O pinengneng to ilisin (2)
O pinengneng to ilisin (2) (對豐年祭的一些看法(二))
[mikawit | o yin-se-ma no pisinanot]I’ayaw no ilisin ira ko pisacepo’ a lisin. (舉行豐年祭以前先行「海祭」)
[mikawit | o yin-se-ma no pisinanot]Pakayniay kimad no Alikakay, pahapinang no ilisin i nai “sacepo’an” ko pitekaan. O niyaro’ no ’Amis i ’ayaw no ilisin a romi’ad, ira ko pidemak to “pisacepo’” a lisin. Midemak ko kasaniyaro’ to pisacepo’an to kaitiraan ato romi’ad caay ka lecad; pidemak to caay ka lecad. Roma a niyaro’ itira i riyar ano eca i ’alo mipatireng to ngayangay, pidemakan to pipacakatan, ira ko tolo romi’ad tosa ko dadaya, itira mifoting, mi’afar. Pahapinang to pipacakat to kawas no riyar, roma o todong pinanam no kapah ma’orip i papotal. Roma a niyaro’, cecay k romi’ad to pidemak, misetikan no kapah to foting ’afar malo sakalahoen, maherek minokay tayra i kalikowatan i kailisinan.
Ano masamaan ko lisin no pisacepo’, o todong no sacepo’ a lisin. O pilongoc to kawas no riyar masadak ko kapah a mifoting to kakaira to adihayan pinaala, todong no kalacecayan no saka’orip a pahecian no pitoor.
Midemak t pisacepo’ i, pateli i pipacakatan to toron, ’icep, fila’ ato epah, patelien ko niporongan ko talad. Miso’em to epah ko kakitaan no niyaro’, ta pasikakarayan micelipes, ano eca o kamay ko mifetiray ato talodo’ no kamay i epah, ta mifetir pasipapotal. Sacisowal sa: “Maciwciw (sawarangaw), nanay madipot (madama) iso ko mifotingay a kapah, sakaira no piniala, maciwciwaw, nanay pafelien to paoraden kami, sakaecaaw kakedal no liomahan, palasawaden iso ko lifong ato masamaamaanay adada, caay ka pawan niyam kiso, to mihecahecaan pacakat kami to lisin tisowan.” Maherek mipacakat, talariyar to ko kapah ano eca talaalo mifoting.
Ikor to i, o pisacepo’ malosaki’orip to romi’ami’ad to “mipakelan” pinangan, caay ka dengan o lisin. Kailisinan to a “pifoting” a demak kalopitekaan ato paherekan, ano saki pataloma’ay cipamadesay ano eca no sangasaw a kaliso’otan i, ira ko “pifoting” a demak, todong pipaherek no kalisa’ot no demak.
Ono Alikakay a kimad i, malawa no tamdaw ko tatodong nira, oya pa’arawan no kawas. o kakitaan no niyaro’ ato kalas a kasasowalan to samaanen ko pico’ay to takaraway Alikaka, nika awaay ko nga’ayay paecasan itiya. o pirayray no to’as a taneng caay kaedeng sapico’ay to tatiih no Alikakay, pina’ay to ko mihecaan no taneng hato caay pakafilo to tatiih naira. Misi’ayaw to Alikakay, awaay ko pakayraan, citolasto ko fana’ ato ’icel no tamdaw, caayto pakalakowit.
Saka milongoc to ko finawlan to to’as no sadama to sakapiliyasaw to fades, nika polong no demak awaay ko palalan no to’as: caay pa’araw, caay pangiha, awaay pipa’ayaw. Orasaka o kimad to saki Alikaka caay ko pipakonira no to’as, caay ko kacitodong no pipacakat to to’asan a demak.
Orasaka o cikawasay ko palawinaan to no finawlan, nanay mademak nangra ko sa’edaw sapico’ay to Alikakay, ipiedaw a miekak, miri’ang, mitekop i cangraan, itini pidemak a misair, pisifat mapadama ko finawlan sakaecaaw ka kari’ang. nika pakayni i kimad, awaay epoc to demak no cikawasay. O nai Alikakay a kimad ko sakafana’ no cikawasay, pakayni i ng’ayay no “porong” ko sapisair, pisifat. O kimad no Alikakay padamso to cikawasay midemak to “Porong” a ci’icel ko piedaw.
O kimad no Alikakay, mafenek ko to’as to kacitolas no tamdaw, o taneng no finawlan, ono kapilongan a fenek, o to’as ano eca cikawasay to, caay pakaliyas mapa’orip cangra. O to’as no ’Amis o kawas saan ko pitahidang, no pokiw a pitahidang o foto saan, ono Kristokiw o dengan a kawas sa ko pitahidang.
Mitiliday ci Cilo singsi (2018/8/1)
Mifalicay ci Masao Nikar