Inoue Inosuke
Inoue Inosuke (井上伊之助)
[mikawit | o yin-se-ma no pisinanot]Lu Junyi mitiliday 《Ziyo sinpong》, 2004 miheca 6 folad 27 romi’ad, p.15; “Ciolhahay Taywan”III p.95-99
Dotoc: ci Inoue Inosuke (1882-1966), Kochi ken no Dipong a tamdaw, I 1911 miheca o “Mamico’ay to mipatayay to mama”, tayni i niyaro’ no Yincumin i Taywan a malaising, i 1947 miheca 4 folad minokay patiko tayra i Dipong.
“Mikotay kako to mama a mico’ay” sanay a sowal o naitiraay ci Inoue Inosuke a nisowalan.
Mahaenay ko demak i 1906 miheca 7 folad 31 romi’ad itiya, ira ko cecay no Dipong Hetian (Kazu Takashi) rakes a kaysya pakayni i satekedan fana’ to “Inoue”, tayra i Ciamin niyaro’ Siwlin sakowan i Kalinko, mamaanay ko pakayraan patayan no Truku finacadan.
Tahira i Dipong konini a ratoh i, o wawa ci Inoue Inosuke o nano pisawad mitilid i sinkakoyin, mikihatiya to nidemakan a sa’opo Kristo kiwkay no Dipong, tona pakatengil cingra to pipatay no yincumin no Taywan to mama i, wata: ko rarom no faloco’, saliyaliyaw sa pasowal nawiro? nawiro? saan, cekil sa payra kako i Taywan mico’ay kako to mama sato.
Matiwa’ aca, toya nitengilan toya paRatohay misa’osi to fangcalay cudad “Kaolahen ko ’ada no namo.” (Matay 5:44), tangsol sa ira i pono’ to nano sowal ni Yis: “Talacowa ccay aca a laliping ko 'aca no tosa a 'alic, nikawrira, ano caay ko nafaloco'an no i kakarayanay a Wama namo i, caay ka tfad i sra ko ccaccay aca nonini.” (Matay 10:29), nanoya talapa’elal cingra, paratatenga o patay no mama, eca ko iraay ko nafaloco’an no Kawas hahiya. Naitiya, i tangila ira ko sawal cingraan: “Aka ka lowid no tatiihay. Ka o nga'ayay ko sapilowid to tatiihay.” (Loma 12:21) nanoya masapinang to ningra ko nano sowal no fangcalay cudad: o satata’akay ’icel no ’orip i o olah, dengan o olah ko sapifalic to tamdaw, caay ko sakalalood, ano eca no sician a ’icel, oya olah. Nawhani ira ko olah, itira o tamdaw ato tamdaw mapalasawad ko sasiingtel, nanoya, mitelek cingra tayra i Taywan patengil to yincumin to olah no ratoh ni Yis.
Nawhani, ira ko halaka to sakowan no Dipong a sifo itiya, misahalaka o pakayraan no yincumin pala “sintu”, orasaka milalang to patenakay micomod i niyaro’ no yincumin to Ratoh. Mafana’ ci Inoue Inosuke to pifootan, pasayra to isingan ko pitilid ningra. I 1911 miheca 8 folad, malaheci ko kalaising ningra, tangsol sa toya mihecaan 10 folad 16 romi’ad tayra i Taywan, mahayda cingra micomod i niyaro’ no yincumin matayal to malaisingay tayal. Sa’elinen ko nasowal o patosokan ningra i yincumin o papatengil to Ratoh ni Yis ko sapatado to isingan, sowal sa cingra o sanga’ayay a “Pico’ay” a pakayraan. Caay ko kasasiingtel, o pisafaloco’ to maolah to mipatayay to mama a yincumin kararoman.
Masamatira, mirakarak to cingra tayra i Luodong, Hualien, Taoyuan, Hsinchu, Wushe no Nantou a niyaro’ no yincumin, ira ko 35 miheca ko halafin. Oya nirakatan ningra a niyaro’ mapatireng ko kahiceraan, piadahan to adadaay no yincumin, pakafana’en cangra to Ratoh, pasool to faloco’ nangra. Masamatira, ikor o pipangangan no yincumin ci Inoue Inosuke “O isingan a mama no yincumin i Taywan”, o sarakatay patenakay i yincumin to Ratoh cingra.
I 1945 miheca, paherek ko no saka 2 lalood no hekal, misetek cingra padoedo itini Taywan paRatoh to yincumin, o saka nga’ay no yincumin to kanga’ay sapiising, nifalic cingra to ngangan paka ci “Gao Tianming”, pasi KMT sifo niocoran a citodongay misingsi, mahayda ito. O sakamatini no demak ningra, pahapinang to saka ciepoc no ’orip, sapipalolol to mipatayay a yincumin to mama a raraw, o sapipawacayaw i yincumin to nano olah ni Yis Kristo saki cingraan. Malimelaan, i 1947 miheca ira ko 228 a ddeemakan itiya, mapatangic cingra mapanokay tayra i Dipong.