Kede Simpu

Kede Simpu (葛德神父)

Kede Simpu (Rev. Ernst Gassner, SMB). Kede Simpu masofoc i 1936 miheca i Chiasso no Switzerland, i 1957 miheca micomod i Paylenkay, 1963 miheca mapatireng mala Simpu, o safa ci Kas Iko (Rev. Igo Gassner, SMB) ato faki ci Mahate (Rev. Ernst Manhart, SMB) o nai Paylenkay a Simpu.

I 1964 miheca, ci Kede Simpu aci Li Huairen Simpu (Rev. Paul Ricklin, SMB) malahakelong tayni i Taywan, toya miheca 10 folad tayra i Sincu Kowapin kakoyin minanam to no Kowapin a sowal, itiya i 1966 miheca misawad nai kowapin kakoyin tayra i Posong patado.

O pipatadoan ni Kede Simpu halo Rekat, Fafokod, Atolan, Sa’aniwan, Takofan, Sinko, ato Fotod ato Alapawan. I 1997 miheca, ci Kede Simpu mapaocor tayra i Fafokod kakeridan citodongay, milacal to Fotod, Alapawan a kiwkay, I 2003 miheca micada to kayciw sa’etal no Tasywan no Paylenkay.

I patenak no tayal, ci Kede Simpu micikeroh to masaniyaro’ay tintosi, mipalahad to niyaro’ay tintosi ato Kimo tarokos. Patatenga cingra micikeroh to sakidemak no kiwkay militado to salikaka no kiwkay, a Kimo tarokos a tayal, malikapot to salikaka, caay ko mikeriday to salikaka. Ci Kede Simpu micikeroh haca cingra patireng to Mitooray paso’elin sakapot, sakafalic no Tinsokiw i Fotod kiwkay.

O pipatenak i, adihay ko nidemakan i no syakay sapadang to salikaka ato yincumin. I 1967 miheca, ci Kede Simpu itira ho cingra i Rekat niyaro’ kiwkay i patireng to Pihoped kociwsya, saka falic ’orip no yincumin. I 1968 miheca miteka, ci Kede Simpu midotoc to ni Xi Zhiping sinpu (Rev. Jakob Hilber, SMB) a “Misatifo palanga’ayay facal” halaka, itira i Baohua, Ruihe tosaay niyaro’ patireng to tifo, misafacal kaliomahan.

Nanoya, i 1976 miheca, matahidang no Kociw no Rekat ci Kede Simpu, pakayni “Caay ka nga’ay awa ko pitilid no i lotokay kaemangay” a harateng, patireng to yociyin no Rekat, oya Mikoy yiciyin, tangasa i 1985 miheca o nika awaayto no kaemangay caay to karocok ko patorod no sifo a paherek. Nanoya, miahowid to pikinafalah pacakat ni Kede Simpu to masaPosongay, itiya 2003 miheca mapakaolah to “Kalita’angan a finawlan no Posong”, i 2017 miheca 8 folad 3 romi’ad milayap to kacingangan no Conghuaminko, mala “So’elinay finawlan no Taywan”.

I 2021 miheca 11 folad 16 romi’ad, ci Kede Simpu paherek ko tayal i masaPosongay to 55 mihecaan, mikalic to hikoki minokay tayra i Switzerland militeng. I’ayaw nonini, ci Kede Simpu i 11 folad 14 romi’ad saikoray pikerid to no Paylenkay a kiwkay to piMisa. 11 fola 15 romi’ad, miingkay ci Kede Simpuan ko Paylenkay, o nai Kalinkoay sa’etal a kakeridan ci Huang Zhaoming Simpu ko mikeriday, halo Conghua yakiyo Tongyi ci Gao Guocing ato ’alomanay salikaka ko mikihatiyaay a mipadongos.

Itiya 11 folad 16 romi’ad ’ayaw no lahok 8 ko widi, kakeridan no Posong siencang Rao Qingling midemak to karomadiwan to pipadongosan, ci Rao Qingling siencang, Wei Zhuan Simpu, Wu Ruoshi Simpu, Ou Siding Siwsi, ato ’Amis, Iwatan (Bunun) ato Tao finacadan tayra i hikokiciw mikihatiya padongos ci Kede Simpuan. I 11 folad 17 romi’ad ’ayaw no lahok 8:14 widi, mikalic to hikoki ma’efer pasi Zurich hikokiciw no Switzerland, ikor no ’orip ningra itira to i Sokay no Paylenkay a militeng to ’orip.