Li Sengsiong fingkosi

Li Sengsiong fingkosi (李勝雄律師)

Kasofocan ni Li Sengsiong (pasowal no widawidang: Katsuo) fingkosi i 1941 mihecaan, Tongwu daykako holican, Ponka (Wenhua) daykako holic sose ato Amilika Illinois Daykako katatiri’ holic sose, o cecay ci salongocay no tamdaw fingkosi, holican hakasi no Tongwu daykako, Ponka (Wenhua) daykako, Taywan salongocan no tamdaw yofayof ’a’isidan, misetekay yiing no Mincintang, Misatataday patireng to kitakit no Taywan micokeray ’a’isidan ato Patirengay to kitakit a mitiliday, polong no kitakit fingkosi konghuy sakapotan licikay. Nao mifingkoay to Meilitao demakan mafadesay tamdaw, kasacengelay ngangan ca Cang Canhong, Wang Kanglu, Kuo Peihong, Li Yingyuan, Luo Yisi ato Si Ming (Masao Nikar…) padamaan mifongko.

Pitilid ho itiya i, toromi’ami’ad mipacakat to fayfay, romadiw to kitakit radiw, ira ko kahinapec itiya “Henen to ko demak to nikaolah to kitakit haw?”, sapinang han to pisolap, mahapinang ko mademakay no syakay, manengneng to ko caayay ka mo’ecel a demak ao matiniayto, misatikotiko a mipadang. Pakatowa ci Li Sengsiong fingkosi, “Nawhani caay ka salalekoan ko pilayap to harateng no itiyaay sifo a kiwiko, saka caay ka safaloco’ ko nitilidan.”

“O cecay awaayay ko salongoc no tamdawan i kitakit a sakapot, o satata’akay mikari’angay to salongoc no tamdaw a kitakit.”

Kacitodong palowaday no Taywan salongoc no tamdaw yofayof, palowaday tamdaw, mala citodongay mitiliday no Taywan salongoc no tamdaw yofayof ato midemakay wiyin ci Li Sengsiong fingkosi, o salongan minekeray i salongoc no tamdaw ko pi’imeran, nirakatan oya to ka’ayaway i salongoc tamdawan no Taywan.

Mitikol miharateng to satapangan a palowad to Taywan salongoc no tamdaw yofayof, o pidotoc to telek no rikec, mitoki patireng malapolongay tono kitakit, “Setanghocin Taywan salongoc no tamdaw yofayof” kinapinapina na’ayen no citodongay sifo. O saca’of, itiyaay ho Komintang sifo “cecay congko” sanay a harateng, nitelekan a rikec to polong no kitakit tatiih o “Taywan” ko kacingangan, o cecay i pafafaen ho to “conghuaminko”; saka tosa, o kapolongan no kitakit a salongoc yofayof ira to ko congko salongoc no tamdaw a mapatireng itiya, o malalenay a pidemak tatiih malitosa. Orasaka Taywan salongoc no tamdaw yofayof o saka cecay a demak: o “Taywan salongoc no tamdaw yofayof” pingitangitan to sakapolongan masa’opo to pakoniraay ato salongoc.  

O micokeray itiya a mikapotay to Taywan salongoc no tamdaw yofayof, o mikerida mi’esesay nonini ci Li Sengsiong fingkosi, tayra i sakakaay midemakay to laloma’an miliyang, ikor misaliyaliyaw a milongoc, oya syatanghocin yofayof matatoor mitoki todong a telek, saan mafalic to telek manga’ay mitoki. Orasaka, oya Taywan salongoc no tamdaw yofayof itini i 1984 miheca 12 folad 10 romi’ad, nika tangasa to i 1997 miheca itira to i Taypisi syakayci mipangangan, nano laenoay a yofayof mala o so’elinay to nitokian a syatanghocin yofayof.

Masowal ko likisi nonini, paretatenga ci Li Sengsiong fingkosi, kapolongan masa’opo ono saki tamdawan a salongoc ato pakoniraan, talacowa mitokiay caayay pitoki i sifo i saheto o manga’ayay awaay piliyang to sarikec. O cecay kitakit a finawlan o mamiraoy to pisakapot a salongoc, itini minengneng to cecay kitakit o nikapolongan mocowat aci salongoc ko pi’arawan. “o awaayay i salongoc no tamdaw sakapot a kitakit, o mikari’angay to salongoc no tamdaw a kitakit; oya ni palahadan no sifo salongoc no tamdaw sakapot a kitakit, milongoc to finawlan to pipatireng sakapot yofayof pasi sifo a mitoki, ta manga’ay masolap no kitakit ko finawlan sakapot, o niaanan koya ni’emecan to’ek a Taywan ato aniniay a congko”; o niaanan ko pidotocan ni Li Sengsiong fingkosi: “o cecay kitakit ano adihay ko patireng to salongoc sakapot, sician sakapot i, mala o nikapolongan, ira ko salongoc no tamdaw harateng no kitakit.”

Lalowadan no salongoc no tamdaw o nipicoker no laloma’an (人權的啟蒙與家人的支持)

O saki salongoc no tamdaw harateng a palowad a cifaloco’ ni Li Sengsiong fingkosi, mitikol to nai pifiyol no ina. Mahirateng ningra i pitilidan to cocong, maraod to ko pisingkiwan matengil ko pasowal no ina misilsilan to paya a singkiw, harateng sa cingra itiya: “Ira ko mahaenay a demak haw?” paherek to ko singkiw i, tayra to cingra pitopaan minengneng to paya, pihapiwan i mapadeng ko tingki, saan i, malikat to ko tingki, o nianan ko mahiratengay ningra, itiya a mafana’ “O mahaenay aca ko nisilsilan a pisingkiw”.

Naitiya, misitapang to ci Li Sengsiong fingkosi minengneng to pidemak no sifo ato kacomahad no syakay, misitapang miharateng to syakay no Taywan nawiro adihay ko caayay ka mo’ecel a demak. Patinako ci Li Sengsiong fingkosi to sowal, pitilid itiya ho i, to romi’ami’adan to dafak mipacakat aca to fayfay, romadiw to radiw no kitakit, saka ira ko kahinapecan ningra: “Maolah to kitakit i haenen to ko pidemak haw?” saan i, nanam sato misolap, minengneng to demak no syakay, manengneng ko caayay ka mo’ecel a demak ira ko milonokan to sapipadamaaw. Pakatawa ci Li Sengsiong fingkosi, “nawhani awaay ko masongila’ay pilayap to niharatengan no sifo a kiwiko, orasaka caay ka fangcal ko pitilid.”  

Tona mapatireng ko Taywan salongoc no tamdaw yofayof toya mihecaan i, adihay to ko nipadamaan a ciraraway to sician, milongocay minokay a mapasisitay kohetingay ngangan salongoc, toya marakrakay to mi’emecay sato’ek itiya, oya Taywan salongoc no tamdaw yofayof o mitoro’ay to pilikaf t osician a yofayof, saka dengan cecay nai salongoc no tamdaw ko pilikaf to sician, milongoc to no finawlan ato sician salongoc a misiikeday no finawlan yofayof, orasaka ikor adihayay makari’angay no sician a demak madadoedo mikilim to Taywan salongoc no tamdaw yofayof.

Li Sengsiong fingkosi awaay ko pisawad ningra to pipatado to mafadesay tamdaw to “Formosa (Meilitao) demak”, ato mapa’oningay ngangan a misatekeday onto a tamdaw ca Zhang Canlong, Wang Kanglu, Guo Beihong, Li Yingyuan, Luo Yishi and Si Ming (Masao Nikar) padamaay malafingkosi. Malicay no itiyaay ho caay kalecad tono aniniay, o salaloma’an awaay ko pilalang mikihatiya to Taywan salongoc no tamdaw yofayof, pipa’orip to ciraraway no sician? Sedi sa matawa ci Li Sengsiong fingkosi a pasowal: “Ano nengnengen awaay ko pilalang no fafahi, nika o faloco’ ningra matalaw to.”.

Mimingay kimad, ta’angay pa’araw. (小故事，大啟示)

O nipipaso’elin to Kristokiw ni Li Sengsiong fingkosi maolah i kalalicayan pakapi to mimingay kimad o hahiratengen, pa’icel to roma a tamdaw, todong o patapi’elal to niyah.

Mahirateng i 1969 miheca kaitira ho pitilid ningra i Illinois no Amilika i, o nano maepecay ko tireng. Mikilim to kamaro’an a loma’ o ngataay no pitilidan, midoedo to palalan no sinpong minengneng to loma’, sa’ayaw o polong no pacaliway to loma’ o papaca’of cingraan, ikor awaay a talaen ko ca’of. Caay pakahadidi miliyaw haca milicay to tawki no loma’, malalen ko ca’of no tawki no loma’, mali’ayaway to no tao saan.  

Sa’ayaw, harateng sa ci Li Sengsiong fingkosi “Mana matatama sao?” saan, ikor itiya mafana’ cingra to pinangan no kohecalay tamdaw mana’ay pacaliw to kaliyalaway tamdaw, nanoya saheto matiniay ko pisorar, miliyas i cingraan. Ikor, itira to i kohetingay sa’etal ko picaliw to loma’ kamaro’an Li Sengsiong fingkosi, nawhani miingiday to lalan no cilamalay saka, caay kahakowa ko li’aca no loma’, ano ira ko pata’elif no cilamalay i, rangernger ko loma’, talacowa matiratira, itiyaay a mitiliday no Taywan maolah masa’opo i loma’ ni Li Sengsiong fingkosi. O nipasowal i, mitiko miharateng to niyah itiyaay ho a demak, iraay ko paratatenga o pakoyocay ko fiyaw hakiya, saka caayho pilicay to kafiyaway tamdaw.    

O ’alomanay tamdaw paratatenga “salongoc no tamdaw” awaay kokakiharan no niyah, miliyang ci Li Sengsiong fingkosi tonini, sowal sa “Anini, caay pikihar kiso to tao a kari’ang to saki solongoc no tamdaw, anodafak, alatek o kiso to komakari’angay t onano salongoc no tamdawan.” Patinako cingra, ira i Amilika kohecalay tamdaw talifahal sa mipalo to kohetingay tamdaw a demak, miliyang ko ’alomanay kohetingay tamdaw itiya, itiya ira ko Yotaya tamdaw mikapot to kohetingay miliyang, ira ko pilicay no tamdaw to Yotaya tamdaw “O maan iso koni? Caay ko Yataya ko mapaloay.” Oya mipadangay a Yataya tamdaw paca’of sa “Anini o kohetingay a tamdaw ko mapaloay a caay kiharen a talimaan han, anocila manga’ay manga’ay samsamen ko Yataya tamdaw sato cangra. Talaen pipalo nangra to Yataya caay to ka canaor.”  

Ci Kerito ko patodonga, o salongoc no tamdaw ko miredoan (基督的標準，人權的堅持)

Ikor no kafafalic no sician mikowan, ira ko tamdaw milicay ci Li Sengsiong fingkosian: “Naoiro kala congtong ni Chen Shuibian i caay piai to pakamaro’an iso?” ano eca: “Awaay ko licay ni Chen Shuibian to kangalay saka lakomong itisowanan?”. Miliyang ci Li Sengsiong fingkosi to matiniay a sowal, paretatenga cingra o sakaira no kamaro’an tono kitakit caayay ko matiniay a kalali’acaan no sician, o pipatodong no congtong to ciikeday a fana’, matayalay no kitakit ato finawlan a tamdaw. So’elinay, kalacongtong ni Chen Shuibian i ira ko micikerohay ci Li Sengsiong fingkosian to saka citodong no Cianca wiyin, nika caay kahien ni Li Sengsiong fingkosi ko nian. Kalapakemotay ci Li Sengsiong fingkosi sawal sa: “nga’ay aca awaay ko licay, o sasamaanen ako? Matalaw to kasolotaw.”

Itiya ho ’alomanay mafadesay tono sician ano eca mikapotay to pasadak t ociraraway to sician tamdaw, o sapialian to salongoc no tamdaw a mikinafalah to katalawan no ’orip, mitiniay a ’angil ato pisa’icel o kaimahan no tamdaw, nika malecaday romakat toya to’ek ma’orip ni Li Sengsiong fingkosi sawala sa, ira ko misalaliay to salongoc no tamdawan a tamdaw i, anini mala o mifadesay to salongoc no tamdawan. Ano caay ko mirepetay to patodongan tono salongoc no tamdaw, caay piredo to noniyah, mociriw to ko nirakatan. Malita’ang, misapo’ener ci Li Sengsiong fingkosi a pasowal, ci Yis Keristo ko patodongan ningra to salongoc no tamdaw, maanan to a demakan ni Keristo a todongan ko pinengneng, ano caay i mociriw to ko nirakatan.

Oni Keristo a todongan ko pinengneng to salongoc no tamdawan, miredo to pidama salongoc no tamdaw, midama to Taywan, o nianan ko hawiro caay piharateng to kacingangan, kalatapangan ni Li Sengsiong fingkosi, miredo mikapot to syakay onto a romakat, o nianan ko ni doedoan i saka ci ngangan no Taywan a onto, i piliyang to kapolongan mitopa to Hese a romakat manengneng ko tireng ni Li Sengsiong fingkosi, o tomenekay, miredoay a tala’ayaw romakat, matiya to ’ayaway koni.