Augustin Siwsi

Augustin Siwsi (歐思定修士)

Augustin Siwsi (Br. Augustin Büchel, SMB; 1936-), masofoc i Switzerland, 23 ko mihecaan micomod i Paylenkay. Moetepay ko mihecaan no Paylenkay itini i Posong itiya, mangalay to tadamanay a kayki tamdaw, nanoya mala sa’ayaway cingra no Paylenkay a siwsi tayni i Taywan, itiya i 1966 miheca mida’oc ko kaitini i Taywan. Nai 1963 miheca miteka, tangasa i 2021 miheca ira ko 58 mihecaan ningra kaitini ningra i Taywan.

O cahelakay ci Augustin Siwsi, maolah midadangoy, tangasa anini hinatayra cingra i riyar no Taypinyang, maolah talalotok micakil, i 1978 miheca patireng to micakilay to Xiangyang a lotok, mirakat to lotolotok, i 2015 miheca itira i Xiangyang a mihemek to 80 mihecaan no ’orip. Ci Augustin Siwsi o tataparan kiwiko, midipotay to taliyok a palowaday, mikihatiya patireng to Taytongsien midipotay to taliyok yofayof, misahalaka to Biwa fanaw kohetingay koying, i 1996 miheca mapakaolah to “Malalokay to liyok isian tadamanay tamdaw a kompay”. Kalawidang sa to kilang hana ci Augustin Siwsi, aniniay Paylenkay taliyok saheto o nipalomaan ningra a kalohana. Saki ci Augustin Siwsian, ira ko hana kilang ato lotok mato niyaro’ay ningra.

Ci Augustin Siwsi to saki Paylenkay a likisi ato kasasiromaan limelaen cingra. Talolong ko mahiratengay ningra to matelangay a kamaro’an, itira i matelangay kamaro’an matayal ira ko 3 mihecaan. Paretatenga cingra to katelangay kamaro’an miming tato, pasietip ko fawahan, saromi’ad sa fa’edet ko laloma’an, awaayho ko sapihpih to li’etecay (lengci) itiya, marorayan matayal. Itiya, ’aloman ko tayniay i Taywan a Simpu, macaco’co ko kamaro’an, itira saan ko roma Simpu i ’ariri patelian to lalosidan, kadademakan a mafoti’, orasaka micoracor saka itira i Hangcu lalan mipatireng to fa’elohay kaitiraan.

O Senmo isingan Tintokay i 1975 miheca miliyas to Posong, patorod hananay ko Renay siwnikay mikowan to isingan. Midotoc to ni Augustin Siwsi a mahiratengay, oya Senmo isingan Tintokay to saki Posong sa’etal a isingan ma’edengay ko matayalay tamdaw to padamaay midipot to adadaay itiya, nika miketon to piliyas, tayra i roma niyaro’ mipatado to tamdaw.

Midotoc to ni Augustin Siwsi, o ka’ayaw no fawhan mafalic ko sa’ayaway a halaka no Senmo isingan Tintokay. Saka wiliay no Senmo isingan Tintokay ira ko cecay tapangan a afinang, o nano nipalomaan ni Augustin Siwsi, o nano sera no Nokay koya ka’ayaw no Senmo isingan Tintokay, o nihaian no Nokay saka manga’ay a misadadahal (aniniay patelian to tosiya), nika ikor ka’ayaway no Senmo isingan Tintokay nipa’acaan to no Nokay, saka mafalicay oya aniniay to a kaitiraan.

Roma, I’ayaw kafana’en ni Augustin Siwsi mifalic ko Tawu kiwkay, orasaka oya ka’ayawan no kiwkay nano nipalomaan a sepatay tapangan a afinang a tolo tapangan, nilinahan patayra i aayawan no Paylenkay, oya kawiliay no fawahan makorahay nicengelan toloay tapangan afinong.

Ci Augustin Siwsi tayni i Taywan ira ko 58 miheca, i 2003 mihecaan mapakaolah no Taytongsien cenfo to tadamanay finawlan, i 2017 miheca maopatodong to no Conghuaminko a kacingangan, o “Tada Taywan a finawlan (tamdaw)”.