Mei Cienwu

Mei Cienwu foksi (梅監霧牧師)

Mei Cienwu (Rev. Campbell Naismith Moody,1865-1940), o Scotland a tamdaw, I 1865 miheca 11 folad 10 romi’ad masofoc i Benvue Bothwall no Scotland, o mama ci Robert Moody, o ina ci Mary Ewing Naismith, 2 ko fafahiyan a kaka, 1 ko kaka to fa’inayan, 1 ko safa to fa’inayan, o mitooray to Wama a Kawas a laloma’an. O mama mitiliday no pingkosi i Glasgow, o ina nai tadamaanay laloma’an i Hamilton ko sofoc.

Misawad nai sinkakoyin i, tayra i Bren sinkakoyin no daykako to 1 miheca i Switzerland, ta itira i Mission no Gallowgate i Glasgow a matayal. Ira ko cecay dadaya matengil ningra ko nano sowal no hakasi ci Buckley to pakayniay pipatenak i Taywan, nanoya sa pacekil ko faloco’ mihayda to tahidang no Kawas, patala to saka tayra i Taywan.  

Miliyas to kitakit tayra i Taywan (離別本國到台灣)

Saka mitelek ci Mei Cienwu to saka tayni i Taywan, nika caay ka fana’en no mato’asay, nawhani mahadang to pilalang no mato’asay, mamalingad to han pasifana’ to ina, saka mararom sato a tomangic ko ina, nanoyaan miliyas to salawina tayni i Taywan. Ira ci Dr. David Landsborough (Lan Tafiti), M.D. aci Rev. A.B.Nielson (Lien Tili), tatolo cangra i 1895 miheca 12 folad 18 romi’ad talasekal i Anpin, itira ci Lin Yincen singsi minanam to pasifana’ to sowal no Payrang.

Patenakay a Mei Cienwu (佈道家梅牧師)

I 1896 miheca 11 folad ci Mei Cienwu aci Lan Tafiti ising rakat sa tayra i Canghua, miteka patenak paising, patireng ko Inkiris ciwlo kiwkay i Canghua to saka tosa patenakan (itira Taynan ko todong), ci Mei Cienwu sa patireng i Dadu, Ailan, Qieding (Xiluo) to pacena’an, o pahanhanan no sinkiwsi a maro’, manga’ay kinapinapina maro’ to cecay mihecaan, misolap to kafiyaw niyaro’ patireng to fa’elohay kiwkay, ikor matama to ko pacarcaran a kahiceraan maro’, samatiyaen ni Mei Cienwu to no Inkiris mihacecay to niyaro’ a misinting, misakamiday ko ’orip a patenak, o koheting epang no Scotland ko nikaenan, o matiyaay ’awa no siri a nisanga’an a la’pa, ano eca o sakongkong ko sapi’ang’ang to tamdaw sawal sa “masidayay no Kawas a wawa” saan ko pitahidang to finawlan a patenak, ano ira ko mitooray, itira sa micaliw to loma kamaro’an, itira padoedo mipatenak to Ratoh, maraod ko pa’aliwacan patorod han ko itiraay kiwkay macacaliw mikerid to lihay, ano eca ocoren ko tintosi pakatayal.   

Matiraay ko kalasida’it ni Mei Cienwu palecad to Lan Tafiti ising to isingan patenak, masamatira i tatenokan no Taywan nai 1896 miheca tangasa 1906 miheca to 10 mihecaan, mapatireng ko 18 a kiwkay itiya, o mitooray nai 1300 ko tamdaw matongal tangasa 4200 ko tamdaw, tatenokan no Taywan sa’etal halo Taycong, Canghua ato Nantu 1100 ko niyaro’, nirakatan ni Mei Cienwu 900 ko niyaro’ nipatenakan. Mapatireng ningra ko Lukang, Ershui, Liuyuan, Xihu, Qingshui, Dali, Fangyuan, Fengyuan, Caotun, Yuanlin, Chishui, Hemei, Zhushan, Dadu, Dacheng, Tianzhong, Beitou, Erlin a kiwkayan.

Kawasan Mei Cienwu foksi (神學家梅牧師)

Ci Mei Cienwu foksi o tadamaanay Kawasan i Inkiris tadamaanay, kala mitiliday ho a mihecaan, maocor no sinkakoyin tayra i Glasgow and Edinburgh sinkakoyin makihatiya to mihecaan kasasowalan sa’opo.    

I 1929 miheca matahidang mihakitiya i Bnuce Lecture, ni Blues papelo, patodongan i The Purpose of Christ (patosokan ni Kristo), ikor palatilidan koni a nisowalan.

Ira ko 12 mitilidan a cudad ni Mei Cienwu foksi, 4 a tilidan no Taywan (piwiyci): Loma, sapatenak, to’ekan a kiwkay, kotosimon a tilidan.   

 Ira ko 8 no Inkiris a cudad, 1.The Heathen Heart. 2.The Saints of Formosa. 3.Love's Long Campaign. 4.The mind of the Early Coverts. 5.Christ for us and is us. 6.The purpose of Christ. 7.The King Guest. 8.The childhood of the Church.

I 1932 miheca nitilidan a The mind of the Early Coverts (Sarakatay to’ek faloco’ no mifalicay) a tilidan mapatodong no Glasgow daykako to hakasi no Kawasan (D.D).

Maradiway ci Mei Cienwu foksi (聖樂家梅牧師)

Talolong ko saki radiwan ni Mei Cienwu foksi, matiya o fafahi ni Lan Taypi ising malatiyin no katimolay daykay misanga’ to radiw, nisanga’an ningra telangay radiw saka 25A, 45, 46, 217, 266 limaay a radiw. Tatenokan adihayay kiwkay a sikatay cingra ko pasa’opoay misakapot.   

Kararamod ni Mei Cienwu foksi (梅牧師之婚姻)

I 1908 miheca ci ramod ci Mei Cienwu foksi aci Miss Margaret Findlay, o nano Glasgow daykako a hakasi ci Dr. Larkhou a wawa to fafahiyan, nika karaadadaay ko tireng, sapidipotaw ni Mei Cienwu foksi tayra i New Zealand, Japan ko pipaising, masakalimelaan i 1915 miheca 11 folad 8 romi’ad a mapatay, pitadem toya romi’ad I lalan no Canghua i, oya nikeridan ni Mei Cienwu foksi a sikatay mitomtomay miparadiw to “Awaay ko pades i kakarayan mida’oc ko ’orip” sanay o pipatenak todong koni.  

I 1922 miheca, ci Mei Cienwu foksi ciramod to kakeridan kangkoho no Canghua isingan ci Miss Margaret Arthur itiya, ikor citodongay to fafahiyan a tayal no Inkiris ciwlo kiwkay to pinapina mihecaan. Ira ko 76 mihecaan mapatay i Inkiris.   

O katadamaan ni Mei Cienwu foksi (梅牧師之風範)

(1) Malalokay ko tayal (勤於工作)

Caay ka rorayen patenak ci Mei Cienwu foksi, mihadidi to so’aw ato cahiw, kacidalan ka’oradan caay pahanhan, ira ko pasowalay cingraan eca to haenen ko roray, masamo’aw to tatirengan, paca’of sa ikaka to koedaway no ’orip ko nga’ay, mapatay i tayal no Kawan o kalipahakan.    

(2) Kao niyah to no tao ko pisafangcal (克己待人)

Saka’emed sa ko kaciriko’ no niyah, o cecay romi’ad no sinkiwsi, samatiya sa o miki’a’amay ko kaciriko’ no Inkiris ci Mei Cienwu foksi, misa’icel pacakat to payso, pacakat to 4500 sapatireng to kiwkay no Canghua, pacakat to 1000 payso sapatireng to Nanto kiwkay, pacakat to 1000 payso sapatireng to Tayciw kiwkay, roma i, o Qingshui, Caotun, Ershui, Xihu, Pingtung, Douliu kiwkay ato sera ko pacakay, halipadangay to pakoyocay, adadaay, tintosi, patado micoker to sadama, makalic sa to cinamalay o sasereday kisya, materek ko payso, maala ko 2 miheca mapatireng ko 1 kiwkay.  

(3) Malalen ko nengneng (一視同仁)

Malalen ko nengneng to cidafongay, ci’icelay tamdaw ato caayay ka tadamaan nengnengen a tamdaw, o sedi no tawa ko sapilitemoh, pananom, o sowal no Taywan tamdaw ko pilicay, masadak talapotal o niya sa ko miwikiday, caay palifot to tao, sowal sa cingra: “Ci Yis komi’orongay to ciwcika no niyah” saan. Ira ko cecay romi’ad, i Sihu misinting cikafoti’an to toloay laya’ ko dadahal aci Lin Siekong foksi padal, itira sa i Nanto misinting koemeday a liwkang ko kamaro’an, hadidi sa to pikalat no cenget a mafoti’.

(4) Halitolonay (注重祈禱)

Ci Mei Cienwu foksi, ’ayaw no pisinting, ikor o pitolon, manengneng to no lafalafang ko pitolon ningra, i parad no kiwkay, mateli ko misac no salikaka, rariden ningra a mitolon.  

Mapatay (辭世)

Na patiko nai Taya misinting ci Mei Cienwu foksi, madenga no lifong, i 1924 miheca minokay tayra Inkiris.

I 1927 miheca nai Scotland patono to ta’angay toki pafeli to Canghua kiwkay piharatengan to ’ayaway fafahi ci Miss Margaret Findlayan.

I 1940 miheca 2 folad 28 romi’ad mapatay i Lennoxtown no Scotland. Toya miheca, 6 folad 13 romi’ad, Tayciw ciwkay midemak to piharatengan cingraan a lihay i Canghua kiwkay.