ato fa’edet noya cidal, dadaya i masadak to ko cidal. Oya matapesi’ay remas i, malafo’is to falatfat i kakarayan. Nanoya masapinang to ko romi’ad ato dadaya, sanga’ay sato ko ’orip no tamdamdaw itiya.