Kiwkay

nani… a masadak Wikipedia

Kiwkay (教會)[mikawit | o yin-se-ma no pisinanot]

O kiwkay hananay i, o sa’opo no misakiristoay. I fangcalay a cudad Matay 18:20 “sowal sa ci Yis, Ano pakayni i pitoor namo Takowanan ko sakasa’opo no tatosa tatolo a tamdaw icuwacuwa i, ira Kako a mikapot itira,” han ni Yis. O nian ko lalangatan no tamdaw a mafana’ to nikatomireng no kiwkay. Nika, ano nengnengen ita ko demak a cudad ato tikami ni Pawlo,pitilo,yahani tangasa i pa’arawan a cudad i, mapahapinang ni pawlo, cecay ko niyaro’ cecay ko kiwkay, sa ira ko Roma, kolinto, ipiso, filipi, kolosay, tisaloniki, antiyoki hananay a kiwkay, o nini a kasaniyaro’ i, cecacecay ko kiwkay, nikawrira, ano cecacecay ko kiwkay i, o komodto no finawlan koni. Ano pakaynien ita i sowal no kiris-siyaεκκλησία((ekklesia)sanay a sowal i, o kiwkay hananay i “mapili’ay a malemeday a tamdaw” sanay. Matay 16:18 sowal sa ci Yis “sowalen Ako kiso, o ’ongcuy kiso Pitiro. O papatireng Kako to sa’opo Ako itini tona ’ongcuy. Caay ko mamalowid no ’icel no patay konini.” Pakayni tonini a sowal a pahapinang ci Yis, cingra ko tapang no kiwkay, o tireng Ningra ko kiwkay. Orasaka, o kiwkay hananay i, caay koya kalokiwha ato kalosa’opo, caayay haca koya ci ciwcikaay a loma’ ko mihaenan, matiya o Antiwki, Kolinto a kiwkay. O “mapili’ay a malemeday a tamdaw” ko mihaenan a matatodongay a kiwkay. I kalomahad no kiwkay i kasaniyaro’ i, paytemek no finawlan a paso’lin i, mapatireng ko kasaromarom no pakayraan ato kiwkay, ira ko macicihay a malitosa a kiwkay, o nian ko saka adihay no pakayraan ato kiwkay, ira ko tinsokiw, ira ko cin-sinhoy, ira ko seiy-kiwkay, ira ko ansokonic a kiwkay,ira ko ciwlo kiwkay. Itini i falohay a kataterekan a cudad i, o fangcalay a pita’ongan han ko kiwkay ano ca i o loma’ no Tapang. Nika o sowal ni Pawlo i “o tireng ni Kiristo” han ningra ko kiwkay. Nawhani, nai ci Kiristoan a mapatiren ko kiwkay, o cecay a tireng ni Kiristo ko kiwkay. Matilid i Loma5-8 a cefang, ^min no ’orip no tamdaw i ci Apolohaman a militapang, saka, yo moraraw ci Apoloham i litapangto kita a ciraraw, o nian ko saka pacek ni Yis Kiristo i ciwcika, yo malaliyaw a ma’orip ci Kiristo i patay i, malaliyaw kita a ma’orip nai patay. Orasaka, pakayni i kinafalah ni Kiristo a mapacek i ciwcika ko sakalemed ita, onini a malemeday a tamdaw ko misowalan ni Pawlo toya Kiwkay hananay. [1]

  1. 林茂德. (2011). Wikipedia 維基百科 族語詞條試寫─原住民族語詞條 2011作品集. 教育部.