Misarao’ a lisin

Misarao’ a lisin – Sakarihaday no niyaro’ (阿美族的第二收穫祭祀 – 平安祭)

Pakaynien no ’Amis a tamdaw i lisin ko sakarihaday no syakay no niyaro’, orasaka o pisarao’ a lisin o “sakarihaday a lisin” a han ko pitahidang.

Itiya ho ira ko piketon no mato’asay to kakawa no romi’ad, ira ko pakakaan ato pasafaan sanay to romi’ad no cecay mihecaan. O pakakaan a romi’ad sanay i, itini i saka tosa folad tangasa pito a folad (2-8), pasafaan a romi’ad i, i saka falo folad tangasa cecay a folad (9-1) ko sa’osi no to’as.

Orasaka, o paherekan no pakakaan a romi’ad i, midemak ko niyaro’ to tata’akay ilisin no mihecaan, onini ilisin i, oya todong pipafilongan to no ’Amis a finacadan, saka cidemak to kailisinan no mihecaan.

O paherekan no pasafaan a romi’ad i, midemad ko niyaro’ to saka tosa a pilitodan a lisin, misarao’ han no mato’asay ko ian a lisin, nika ihakowaan ko paromi’adan a midemak, o finawlan sato ko miketonay to romi’ad a misarao’, masasowal ko kalitaan no niyaro’ ato mama no kapah misetek to romi’ad ko kacipinangan. Ta pasafana’en ko finawlan no niyaro’ to pisarao’an a romi’ad, ira ko pipatala no finawlan.

Milicay to kakitaan no niyaro’ toya nga’ayay romi’ad ko misarao’an romi’ad no niyaro’.

Nanoya, mi’ang’ang to ko mama no kapah to finawlan no niyaro’ itiya a romi’ad, misarao’ ko finawlan sato. Mara’od sato ko romi’ad, misa’opo ko mama no kapah to finawlan i sefi, misilsil ko mama no kapah to kasaselal no kapah, masetik mifoting i riyar ato i ’alo, pacakat i pisarao’an to to’as.

Maraod sato ko romi’ad to pisarao’an i, ocorom no mama no kapah ko kasaselal a kapah tayra i riyar ano eca tayra i alo’ a micelem mifoting itiya, o mama no kapah miocor to lakeling micorok to lomaloma’ milisiraw militoron, solsol han i ’oway ko siraw, pateli han i fakar ko toron, malo sakalahok no finawlan itira i sefi, o todong paherekan no miheca to pasafaan a militod ira ko misarao’ sanay a lisin no niyaro’.

Nikawrira, nawhani ono aniniay to ko ’orip a mafalic to, oya masarao’ sanay a lekakawa to saki niyaro’ a pifiyol mato malasawaday to.

Itini i roma a niyaro’, tinako o niyaro’ no Falangaw i Posong, itira i tongce no mihecaan ko misarao’ a romi’ad, todong “pitiko to mata’elifay romi’ad, misahalaka to anohakowaay” a dademaken.

Ono to’asan lisin no ’Amis ko pisarao’an, nikawrira mafiyol to no Payrang ko yincumin saka, o ’alomanay ’Amis a tamdaw caayay to pidemak to misarao’ a lisin, latek dengan to o Falangaw a niyaro’ ko milekoay ho to pisarao’an a lekakawa no ’Amis. Nika no Ta’eman a niyaro’ sepat miheca kinacecay a midemak to pisarao’, o pisasawan no niyaro’ to tefon (Cienicelaysoy) itiya sa a midemak.

O tatodiong no pidemak to misarao’ a lisin o “pitiko to mata’elifay romi’ad, misahalaka to anohakowaay” sanay. Oya pitiko to mata’elifay, nawhani awaay ko pitelek to rikec no kasaniyaro’ no ’Amis, saka itini i tongce o kaloma’ocan a romi’ad, nai kailisinan tangasa i Tongce pasafaan (litosaan) a miheca o maanan ko fangafang no niyaro’ a maainiini massowal, mipakaolah to cinga’ayay ko demak a tamdaw no finawlan. Itiyaay ho a mato’asay o rao’ ko sapakaolah to tadamaanay a tamdaw, o nianan koya misarao’ hananay a paseniyang. O pisahalaka to anohakowaay sanay i, o niyaro’ sato ko mitelekay, anohakowaay no pakakaan romi’ad a dademakan i, itini toya kaloma’ocan mitelek, ano maketon to caay to ka nga’ay fafalicen.

Pakaynien no ’Amis a tamdaw i lisin ko sakarihaday no syakay no niyaro’, orasaka o pisarao’ a lisin o “sakarihaday a lisin” a han ko pitahidang.